ការអ្វីដែលត្រូវធ្វើក៏ដោយ ចូរធ្វើឲ្យអស់ពីចិត្ត ទុកដូចជាធ្វើថ្វាយដល់ព្រះអម្ចាស់ មិនមែនដល់មនុស្សទេ។ កូល៉ុស ៣:២៣
ខ្ញុំធ្លាប់និពន្ធអត្ថបទ សម្រាប់ទស្សនាវដី្តមួយ ដែលខ្ញុំបានចាត់ទុកជាសៀវភៅដ៏សំខាន់ ដូចនេះ ខ្ញុំក៏បានព្យាយាមសរសេរអត្ថបទឲ្យបានល្អបំផុត តាមដែលអាចធ្វើទៅបាន សម្រាប់អ្នកកែសម្រួលអត្ថបទជាន់ខ្ពស់។ ខ្ញុំមានអារម្មណ៍ថា ខ្ញុំកំពុងទទួលរងសម្ពាធ ដែលជំរុញឲ្យធ្វើតាមស្តង់ដាររបស់គាត់ ដូចនេះ ខ្ញុំក៏ចេះតែបន្តសរសេរឡើងវិញ នូវគំនិត និងយោបល់របស់ខ្ញុំ។ ប៉ុន្តែ តើខ្ញុំកំពុងមានបញ្ហាអ្វីពិតប្រាកដ? តើប្រធានបទដែលពិបាកសរសេរ ជាបញ្ហាដែលខ្ញុំកំពុងជួបឬ? ឬខ្ញុំបារម្ភអំពីខ្លួនឯងខ្លាំងពេក បានជាខ្ញុំសួរខ្លួនឯងថា តើអ្នកកែសម្រួលពេញចិត្តនឹងអត្ថបទរបស់ខ្ញុំ ហើយថែមទាំងសប្បាយចិត្តនឹងខ្ញុំដែរឬទេ?
ពេលណាយើងមានការព្រួយបារម្ភ អំពីការងាររបស់យើង ចូរយើងមើលការបង្រៀនរបស់សាវ័កប៉ុល។ ក្នុងសំបុត្រដែលគាត់សរសេរផ្ញើទៅពួកជំនុំ នៅទីក្រុងកូល៉ុស គាត់បានជំរុញអ្នកជឿ ឲ្យធ្វើការ មិនមែនដើម្បីផ្គាប់ចិត្តមនុស្ស តែផ្គាប់ចិត្តព្រះវិញ។ គឺដូចដែលគាត់បានមានប្រសាសន៍ថា “ការអ្វីដែលត្រូវធ្វើក៏ដោយ ចូរធ្វើឲ្យអស់ពីចិត្ត ទុកដូចជាធ្វើថ្វាយដល់ព្រះអម្ចាស់ មិនមែនដល់មនុស្សទេ ដោយដឹងថា អ្នករាល់គ្នានឹងទទួលរង្វាន់ជាមរដកអំពីព្រះអម្ចាស់មក ដ្បិតអ្នករាល់គ្នាជាអ្នកបំរើរបស់ព្រះគ្រីស្ទជាព្រះអម្ចាស់”(កូល៉ុស ៣:២៣-២៤)។
ចូរយើងជញ្ជឹងគិត អំពីប្រាជ្ញាដែលព្រះទ្រង់បានប្រទាន ក្នុងបទគម្ពីរនេះ ដើម្បីឲ្យយើងអាចឈប់ព្យាយាមផ្គាប់ចិត្តចៅហ្វាយនាយ នៅលើផែនដីនេះ។ ជាការពិតណាស់ យើងត្រូវគោរពពួកគេ ក្នុងនាមពួកគេជាមនុស្ស ហើយខិតខំធ្វើការឲ្យបានល្អបំផុត សម្រាប់ពួកគេ។ ប៉ុន្តែ បើយើងធ្វើការ “ដើម្បីផ្គាប់ចិត្តព្រះអម្ចាស់” ដោយសូមព្រះអង្គដឹកនាំ និងប្រទានពរដល់ការងារយើង ព្រះអង្គនឹងបញ្ចេញពន្លឺ តាមរយៈការប្រឹងប្រែងរបស់យើង។ តើយើងនឹងបានអ្វីជារង្វាន់? សម្ពាធការងាររបស់យើងនឹងថយចុះ ហើយកិច្ចការរបស់យើងក៏បានសម្រេច។ លើសពីនេះទៀត នៅថ្ងៃមួយ យើងនឹងបានឮព្រះអង្គមានបន្ទូលថា “ប្រពៃហើយ បាវល្អស្មោះត្រង់អើយ”។—Patricia Raybon
ក្នុងការងាររបស់អ្នក តើអ្នកបានទទួលរងសម្ពាធឲ្យផ្គាប់ចិត្តអ្នកដទៃ ឬខ្លួនឯង? តើការងាររបស់អ្នកនឹងមានការចម្រើនឡើងយ៉ាងណា បើអ្នកធ្វើការ “ដើម្បីផ្គាប់ចិត្តព្រះអម្ចាស់”?
ឱព្រះវរបិតា ដែលគង់នៅស្ថានសួគ៌ ខណៈពេលដែលទូលបង្គំទទួលសម្ពាធការងារ ទូលបង្គំងាយនឹងភ្លេចថា ទូលបង្គំកំពុងធ្វើការថ្វាយព្រះអង្គ។ សូមព្រះអង្គបង្វែរចិត្ត និងគំនិតទូលបង្គំ ដើម្បីឲ្យទូលបង្គំបានយកព្រះអង្គជាទីមួយ ក្នុងកិច្ចការទាំងអស់ដែលទូលបង្គំធ្វើ។
គម្រោងអានព្រះគម្ពីររយៈពេល១ឆ្នាំ : យ៉ូប ១៧-១៩ និង កិច្ចការ ១០:១-២៣
