ដ្បិតរាល់វេលាណា ដែលអ្នករាល់គ្នាបរិភោគនំបុ័ងនេះ ហើយផឹកពីពែងនេះ នោះឈ្មោះថាសំដែងពីសេចក្តីសុគតរបស់ផងព្រះអម្ចាស់ ដរាបដល់ទ្រង់យាងមក។ ១កូរិនថូស ១១:២៦
ពេលដែលយានអវកាសអាប៉ូឡូទី១១ បានចុះចតនៅលើសមុទ្រនៃភាពស្ងប់ស្ងាត់ នៃស្ថានព្រះច័ន្ទ នៅថ្ងៃទី២០ កក្កដា ឆ្នាំ១៩៦៩ អវកាសយានិក ដែលជាអ្នកដំណើរអវកាស បានចំណាយពេលសម្រាកមួយភ្លែត ដើម្បីឲ្យមានភាពធូរស្បើយ ពីការធ្វើដំណើរ មុននឹងបោះជំហាន ចូលទៅក្នុងផ្ទៃខាងលើនៃស្ថានព្រះច័ន្ទជាលើកទី១។ លោក ប៊ូហ្ស អាល់ឌីន(Buzz Aldrin) ដែលជាអវកាសយានិក បានទទួលការអនុញ្ញាត ឲ្យយកនំប៉័ង និងស្រាទំពាំងបាយជូរ មកជាមួយ ដើម្បីឲ្យគាត់អាចធ្វើពិធីលៀងព្រះអម្ចាស់។ បន្ទាប់ពីគាត់បានអានព្រះគម្ពីរហើយ គាត់ក៏បានបរិភោគនំប៉័ង និងស្រាទំពាំងបាយជូរ ជាហារដំបូងបំផុត ដែលមនុស្សជាតិបរិភោគ នៅលើស្ថានព្រះច័ន្ទ។ ក្រោយមក គាត់ក៏បានសរសេរថា “ខ្ញុំបានចាក់ស្រាទំពាំងបាយជូរ ចូលទៅក្នុងពែង ដែលពួកជំនុំខ្ញុំបានឲ្យមកខ្ញុំ។ ដោយសារស្ថានព្រះច័ន្ទមានទំនាញតិចជាងផែនដី៦ដង នោះស្រាទំពាំងបាយជូរបានធ្លាក់ចូលទៅក្នុងពែងគាត់ ដោយចំកោងខ្លួនយឺតៗ ឡើងទៅលើយ៉ាងស្រស់ស្អាត នៅចំហៀងពែង”។ លោកអាល់ឌីនបានធ្វើពិធីលៀងព្រះអម្ចាស់ នៅលើស្ថានព្រះច័ន្ទ ដោយអំណរ ដែលជាការប្រកាសថា គាត់បានជឿលើការលះបង់របស់ព្រះគ្រីស្ទនៅលើឈើឆ្កាង និងការធានាអំពីការយាងមករបស់ព្រះអង្គ ជាលើកទី២។
សាវ័កប៉ុលបានលើកទឹកចិត្តយើងឲ្យនឹកចាំ អំពីរបៀបដែលព្រះយេស៊ូវបានអង្គុយជាមួយពួកសាវ័កព្រះអង្គ នៅពេលយប់ដែលគេបានក្បត់ទ្រង់(១កូរិនថូស ១១:២៣)។ ព្រះយេស៊ូវបានប្រៀបប្រដូចព្រះកាយព្រះអង្គ ទៅនឹងនំប៉័ង(ខ.២៤)។ ព្រះអង្គបានប្រកាសថា ស្រាទំពាំងបាយជូរ ជានិមិត្តរូបនៃ “សេចក្តីសញ្ញាថ្មី” ដែលធានានូវការអត់ទោសបាប និងសេចក្តីសង្គ្រោះ តាមរយៈព្រះលោហិតព្រះអង្គ ដែលបានហូរនៅលើឈើឆ្កាង(ខ.២៥)។ ពេលណាយើងធ្វើពិធីលៀងព្រះអម្ចាស់ គឺយើងកំពុងប្រកាសថា យើងមានជំនឿលើការលះបង់របស់ព្រះយេស៊ូវ និងមានសង្ឃឹមថា ព្រះអង្គនឹងយាងមកជាលើកទី២ តាមព្រះបន្ទូលសន្យា(ខ.២៦)។
ទោះយើងនៅទីណាក៏ដោយ យើងនៅតែអាចប្រកាសថា យើងជឿព្រះយេស៊ូវជាអង្គសង្គ្រោះតែមួយ ដែលបានមានព្រះជន្មរស់ឡើងវិញ ហើយប្រកាសថា ព្រះអង្គនឹងយាងត្រឡប់មកវិញ។—Xochitl Dixon
តើមានអ្វីរារាំងអ្នក មិនឲ្យធ្វើពិធីលៀងព្រះអម្ចាស់ ដើម្បីនឹកចាំអំពីការសុគតរបស់ព្រះគ្រីស្ទ? តើអ្នកមានអារម្មណ៍យ៉ាងណា ពេលដែលបានដឹងថា បងប្អូនរួមជំនឿម្នាក់បានធ្វើពិធីលៀងព្រះអម្ចាស់នៅស្ថានព្រះច័ន្ទ ដើម្បីថ្វាយព្រះកិត្តិនាមដល់ព្រះយេស៊ូវ។
ឱព្រះយេស៊ូវ សូមព្រះអង្គជួយទូលបង្គំ ឲ្យរស់នៅ ដោយចិត្តក្លាហានថ្វាយព្រះអង្គ រហូតដល់ព្រះអង្គយាងមកវិញ!
គម្រោងអានព្រះគម្ពីររយៈពេល១ឆ្នាំ : យ៉ូប ២០-២១ និង កិច្ចការ ១០:២៤-៤៨
