បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តរបស់ខ្ញុំចុះ។ យ៉ូហាន ១៤:១៥
បន្ទាប់ពីមិត្តភក្តិម្នាក់បានបញ្ចប់មិត្តភាព ដែលយើងមានជាមួយគ្នាប្រហែល១ទសវត្សរ៍ ដោយគ្មានការបកស្រាយអ្វីសោះ ខ្ញុំក៏បានវិលត្រឡប់ទៅរកទម្លាប់ចាស់របស់ខ្ញុំវិញ ដោយជៀសវាងភាពស្និទ្ធស្នាលជាមួយអ្នកដទៃ។ ខណៈពេលដែលខ្ញុំកំពុងជម្នះការពិបាកចិត្ត ខ្ញុំក៏បានដកសៀវភៅដែលមានសន្លឹកកណ្តាចមួយក្បាល ចេញពីធ្នើរសៀវភៅ។ សៀវភៅនោះមានចំណងជើងថា សេចក្តីស្រឡាញ់ទាំង៤ ជាស្នាដៃនិពន្ធរបស់លោកស៊ី អេស លូអ៊ីស(C. S. Lewis)។ លោកលូអ៊ីស បានធ្វើការសង្កេតដ៏មានអំណាចមួយ អំពីសេចក្តីស្រឡាញ់ ដែលតម្រូវឲ្យមានភាពងាយរងគ្រោះ។ ក្នុងសៀវភៅនោះ គាត់បានលើកឡើងថា ពេលដែលមនុស្សម្នាក់ហ៊ានប្រថុយស្រឡាញ់នរណាម្នាក់ អ្នកនោះកំពុងធ្វើការវិនិយោគ ដែលគ្មានសុវត្ថិភាព។ គាត់ថា ការស្រឡាញ់អ្វីក៏ដោយ នឹងនាំឲ្យចិត្តរបស់អ្នក ត្រូវគេច្របាច់ ហើយអាចខូចខ្ទេច។ ពាក្យពេចន៍របស់គាត់ក្នុងសៀវភៅនោះ បាននាំឲ្យខ្ញុំនឹកចាំ អំពីកាលដែលព្រះយេស៊ូវបានបង្ហាញព្រះអង្គទ្រង់ជាលើកទី៣ ដល់ពួកសាវ័ក បន្ទាប់ពីព្រះអង្គបានមានព្រះជន្មរស់ឡើងវិញ(យ៉ូហាន ២១:១-១៤) បន្ទាប់ពីលោកពេត្រុសបានបដិសេធថា មិនស្គាល់ព្រះអង្គ មិនមែនតែមួយដង តែបីដង(១៨:១៥-២៧)។
ព្រះយេស៊ូវមានបន្ទូលនឹងស៊ីម៉ូន-ពេត្រុសថា “ស៊ីម៉ូនកូនយ៉ូណាសអើយ តើអ្នកស្រឡាញ់ខ្ញុំជាជាងរបស់ទាំងនេះឬអី?”(២១:១៥)
បន្ទាប់ពីព្រះយេស៊ូវបានទទួលរងការក្បត់ និងការបដិសេធន៍រួចមក ព្រះអង្គបានមានបន្ទូលទៅកាន់លោកពេត្រុស ដោយលើកទឹកចិត្តគាត់ឲ្យក្លាហាន មិនមានការភ័យខ្លាច ឲ្យមានកម្លាំង មិនមានភាពកម្សោយ ឲ្យលះបង់ប្រយោជន៍ផ្ទាល់ខ្លួន មិនអស់សង្ឃឹម។ ព្រះអង្គបានបង្ហាញសេចក្តីមេត្តា មិនមែនសេចក្តីក្រោធ ដោយបញ្ជាក់ថា ព្រះអង្គនៅតែស្រឡាញ់គាត់។
ព្រះគម្ពីរបានបង្ហាញថា “ ពេត្រុសមានចិត្តព្រួយ ដោយទ្រង់មានព្រះបន្ទូលជាគំរប់៣ដងថា តើពេញចិត្តនឹងខ្ញុំឬអីដូច្នេះ”(ខ.១៧)។ ប៉ុន្តែ ពេលដែលព្រះយេស៊ូវសួរលោកពេត្រុស ឲ្យបង្ហាញថា គាត់ពិតជាស្រឡាញ់ព្រះអង្គពិតមែន ដោយស្រឡាញ់អ្នកដទៃ(ខ.១៥-១៧) ហើយដើរតាមព្រះអង្គ(ខ.១៩) ព្រះអង្គក៏បានត្រាស់ហៅពួកសាវ័កទាំងអស់ ឲ្យស្រឡាញ់ ដោយគ្មានលក្ខខ័ណ្ឌ ទោះមានហានិភ័យយ៉ាងណាក៏ដោយ។ យើងម្នាក់ៗសុទ្ធតែត្រូវឆ្លើយ ពេលដែលព្រះយេស៊ូវសួរថា “តើអ្នកស្រឡាញ់ខ្ញុំទេ?” ចម្លើយរបស់យើង ចំពោះសំណួរនេះ នឹងមានឥទ្ធិពលមកលើរបៀបដែលយើងស្រឡាញ់អ្នកដទៃ។—Xochitl Dixon
ហេតុអ្វីព្រះដែលមានក្តីស្រឡាញ់ ត្រាស់ហៅកូនស្ងួនភ្ងារបស់ព្រះអង្គ ឲ្យស្រឡាញ់អ្នកដទៃ ដោយមិនខ្លាចឈឺចាប់? តើការប្រកបស្និទ្ធស្នាលជាមួយព្រះ អាចជួយអ្នកឲ្យស្រឡាញ់អ្នកដទៃ ដោយគ្មានការភ័យខ្លាច យ៉ាងណាខ្លះ?
ឱព្រះនៃសេចក្តីស្រឡាញ់ សូមព្រះអង្គរំលំជញ្ជាំងនីមួយៗ ដែលរារាំងទូលបង្គំ មិនឲ្យស្រឡាញ់ព្រះអង្គ និងអ្នកដទៃ ដោយគ្មានការភ័យខ្លាច ដោយចិត្តក្លាហាន ក្តីអាណិត និងការប្ដេជ្ញាចិត្ត ដែលព្រះវិញ្ញាណបណ្តាល។
គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ៩:១១ និង លូកា ១៥:១១-៣២
