កុំឲ្យជំពាក់អ្វីដល់អ្នកណាឡើយ ជំពាក់បានតែសេចក្តីស្រឡាញ់ ដល់គ្នាទៅវិញទៅមកប៉ុណ្ណោះ។ រ៉ូម ១៣:៨
ឆ្កែ១ក្បាលឈ្មោះប៊ីលី(Billy) ជាឆ្កែដែលស្រឡាញ់ និងស្មោះត្រង់ចំពោះម្ចាស់វា។ វាបានក្លាយជាឆ្កែដែលមានឈ្មោះល្បី ក្នុងអ៊ីនធឺណិត កាលពីឆ្នាំ២០២០។ លោករ៉ាស់ស៊ល(Russell) ដែលជាម្ចាស់របស់វា បានជួបគ្រោះថ្នាក់ ដែលបណ្តាលឲ្យបាក់កជើង ដូចនេះ គាត់ក៏បានប្រើឈើច្រត់ដើម្បីដើរពីកន្លែងមួយ ទៅកន្លែងមួយ។ មិនយូរប៉ុន្មាន ឆ្កែ១ក្បាលនេះក៏បានចាប់ផ្តើមដើរខ្ញើចៗ ពេលវាដើរជាមួយម្ចាស់វា។ ដោយការព្រួយបារម្ភ លោករ៉ាស់ស៊លក៏បានយកវាទៅពេទ្យសត្វ។ ពេទ្យសត្វក៏បានប្រាប់ថា ជើងវាមិនមានកើតអ្វីទេ។ វារត់លេងជាធម្មតា ពេលណាវានៅតែម្នាក់ឯង។ ម្ចាស់វាក៏ដឹងថា តាមពិត សត្វឆ្កែនេះបានធ្វើពុតជាបាក់ជើង ពេលណាវាដើរជាមួយគាត់។ វាប្រហែលជាកំពុងតែព្យាយាមរួមសុខរួមទុក្ខជាមួយម្ចាស់វាហើយ!
ការរួមសុខរួមទុក្ខជាមួយអ្នកដទៃ ជាប្រធានបទដ៏សំខាន់ នៅក្នុងការបង្រៀនរបស់សាវ័កប៉ុល ទៅកាន់ពួកជំនុំនៅទីក្រុងរ៉ូម។ គាត់បានបង្រួមក្រឹត្យវិន័យ៥ចុងក្រោយ ក្នុងក្រឹត្យវិន័យទាំង១០ប្រការ មកនូវត្រឹមសេចក្តីបង្គាប់ថា “ចូរស្រឡាញ់អ្នកជិតខាងដូចខ្លួនឯង”(រ៉ូម ១៣:៩)។ យើងក៏អាចមើលឃើញសារៈសំខាន់នៃការរួមសុខរួមទុក្ខជាមួយអ្នកដទៃ ក្នុងខ.៨ ដែលចែងថា “កុំឲ្យជំពាក់អ្វីដល់អ្នកណាឡើយ ជំពាក់បានតែសេចក្តីស្រឡាញ់ ដល់គ្នាទៅវិញទៅមកប៉ុណ្ណោះ”។
អ្នកនិពន្ធឈ្មោះ ចេននី អាល់ប័រ(Jenny Albers)បានឲ្យយោបល់ថា “ពេលនរណាម្នាក់មានភាពប្រេះបែក ចូរកុំព្យាយាមជួសជុលគាត់។ (អ្នកមិនអាចជួសជុលគាត់បានឡើយ)។ ពេលនរណាម្នាក់កំពុងឈឺចាប់ ចូរកុំព្យាយាមដកការឈឺចាប់របស់គាត់ចេញ។ (អ្នកមិនអាចធ្វើបានឡើយ)។ ផ្ទុយទៅវិញ ចូរស្រឡាញ់ពួកគេ ដោយដើរជាមួយពួកគេ ក្នុងការឈឺចាប់នោះ។(អ្នកអាចធ្វើបាន)។ ពីព្រោះ ជួនកាល ពួកគេគ្រាន់តែត្រូវការដឹងថា ពួកគេមិនឯកោឡើយ”។
ដោយសារព្រះយេស៊ូវជាព្រះអង្គសង្គ្រោះយើង ទ្រង់ដើរជាមួយយើង ក្នុងពេលយើងឈឺចាប់ នោះយើងអាចដឹងថា ការដើរជាមួយអ្នកដទៃ មានលក្ខណៈដូចម្តេច។—Anne Cetas
តើនរណាខ្លះត្រូវការឲ្យអ្នកដើរជាមួយ ក្នុងសប្តាហ៍នេះ? តើព្រះទ្រង់ប្រហែលជាសព្វព្រះទ័យ ឲ្យដើរជាមួយពួកគេ យ៉ាងដូចម្តេចខ្លះ?
ឱព្រះអម្ចាស់ សូមព្រះអង្គបើកភ្នែកទូលបង្គំ ឲ្យឃើញតម្រូវការរបស់មនុស្សនៅជុំវិញទូលបង្គំ។ សូមជួយទូលបង្គំឲ្យរស់នៅជាមិត្តភក្តិដែលមានក្តីស្រឡាញ់។
គម្រោងអានព្រះគម្ពីររយៈពេល១ឆ្នាំ : យ៉ូប ៥-៧ និង កិច្ចការ ៨:១-២៥
