បីយើងឆ្លងដោយក្តីស្រឡាញ់
ដោយJames Banks
April 13, 2022
គឺអញបានបង្កើត ហើយអញនឹងទទួលឯងជាបន្ទុក អើអញនឹងបី ហើយនឹងជួយឯងឲ្យរួចផង។ អេសាយ ៤៦:៤ មានពេលមួយ ចៅរបស់ខ្ញុំ អាយុ៤ឆ្នាំ បានមកអង្គុយនៅលើភ្លៅខ្ញុំ រួចចង្អុលទៅក្បាលរបស់ខ្ញុំ ដែលទំពែកអត់សក់។ គាត់សួរខ្ញុំថា “លោកតា ក្បាលលោកតាកើតអី? ខ្ញុំក៏សើចហើយប្រាប់គាត់ថា “អូហ៍ តាជ្រុះសក់បាត់បន្តិចម្តងៗ អស់ជាច្រើនឆ្នាំហើយ”។ គាត់ក៏បានធ្វើទឹកមុខឆ្ងល់ ហើយក៏បានឆ្លើយតបថា “មិនល្អទេ អញ្ចឹង ចៅនឹងចែកសក់ខ្លះឲ្យលោកតា”។ ខ្ញុំក៏បានញញឹម ពេលដែលបានឃើញគាត់បង្ហាញក្តីអាណិតចំពោះខ្ញុំ ហើយខ្ញុំក៏បានឱបគាត់។ ក្រោយមក ខ្ញុំក៏បាននឹកគិតអំពីសេចក្តីស្រឡាញ់ដែលគាត់មានចំពោះខ្ញុំ ក្នុងពេលដ៏មានតម្លៃនោះ ដែលបាននាំឲ្យខ្ញុំនឹកចាំ អំពីសេចក្តីស្រឡាញ់របស់ព្រះ ដែលមិនអាត្មានិយម តែសប្បុរស។ លោកជី ខេ ឆេស្ទ័រតុន(G. K. Chesterton) បានសរសេរថា “យើងបានប្រព្រឹត្តអំពើបាប ហើយយើងក៏ចម្រើនវ័យកាន់តែចាស់ទៅៗ តែព្រះវរបិតានៃយើងមិនចេះចាស់ជរាឡើយ”។ ត្រង់ចំណុចនេះ គាត់ចង់មានន័យថា “ព្រះដ៏មានព្រះជន្មពីចាស់បុរាណ” (ដានីយ៉ែល ៧:៩) មិនដែលប្រឡាក់ប្រឡូសដោយសារភាពពុកផុយនៃអំពើបាបនោះឡើយ បានជាទ្រង់មិនចេះចាស់ ហើយក៏ស្រឡាញ់យើង ដោយក្តីស្រឡាញ់ដែលមិនចេះប្រែប្រួល ឬអន់ថយឡើយ។ ព្រះអង្គសព្វព្រះទ័យនឹងសម្រេចព្រះបន្ទូលសន្យា ដែលព្រះអង្គបានប្រទានរាស្រ្តទ្រង់ ក្នុងបទគម្ពីរអេសាយ ជំពូក៤៦ ថា “គឺអញនេះពិត រហូតដល់ឯងចាស់ជរាផង អញនឹងបីឯង ដរាបដល់ឯងមានសក់ស គឺអញបានបង្កើត ហើយអញនឹងទទួលឯងជាបន្ទុក អើអញនឹងបី ហើយនឹងជួយឯងឲ្យរួចផង”(ខ.៤)។ នៅ៥ខបន្ទាប់ ព្រះអង្គក៏បានពន្យល់ថា “អញជាព្រះ ហើយគ្មានអ្នកណាដូចជាអញសោះ”(ខ.៩)។ ព្រះដ៏ធំប្រសើរ(និក្ខមនំ ៣:១៤) ស្រឡាញ់យើងខ្លាំងណាស់ បានជាព្រះអង្គយាងមកសុគតនៅលើឈើឆ្កាង ដើម្បីទទួលបន្ទុកនៃអំពើបាបរបស់យើងទាំងស្រុង ដើម្បីឲ្យយើងអាចងាកបែរទៅរកព្រះអង្គ ហើយរួចផុតពីបន្ទុករបស់យើង ហើយថ្វាយបង្គំព្រះអង្គជារៀងរហូត!—James Banks តើព្រះទ្រង់បានបីអ្នកឆ្លងកាត់បញ្ហាជារៀងរាល់ថ្ងៃ យ៉ាងដូចម្តេចខ្លះ? តើអ្នកអាចស្វែងរកកម្លាំងជាថ្មី ពីព្រះអង្គ ក្នុងពេលនេះ ដោយរបៀបណា? ឱព្រះអង្គសង្គ្រោះដ៏ធំប្រសើរ ទូលបង្គំសូមអរព្រះគុណព្រះអង្គ ដ្បិតក្តីស្រឡាញ់ដែលព្រះអង្គមានចំពោះទូលបង្គំ មិនដែលប្រែប្រួលឡើង។ សូមព្រះអង្គជួយទូលបង្គំឲ្យមានក្តីស្រឡាញ់ចំពោះព្រះអង្គ កាន់តែជ្រាលជ្រៅឡើង។ គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ២២-២៤ និង លូកា ១២:១-៣១