ចូរទៅផ្ទះទៅ ហើយប្រាប់បងប្អូនឯងពីការធំទាំងម៉្លេះ ដែលព្រះអម្ចាស់បានមេត្តាប្រោសដល់ឯងវិញ។ ម៉ាកុស ៥:១៩
“គ្មានកន្លែងណាល្អដូចផ្ទះទេ។ គ្មានកន្លែងណាល្អដូចផ្ទះទេ”។ នេះជាពាក្យសម្ដី ដែលគេមិនអាចបំភ្លេចបាន ដែលតួអង្គដូរ៉ូស៊ី(Dorothy) បាននិយាយចេញមក ក្នុងរឿង គ្រូសីលនៃទីក្រុងអូហ្ស ហើយបានបង្កប់នូវរឿងដ៏មានន័យមួយ ដែលគេឃើញមាន នៅក្នុងខ្សែភាពយន្តល្បីៗជាច្រើន ដែលរាប់ចាប់តាំងពីរឿងសង្គ្រាមភពផ្កាយ ដល់រឿងស្តេចតោ។ គេបានហៅរឿងនោះថា “ការធ្វើដំណើររបស់វីរបុរស”។ និយាយឲ្យខ្លី តួអង្គដែលជាមនុស្សសាមញ្ញ កំពុងរស់នៅក្នុងជីវិតដ៏សាមញ្ញ ហើយក៏បានធ្វើដំណើរផ្សងព្រេងដ៏អស្ចារ្យ។ គាត់បានចាកចេញពីផ្ទះ ហើយធ្វើដំណើរទៅកាន់តំបន់ផ្សេង ដែលមានការល្បងល និងការលំបាកជាច្រើន ក៏ដូចជាមានអ្នកបង្រៀនគាត់ និងមនុស្សអាក្រក់ កំពុងរង់ចាំគាត់។ បើគាត់អាចឆ្លងផុតការសាកល្បង ហើយបង្ហាញចេញនូវវីរភាពរបស់គាត់ នោះនៅដំណាក់កាលចុងក្រោយ គាត់ត្រូវត្រឡប់មកផ្ទះវិញ ដោយនាំយករឿងជាច្រើនមកនិទានឲ្យគេស្តាប់ ហើយទទួលបានប្រាជ្ញា។ ដំណាក់កាលចុងក្រោយសំខាន់ណាស់។
រឿងនេះបានធ្វើឲ្យខ្ញុំនឹកចាំ អំពីរឿងបុរសម្នាក់ ដែលត្រូវអារក្សចូល។ អ្វីដែលគួរឲ្យចាប់អារម្មណ៍ក្នុងរឿងនោះ គឺបុរសនោះបានអង្វរព្រះយេស៊ូវ សូមឲ្យគាត់ទៅជាមួយព្រះអង្គ(ម៉ាកុស ៥:១៨)។ តែព្រះយេស៊ូវបានប្រាប់គាត់ ឲ្យត្រឡប់ទៅផ្ទះ (ខ.១៩)។ ការធ្វើដំណើររបស់បុរសម្នាក់នេះ សំខាន់នៅត្រង់ចំណុចដែលថា គាត់ត្រូវវិលត្រឡប់ទៅផ្ទះ ទៅរកអ្នកដែលស្គាល់គាត់ ដើម្បីប្រាប់គេ អំពីរឿងដ៏អស្ចារ្យនេះ។
ព្រះទ្រង់បានត្រាស់ហៅយើង តាមរបៀបខុសៗគ្នា ឲ្យធ្វើកិច្ចការផ្សេងគ្នា។ តែអ្នកខ្លះចាំបាច់ត្រូវវិលត្រឡប់ទៅផ្ទះ ដើម្បីប្រាប់រឿង ឬទីបន្ទាល់របស់យើង ដល់អ្នកដែលស្គាល់ខ្លួន។ សម្រាប់អ្នកខ្លះ ផ្ទះគឺជាកន្លែងល្អបំផុត ដែលត្រូវថ្លែងប្រាប់រឿងនៃសេចក្តីសង្គ្រោះ។—John Blasé
ចូរគិតអំពីមនុស្សដែលអ្នកស្គាល់។ តើនរណាខ្លះចាំបាច់ត្រូវស្តាប់អ្នកចែកចាយ អំពីការអ្វីដែលព្រះបានធ្វើសម្រាប់អ្នក? តើការបោះជំហានទីមួយ ក្នុងការធ្វើដំណើរខាងវិញ្ញាណនោះ មានលក្ខណៈដូចម្តេច?
ឱព្រះយេស៊ូវ សូមព្រះអង្គប្រទានទូលបង្គំនូវចិត្តក្លាហាន ដើម្បីប្រាប់គេ អំពីកិច្ចការដ៏អស្ចារ្យដែលព្រះអង្គបានធ្វើ។ គឺមិនគ្រាន់តែចែកចាយ ដល់អ្នកដែលទូលបង្គំមិនស្គាល់ប៉ុណ្ណោះទេ តែដល់អ្នកផ្ទះទូលបង្គំផងដែរ។
Read Pray First! The Power of Prayer in Sharing the Gospel at DiscoverySeries.org/Q0219.
គម្រោងអានព្រះគម្ពីររយៈពេល១ឆ្នាំ : អែសរ៉ា ១-២ និង យ៉ូហាន ១៩:២៣-៤២
