ឱព្រះវរបិតាអើយ សូមអត់ទោសដល់អ្នកទាំងនេះផង ដ្បិតគេមិនដឹងជាគេធ្វើអ្វីទេ។ លូកា ២៣:៣៤
អ្នកស្រីឆាឡា(Charla) បានដឹងខ្លួនថា គាត់ជិតដល់ពេលលាចាកលោកហើយ។ ខណៈពេលដែលគាត់កំពុងគេងនៅលើគ្រែ ក្នុងមន្ទីរពេទ្យ គ្រូពេទ្យផ្នែកវះកាត់បាននាំពេទ្យក្មេងៗមួយក្រុមមកធ្វើកម្មសិក្សា នៅក្នុងបន្ទប់របស់គាត់។ ក្នុងរយៈពេលប៉ុន្មាននាទីនោះ វេជ្ជបណ្ឌិតមិនបានអើពើចំពោះអ្នកស្រីឆាឡាសោះ ខណៈពេលដែលគាត់កំពុងរៀបរាប់អំពីស្ថានភាពជំងឺរបស់គាត់ ដែលបានឈានដល់ដំណាក់កាលចុងក្រោយ។ ទីបំផុត គ្រូពេទ្យរូបនោះក៏បានងាកមករកគាត់ ហើយសួរសុខទុក្ខគាត់។ អ្នកស្រីឆាឡាក៏បានញញឹមទាំងពិបាក ហើយក៏បាននិយាយយ៉ាងសុភាព ទៅកាន់មនុស្សមួយក្រុមនោះ អំពីក្តីសង្ឃឹម និងសន្តិភាព ដែលគាត់បានរកឃើញក្នុងព្រះយេស៊ូវ។
កាលពីជាង២ពាន់ឆ្នាំមុន ព្រះកាយដ៏ខ្ទេចខ្ទាំរបស់ព្រះយេស៊ូវបានព្យួរនៅលើឈើឆ្កាង ដោយក្តីអាម៉ាស់ នៅចំពោះមុខហ្វូងមនុស្ស ដែលកំពុងឈរមើលព្រះអង្គ។ តើព្រះអង្គបានស្តីបន្ទោសពួកមនុស្ស ដែលបានធ្វើទារុណកម្មមកលើព្រះអង្គទេ? ទេ។ ផ្ទុយទៅវិញព្រះអង្គមានបន្ទូលថា “ឱព្រះវរបិតាអើយ សូមអត់ទោសដល់អ្នកទាំងនេះផង ដ្បិតគេមិនដឹងជាគេធ្វើអ្វីទេ”(លូកា ២៣:៣៤)។ ព្រះអង្គបានអធិស្ឋានឲ្យខ្មាំងសត្រូវរបស់ព្រះអង្គ ទោះពួកគេបានកាត់ទោស និងឆ្កាងព្រះអង្គ ដោយអយុត្តិធម៌ក៏ដោយ។ ក្រោយមក ព្រះអង្គក៏បានមានបន្ទូលទៅកាន់ឧក្រិដ្ឋជនម្នាក់ ដែលជាប់ឆ្កាងជាមួយព្រះអង្គថា ដោយសារជំនឿរបស់គាត់ នោះគាត់នឹងបានទៅនៅស្ថានបរមសុខជាមួយព្រះអង្គដែរ(ខ.៤៣)។ ក្នុងពេលដ៏ឈឺចាប់ និងអាម៉ាស់នោះ ព្រះយេស៊ូវបានសម្រេចព្រះទ័យមានបន្ទូលអំពីក្តីសង្ឃឹម និងជីវិត ដោយបង្ហាញក្តីស្រឡាញ់ដល់មនុស្សទាំងអស់។
ខណៈពេលដែលអ្នកស្រីឆាឡាកំពុងនិយាយបញ្ចប់ការចែកចាយ អំពីព្រះគ្រីស្ទ ដល់អ្នកស្តាប់របស់គាត់ គាត់ក៏បានសួរទៅវេជ្ជបណ្ឌិតវិញ។ គាត់បានមើលទៅវេជ្ជបណ្ឌិតដែលកំពុងមានទឹកភ្នែករលីងរលោង ហើយសួរថា “លោកគ្រូសុខសប្បាយទេ?” ដោយព្រះគុណ និងអំណាចរបស់ព្រះគ្រីស្ទ គាត់បានចែកចាយ ព្រះបន្ទូលនៃជីវិត ដោយបង្ហាញក្តីស្រឡាញ់ និងការយកចិត្តទុកដាក់ ចំពោះគ្រូពេទ្យ និងអ្នកដទៃទៀត នៅក្នុងបន្ទប់នោះ។ ទោះយើងស្ថិតក្នុងស្ថានភាពពិបាកយ៉ាងណាក៏ដោយ ក្នុងពេលសព្វថ្ងៃ និងនៅពេលអនាគត ចូរយើងទុកចិត្តថា ព្រះទ្រង់នឹងប្រទានសេចក្តីក្លាហាន ឲ្យយើងចែកចាយព្រះបន្ទូលនៃជីវិត ដោយសេចក្តីស្រឡាញ់។—Tom Felten
តើអ្នកកំពុងជួបរឿងដ៏ពិបាក និងអាម៉ាស់អ្វីខ្លះ ក្នុងរយៈពេលប៉ុន្មានថ្ងៃនេះ? តើអ្នកអាចពឹងផ្អែកព្រះយេស៊ូវ និងអំណាចចេស្តាព្រះអង្គយ៉ាងដូចម្តេចខ្លះ ខណៈពេលដែលអ្នកចែកចាយព្រះបន្ទូលនៃជីវិត ក្នុងរដូវកាលដ៏ពិបាកនេះ?
ឱព្រះយេស៊ូវ ទូលបង្គំសូមសរសើរដំកើងព្រះអង្គ សម្រាប់គំរូនៃការប្រទានព្រះគុណ និងការបន្ទាបព្រះកាយ។ សូមព្រះអង្គជួយទូលបង្គំឲ្យនិយាយទៅកាន់មនុស្សដែលគ្មានក្តីស្រឡាញ់ ដោយបង្ហាញឲ្យគេឃើញព្រះគុណ និងក្តីស្រឡាញ់ព្រះអង្គ។
គម្រោងអានព្រះគម្ពីររយៈពេល១ឆ្នាំ : នេហេមា ១០-១១ និង កិច្ចការ ៤:១-២២
