អាយុគ្រាន់តែជាតួរលេខ
ដោយMarvin Williams
April 26, 2022
កុំឲ្យអ្នកណាមើលងាយអ្នក ដោយព្រោះនៅក្មេងនោះឡើយ ចូរធ្វើជាគំរូដល់ពួកអ្នកជឿ ដោយពាក្យសំដី កិរិយាប្រព្រឹត្ត សេចក្តីស្រឡាញ់ សេចក្តីជំនឿ និងសេចក្តីបរិសុទ្ធ។ ១ធីម៉ូថេ ៤:១២ គេមិនគួរបណ្តោយឲ្យភាពក្មេងវ័យ រារាំងនរណាម្នាក់មិនឲ្យមានជោគជ័យក្នុងជីវិតនោះឡើយ។ ជាក់ស្តែង មីខាយឡា(Mikaila) ជាក្មេងស្រីម្នាក់ ដែលបានទទួលជោគជ័យក្នុងវ័យ១១ឆ្នាំប៉ុណ្ណោះ។ មីខាយឡា មិនគ្រាន់តែបានដាក់តុលក់ភេសជ្ជៈទឹកក្រូចឆ្មាប៉ុណ្ណោះទេ តែផ្ទុយទៅវិញ នាងបានបើកអាជីវកម្មលក់ភេសជ្ជៈទឹកក្រូចឆ្មាវិញ។ ហាងលក់ភេសជ្ជៈទឹកក្រូចឆ្មា Me & the Bees បានចាប់ផ្តើម ដោយនាងប្រើរូបមន្តរបស់ជីដូននាង ហើយទីបំផុតនាងទទួលនូវការវិនិយោគ ជាទឹកប្រាក់ ៦ម៉ឺនដុល្លា ពីអ្នកវិនិយោគ ក្នុងកម្មវិធីទូរទស្សន៍ Shark Tank ។ នាងក៏បានធ្វើកិច្ចសន្យា ជាមួយហាងលក់ទំនិញធំមួយ ដើម្បីលក់ភេសជ្ជៈ នៅតាមសាខារបស់ហាងលក់ទំនិញធំនេះ។ ការខិតខំ និងក្តីស្រមៃរបស់មីខាយឡា បានធ្វើឲ្យខ្ញុំនឹកចាំ អំពីពាក្យទូន្មានរបស់សាវ័កប៉ុល ទៅកាន់លោកធីម៉ូថេថា “កុំឲ្យអ្នកណាមើលងាយអ្នក ដោយព្រោះនៅក្មេងនោះឡើយ ចូរធ្វើជាគំរូដល់ពួកអ្នកជឿ ដោយពាក្យសំដី កិរិយាប្រព្រឹត្ត សេចក្តីស្រឡាញ់ សេចក្តីជំនឿ និងសេចក្តីបរិសុទ្ធ”(៤:១២)។ លោកធីម៉ូថេ មិនមានវ័យក្មេងដូចមីខាយឡាទេ តែគាត់ទំនងជាសមាជិកដែលមានវ័យក្មេងជាង មនុស្សភាគច្រើន នៅក្នុងពួកជំនុំរបស់គាត់។ ហើយគាត់មានការព្រួយបារម្ភ អំពីមនុស្សដែលមានការរើសអើងមកលើគាត់។ ទោះគាត់បានទទួលការបណ្ដុះបណ្តាលផ្ទាល់ពីសាវ័កប៉ុលហើយក៏ដោយ ក៏អ្នកខ្លះនៅតែគិតថា លោកធីម៉ូថេ មិនមានវ័យចាស់ទុំល្មមនឹងដឹកនំាពួកគេទេ។ សាវ័កប៉ុលមិនបានប្រាប់គាត់ឲ្យបង្ហាញសញ្ញាប័ត្រ ឬសំបុត្របញ្ជាក់ ដល់ពួកគេនោះទេ តែបានលើកទឹកចិត្តគាត់ ឲ្យបង្ហាញភាពពេញវ័យខាងវិញ្ញាណរបស់គាត់ ដោយធ្វើជាគំរូដល់ពួកអ្នកជឿ ដោយពាក្យសំដី កិរិយាប្រព្រឹត្ត សេចក្តីស្រឡាញ់ សេចក្តីជំនឿ និងសេចក្តីបរិសុទ្ធ(ខ.១២)។ គ្មាននរណាអាចនិយាយថា គាត់មិនសក្ដិសមធ្វើជាគ្រូគង្វាលនោះឡើយ បើសិនជាគាត់មានគំរូ នៃការកោតខ្លាចព្រះនោះ។ ទោះយើងកំពុងស្ថិតក្នុងវ័យណាក៏ដោយ ក៏យើងអាចមានឥទ្ធិពលមកលើពិភពលោក ដោយធ្វើជាគំរូសម្រាប់អ្នកដទៃ ដែលយកព្រះគ្រីស្ទជាទី១ ខណៈពេលដែលព្រះអង្គប្រទានអ្វីដែលយើងត្រូវការ។ សូមព្រះអង្គកែឆ្នៃជីវិតយើង ឲ្យស្របតាមដំណឹងល្អ ដើម្បីឲ្យយើងសក្ដិសម ក្នុងការផ្សាយដំណឹងល្អដល់អ្នកដទៃ ទោះយើងមានអាយុ១៧ ឬ៧០ឆ្នាំក៏ដោយ។—Marvin Williams តើព្រះទ្រង់កំពុងជួយអ្នក ឲ្យរីកលូតលាស់ខាងវិញ្ញាណ និងមានប្រសិទ្ធភាពក្នុងការធ្វើការថ្វាយព្រះអង្គ ដោយរបៀបណាខ្លះ? ហេតុអ្វីអាយុមិនមែនជាកត្តាសំខាន់បំផុត ក្នុងការបម្រើព្រះយេស៊ូវ? ឱព្រះវរបិតា សូមព្រះអង្គអត់ទោសឲ្យទូលបង្គំ បើសិនជាទូលបង្គំមិនបានធ្វើជាគំរូល្អសម្រាប់មនុស្សជំនាន់ក្រោយ។ សូមព្រះអង្គជួយទូលបង្គំឲ្យធ្វើជាគំរូ នៃការប្តូរផ្តាច់ចំពោះព្រះយេស៊ូវ ក្នុងការនិយាយស្តី ការប្រើសេចក្តីជំនឿ និងការស្រឡាញ់អ្នកដទៃ។ គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ២៣-២៤ និង លូកា ១៩:១-២៧