ការប្រទះឃើញដ៏អស្ចារ្យ
ដោយTom Felten
July 20, 2022
ខ្ញុំបានប្រទះឃើញគម្ពីរក្រឹត្យវិន័យ នៅក្នុងព្រះវិហារនៃព្រះយេហូវ៉ា។ ២ពង្សាវតាក្សត្រ ២២:៨ កាលជែននីហ្វ័រ(Jennifer) លឹបទឹកកម្សាន្ត នៅឆ្នាំ២០២១ ភ្នែករបស់គាត់បានផ្ដោតទៅលើដបតូចមួយ មានពណ៌បៃតង នៅបាតទន្លេ។ នាងក៏បានយកវាឡើងមកលើគោក ហើយក៏បានពិពណ៌នាថា វាជាការរើសបានដ៏កម្របំផុត ក្នុងជីវិតនាង។ ក្នុងដបនោះ មានសំបុត្រមួយ ដែលយុវជនម្នាក់បានសរសេរ នៅថ្ងៃខួបកំណើតរបស់ខ្លួន ក្នុងឆ្នាំ១៩២៦! ក្នុងសំណេររបស់គាត់ មានការស្នើឲ្យអ្នកណាដែលរើសបានសំបុត្រនោះ យកវាមកប្រគល់ឲ្យគាត់វិញ។ ជែននីហ្វ័រក៏បានប្រើហ្វេសប៊ុក ដើម្បីស្វែងរកទីតាំងរបស់សមាជិកគ្រួសាររបស់យុវជននោះ។ ទោះគាត់បានលាចាកលោកនៅឆ្នាំ១៩៩៥ក៏ដោយ ក៏សំបុត្រដ៏ខ្លីដែលបានកប់ក្នុងដប ក្នុងបាតទន្លេ បាននាំមកនូវភាពសប្បាយរីករាយដល់ជែននីហ្វ័រ និងក្រុមគ្រួសារគាត់។ ក្នុងបទគម្ពីរ២ពង្សាវតាក្សត្រ ២២:៨ លោកហ៊ីលគីយ៉ា បានរកឃើញ “គម្ពីរក្រឹត្យវិន័យ ក្នុងព្រះវិហារព្រះអម្ចាស់” ជាការរកឃើញដ៏អស្ចារ្យក្នុងជីវិតគាត់។ ស្តេចបានបង្គាប់ឲ្យស្មៀនរូបនេះ ចាត់ចែងការ “ជួសជុលព្រះវិហារ” ហើយក៏បានរកឃើញថា គម្ពីរដែលបានរកឃើញនោះ ទំនងជាកណ្ឌគម្ពីរចោទិយកថា។ “កាលស្តេចទ្រង់បានឮអស់ទាំងព្រះបន្ទូល ក្នុងគម្ពីរក្រឹត្យវិន័យនោះ” ទ្រង់មានការប៉ះពាល់ព្រះទ័យយ៉ាងខ្លាំង(ខ.១១)។ ប្រជាជននៅនគរយូដាមិនបានអើពើ ចំពោះព្រះអម្ចាស់ ក៏ដូចជាវិហារទ្រង់ ហើយក៏មិនខ្វល់អំពីការអាន និងស្តាប់បង្គាប់តាមព្រះគម្ពីរ ដែលព្រះអង្គបានបណ្តាលឲ្យគេតែង។ ស្តេចក៏បានប្រែចិត្ត ហើយក៏បានបង្គាប់ឲ្យគេសម្អាតព្រះវិហារ ដោយរុះរើរូបព្រះ ឬរបស់អ្វីក៏ដោយ ដែលព្រះមិនសព្វព្រះទ័យចេញពីព្រះវិហារ ខណៈពេលដែលទ្រង់ធ្វើកំណែទម្រង់ សម្រាប់ប្រជាជាតិរបស់ទ្រង់(២៣:១-២៤)។ សព្វថ្ងៃនេះ ព្រះគម្ពីររបស់យើង មាន៦៦កណ្ឌ ដែលបង្ហាញប្រាជ្ញា និងការបង្រៀនរបស់ព្រះ ដែលរាប់បញ្ចូលកណ្ឌចោទិយកថាផងដែរ។ ពេលណាយើងអាន និងស្តាប់ព្រះបន្ទូលក្នុងព្រះគម្ពីរ សូមព្រះវិញ្ញាណកែប្រែគំនិត និងរបៀបដែលយើងរស់នៅ។ ចូរយើងអានរឿងក្នុងព្រះគម្ពីរឲ្យបានស៊ីជម្រៅ នៅថ្ងៃនេះ ហើយរកឃើញប្រាជ្ញា សម្រាប់ការរស់នៅពេញមួយជីវិត។—Tom Felten តើថ្មីៗនេះ ព្រះទ្រង់បានបើកសម្ដែងអ្វីខ្លះដល់អ្នក ខណៈពេលដែលអ្នកសិក្សាព្រះគម្ពីរ? ហេតុអ្វីអ្នកចាំបាច់ត្រូវចំណាយពេលសិក្សាព្រះគម្ពីរជាទៀងទាត់? ឱព្រះវរបិតាដែលគង់នៅស្ថានសួគ៌ សូមព្រះអង្គជួយទូលបង្គំឲ្យមើលឃើញការអ្វីដែលទូលបង្គំត្រូវកែប្រែ ក្នុងជីវិតទូលបង្គំ ខណៈពេលដែលទូលបង្គំចំណាយពេលសិក្សាព្រះគម្ពីរ។ To learn how to effectively study the Bible, visit ODBU.org/SF106. គម្រោងអានព្រះគម្ពីររយៈពេល១ឆ្នាំ : ទំនុកដំកើង ២៦-២៨ និង កិច្ចការ ២២