យើងក៏មានសេចក្តីក្លាហាន ដល់ទ្រង់យ៉ាងដូច្នេះដែរ គឺថា បើយើងនឹងសូមអ្វី ដែលត្រូវតាមព្រះហឫទ័យទ្រង់ នោះទ្រង់នឹងទទួលព្រម។ ១យ៉ូហាន ៥:១៤
កាលពីឆ្នាំ២០១៨ មានការស្រាវជ្រាវមួយ អំពីមនុស្សពេញវ័យ នៅចក្រភពអង់គ្លេស បានរកឃើញថា ជាមធ្យម “ពួកគេបានបើកមើលទូរស័ព្ទរបស់ខ្លួន រៀងរាល់១២នាទីម្តង ជារៀងរាល់ថ្ងៃ លើកលែងតែនៅពេលពួកគេដេកលក់”។ ប៉ុន្តែ និយាយដោយស្មោះត្រង់ទៅ ខ្ញុំយល់ឃើញថា ស្ថិតិនេះហាក់ដូចជាមានតួលេខតិចពេកហើយ ព្រោះខ្ញុំដឹងថា ខ្ញុំបានបើកមើលទូរស័ព្ទរបស់ខ្ញុំញឹកញាប់ប៉ុណ្ណា ដើម្បីរកមើលចម្លើយ សម្រាប់សំណួរណាមួយ នៅក្នុងGoogle ឬឆ្លើយតបសារ ទទួលការហៅចូល ឬធ្វើការហៅចេញ និងបើកមើលសារអេឡិចត្រូនិក ជារៀងរាល់ថ្ងៃ។ មនុស្សជាច្រើនបានមើលទូរស័ព្ទ ឬឧបករណ៍ទំនាក់ទំនងរបស់យើងជាទៀងទាត់ ដោយទុកចិត្តថា ឧបករណ៍នោះនឹងផ្តល់ឲ្យយើង នូវអ្វីដែលយើងត្រូវការ ដើម្បីឲ្យយើងមានរបៀបរៀបរយ បានទទួលព័ត៌មានថ្មីៗ និងទំនាក់ទំនងជាមួយអ្នកដទៃ។
ក្នុងនាមយើងជាអ្នកជឿព្រះយេស៊ូវ យើងមានប្រភពធនធានមួយ ដែលល្អជាងទូរស័ព្ទឆ្លាតវៃរបស់យើងរាប់លានដង។ ព្រះទ្រង់ស្រឡាញ់ និងយកព្រះទ័យទុកដាក់ចំពោះយើង ហើយសព្វព្រះទ័យឲ្យយើងចូលមករកព្រះអង្គ ដើម្បីទូលសូមព្រះអង្គបំពេញតម្រូវការយើង។ ព្រះគម្ពីរបានចែងថា ពេលណាយើងអធិស្ឋាន យើងអាចទុកចិត្តថា “បើយើងនឹងសូមអ្វី ដែលត្រូវតាមព្រះហឫទ័យទ្រង់ នោះទ្រង់នឹងទទួលព្រម” ១យ៉ូហាន ៥:១៤។ ពេលណាយើងអានព្រះគម្ពីរ ហើយទុកដាក់ព្រះបន្ទូលព្រះអង្គក្នុងចិត្តយើង នោះយើងអធិស្ឋានដោយជំនឿ ទូលសូមអ្វីដែលយើងដឹងថា ព្រះអង្គសព្វព្រះទ័យឲ្យយើងទូលសូម ដែលរួមមាន សន្តិភាពក្នុងចិត្ត ប្រាជ្ញា និងជំនឿ ដែលព្រះអង្គនឹងប្រទានតាមតម្រូវការរបស់យើង(ខ.១៥)។
ជួនកាល យើងមានអារម្មណ៍ថា ព្រះអង្គហាក់ដូចជាមិនបានស្តាប់ពាក្យយើងអធិស្ឋាន ព្រោះស្ថានភាពរបស់យើងនៅតែមិនផ្លាស់ប្តូរ។ តែយើងនឹងមានជំនឿលើព្រះកាន់តែខ្លាំង ពេលណាយើងងាកទៅរកព្រះអង្គ ជាទៀងទាត់ ដើម្បីសូមជំនួយ ក្នុងគ្រប់កាលៈទេសៈ(ទំនុកដំកើង ១១៦:២)។ ការនេះជួយឲ្យយើងចម្រើនឡើង ក្នុងជំនឿ ដោយទុកចិត្តថា ទោះយើងមិនអាចទទួលបានអ្វីដែលយើងចង់បានក៏ដោយ ព្រះអង្គសន្យាថា នឹងបំពេញតម្រូវការយើង តាមពេលវេលាដែលព្រះអង្គកំណត់យ៉ាងល្អឥតខ្ចោះ។—Kimya Loder
តើអ្នកខ្វះចិត្តក្លាហាន ក្នុងការចូលទៅរកព្រះ ដោយការអធិស្ឋាន នៅពេលណា? តើធ្វើដូចម្តេច ឲ្យអ្នកមានទំនុកចិត្ត និងចិត្តដែលចង់អធិស្ឋាន?
ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ ដែលបានបើកផ្លូវឲ្យទូលបង្គំ ចូលទៅរកព្រះអង្គ ដោយជំនឿ ដោយទុកចិត្តថា ព្រះអង្គអាចបំពេញតម្រូវការទូលបង្គំ តាមបំណងព្រះទ័យព្រះអង្គ។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ២៣-២៤ និង យ៉ូហាន ១៥
