ផលផ្លែដែលនាំឲ្យគេចង់ទៅរកប្រភព
ដោយElisa Morgan
May 21, 2022
តែឯផលផ្លែនៃព្រះវិញ្ញាណវិញ នោះគឺសេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត។ កាឡាទី ៥:២២-២៣ មានស្រ្តីម្នាក់ ដែលជាម្ចាស់កន្លែងមើលក្មេង បានព្យាយាមលក់ដើមប៉ែសជាច្រើនដើម។ គាត់បានគិតឃើញវិធីសាស្រ្តខុសៗគ្នា ដើម្បីលក់ដើមទាំងនោះ។ តើគាត់គួរតែយកកូនដើមប៉ែសដែលមានស្លឹកច្រើន ទៅដាក់តាំងឲ្យមានភាពទាក់ទាញ? ឬគាត់គួរតែដាក់តាំងរូបថតដើមប៉ែស ក្នុងកាតាឡុក ដោយបង្ហាញរដូវកាលខុសៗគ្នានៃការលូតលាស់របស់ដើមប៉ែស? យ៉ាងហោចណាស់ គាត់បានដឹងថា មានកត្តាអ្វីដែលពិតជាជួយឲ្យគាត់អាចលក់ដើមប៉ែសដាច់។ គឺផ្លែប៉ែស ដែលមានក្លិនក្រអូប ពណ៌លឿងទុំ និងសម្បករលោង ស្រដៀងផ្លែសូដា។ វិធីល្អបំផុត ដើម្បីលក់ដើមប៉ែស គឺត្រូវយកផ្លែប៉ែសទុំមួយផ្លែមកដាក់តាំងបង្ហាញ ដោយកាត់វាមួយចំណិត ធ្វើឲ្យទឹកវាស្រក់ចុះពីផ្លែមក ហើយឲ្យភ្ញៀវភ្លក់រស់ជាតិចំណិតផ្លែប៉ែសនោះ។ ពេលដែលពួកគេបានភ្លក់រស់ជាតិផ្លែវាហើយ ពួកគេនឹងចង់ទិញដើមរបស់វាមិនខាន។ ព្រះទ្រង់បានបង្ហាញអង្គទ្រង់ តាមរយៈផលផ្លែនៃព្រះវិញ្ញាណ នៅក្នុងអ្នកដើរតាមព្រះអង្គ ដែលមានដូចជា សេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត (កាឡាទី ៥:២២-២៣)។ ពេលណាអ្នកជឿព្រះយេស៊ូវ បង្ហាញចេញនូវផលផ្លែនៃព្រះវិញ្ញាណ អ្នកដទៃនឹងមានចិត្តចង់បានផលផ្លែទាំងនោះផងដែរ ហើយក៏នឹងស្វែងរកព្រះ ដែលជាប្រភពនៃផលផ្លែទាំងនោះ ដែលមានភាពទាក់ទាញយ៉ាងខ្លាំង។ ផលផ្លែនៃព្រះវិញ្ញាណជាលទ្ធផលដែលកើតចេញពីការប្រកបស្និទ្ធស្នាលជាមួយព្រះ ដែលនាំឲ្យយើងទទួលឥទ្ធិពលនៃព្រះវិញ្ញាណបរិសុទ្ធ ក្នុងជីវិតយើង។ ផលផ្លែនៃព្រះវិញ្ញាណ ជាកត្តានាំឲ្យអ្នកដទៃស្គាល់ព្រះ។ ការបង្ហាញចេញនូវផលផ្លែនៃព្រះវិញ្ញាណ គឺប្រៀបដូចជាការប្រកាសដល់លោកិយ ដែលកំពុងស្រេកឃ្លានថា “ក្នុងព្រះយេស៊ូវ មានអាហារ! មានជីវិត! សូមចាកចេញពីភាពហត់នឿយ និងការបាក់ទឹកចិត្ត ហើយចូលមកជួបព្រះអង្គ!”។—Elisa Morgan តើមានអ្វីនាំអ្នកចូលទៅរកព្រះយេស៊ូវ កាលពីដំបូង? តើអ្នកបង្ហាញចេញនូវផលផ្លែនៃព្រះវិញ្ញាណក្នុងជីវិតអ្នក ដូចម្តេចខ្លះ ដើម្បីឲ្យអ្នកដទៃមានចិត្តចង់ទៅរកព្រះ ដែលជាប្រភពនៃផលផ្លែទាំងនោះ? ឱព្រះអម្ចាស់ សូមព្រះវិញ្ញាណព្រះអង្គ ជួយទូលបង្គំឲ្យមានផលផ្លែនៃព្រះវិញ្ញាណ ក្នុងជីវិតទូលបង្គំ ដើម្បីឲ្យអ្នកដទៃអាចឃើញព្រះអង្គ ហើយចង់ឲ្យព្រះអង្គគង់នៅក្នុងជីវិតពួកគេផងដែរ។ To learn more about the fruit of the Spirit, visit ODBU.org/NT050. គម្រោងអានព្រះគម្ពីររយៈពេល១ឆ្នាំ : ១កូរិនថូស ១៣-១៥ និង យ៉ូហាន ៧:១-២៧