រួចមកបានឮសំឡេងព្រះយេហូវ៉ាដ៏ជាព្រះ ដែលទ្រង់យាងក្នុងសួនច្បារនៅពេលថ្ងៃល្ហើយ។ លោកុប្បត្ដិ ៣:៨
ជាច្រើនឆ្នាំកន្លងមកហើយ ដែល ចូនី មីតឈែល(Joni Mitchell) បាននិពន្ធបទចម្រៀងមួយបទ មានចំណងជើងថា “ការជួបជុំដ៏ធំ” ដែលក្នុងនោះ គាត់បានមើលឃើញមនុស្សជាតិ កំពុងជាប់អន្ទាក់ នៅក្នុង “ការព្រមព្រៀង” ជាមួយអារក្ស។ បទចម្រៀងនេះក៏បាននិយាយអំពីដំណើរវិលត្រឡប់ ទៅរក “សួន” វិញ ដោយជំរុញអ្នកស្តាប់ទាំងឡាយ ឲ្យស្វែងរកការរស់នៅ កាន់តែសាមញ្ញ និងកាន់តែមានសេចក្តីសុខសាន្ត។ ជាងនេះទៅទៀត បទចម្រៀងនេះក៏បានឆ្លុះបញ្ចាំងអំពីមនុស្សមួយជំនាន់ ដែលកំពុងស្រេកឃ្លានចង់បានជីវិត ដែលមានគោលបំណង និងមានន័យ។
ជាការពិតណាស់ “សួនច្បារ” ដែលបានរៀបរាប់ជាលក្ខណៈកំណាព្យ ក្នុងបទចម្រៀងរបស់មីតឈែល គឺនិយាយ សំដៅទៅលើសួនច្បារអេដែន។ សួនច្បារអេដែន ជាស្ថានសួគ៌ដែលព្រះទ្រង់បានបង្កើតសម្រាប់មនុស្សជាតិ កាលពីដើមដំបូង។ ក្នុងសួនច្បារនេះ អ័ដាម និងនាងអេវ៉ា បានជួបជាមួយព្រះ ជាប្រចាំ រហូតដល់ថ្ងៃមួយ ពួកគេក៏បានព្រមព្រៀងជាមួយអារក្ស(មើលលោកុប្បត្តិ ៣:៦-៧)។ ថ្ងៃនោះអ្វីៗមានការផ្លាស់ប្តូរ។ “រួចមកបានឮសំឡេងព្រះយេហូវ៉ាដ៏ជាព្រះ ដែលទ្រង់យាងក្នុងសួនច្បារនៅពេលថ្ងៃល្ហើយ នោះអ័ដាម និងប្រពន្ធគាត់ ក៏ពួននឹងព្រះយេហូវ៉ាដ៏ជាព្រះនៅកណ្តាលដើមឈើក្នុងសួនច្បារ”(ខ.៨)។
ពេលដែលព្រះទ្រង់សួរពួកគេ អំពីអ្វីដែលពួកគេបានធ្វើ អ័ដាម និងនាងអេវ៉ា ក៏បានទម្លាក់កំហុសឲ្យគ្នាទៅវិញទៅមក។ ទោះពួកគេបានបដិសេធន៍មិនទទួលកំហុសក៏ដោយ ក៏ព្រះទ្រង់មិនបានឲ្យពួកគេនៅក្នុងសួនច្បារនោះទៀតទេ។ ព្រះអង្គក៏បានធ្វើអាវពីស្បែក ឲ្យអ័ដាម និងប្រពន្ធគាត់ពាក់គ្របបាំងកាយ (ខ.២១) ដែលនេះជាការប្រៀបប្រដូច ទៅនឹងការលះបង់របស់ព្រះយេស៊ូវ នៅលើឈើឆ្កាង ដើម្បីគ្របបាំងអំពើបាបយើង។
ព្រះទ្រង់មិនបានប្រទានផ្លូវឲ្យយើងវិលត្រឡប់ទៅសួនច្បារអេដែនវិញឡើយ។ តែព្រះអង្គប្រទានឲ្យយើងមានផ្លូវដើរទៅមុខ ឆ្ពោះទៅរកការប្រកបទាក់ទងជាមួយព្រះអង្គឡើងវិញ។ យើងមិនអាចវិលត្រឡប់ទៅរកសួនច្បារអេដែន តែយើងអាចវិលត្រឡប់ទៅរកព្រះនៃសួនច្បារអេដែន។—Tim Gustafson
តើមានអ្វីរារាំងទំនាក់ទំនងដែលអ្នកមានជាមួយព្រះ នៅថ្ងៃនេះ? តើអ្នកត្រូវសារភាពអំពើបាបណាខ្លះ ដល់ព្រះអង្គ ដើម្បីដើរជាមួយព្រះអង្គឡើងវិញ “នៅពេលថ្ងៃល្ហើយ”?
ឱព្រះវរបិតា សូមព្រះអង្គជួយទូលបង្គំ កុំឲ្យបន្ទោសអ្នកដទៃ ពេលដែលទូលបង្គំបានធ្វើអ្វីខុស ឬមានបរាជ័យ។ ទូលបង្គំសូមអរព្រះគុណព្រះអង្គ ដែលបានប្រទានទូលបង្គំ ឲ្យមានទំនាក់ទំនងជាមួយព្រះអង្គ ដោយចិត្តស្មោះត្រង់។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៤០-៤២ និង កិច្ចការ ២៧:១-២៦
