កម្លាំង នៅពេលឈប់ពឹងខ្លួនឯង
ដោយPatricia Raybon
August 7, 2022
ទ្រង់មិនដែលល្វើយឡើយ ក៏មិនដែលអស់កំឡាំងផង។ អេសាយ ៤០:២៨ កាលពីមុន គេបានឮល្បីថា លោកប៉ុល អ៊ែនឌ័រសិន(Paul Anderson) ជាបុរសដែលខ្លាំងបំផុតនៅលើពិភពលោក។ គាត់ជាកីឡាករលើកដុំដែកអាមេរិក ដែលបានបំបែកឯកត្តកម្ម នៅក្នុងការប្រកួតកីឡាអូឡាំពិចឆ្នាំ ១៩៥៦ នៅទីក្រុងមែលបូន ប្រទេសអូស្រ្តាលី ទោះគាត់កំពុងមានជំងឺរលាកត្រចៀកខាងក្នុង និងក្តៅខ្លួនជិត៤០អង្សាសេក៏ដោយ។ កាលនោះ កីឡាករដទៃទៀតកំពុងមានពិន្ទុនាំមុខគាត់ ហើយឱកាសតែមួយគត់ ដើម្បីឲ្យគាត់អាចឈ្នះបានមេដាយមាស គឺត្រូវបំបែកកំណត់ត្រាអូឡាំពិចថ្មីមួយ នៅក្នុងព្រឹត្តិការណ៍ចុងក្រោយរបស់គាត់។ ការព្យាយាមរបស់គាត់ពីរលើកដំបូង បានបរាជ័យយ៉ាងដំណំ។ ដូចនេះ កីឡាករមាឌធំ ដ៏រឹងមាំម្នាក់នេះក៏បានធ្វើនូវរឿងមួយ ដែលសូម្បីតែមនុស្សទន់ខ្សោយក៏អាចធ្វើបាន។ គឺគាត់ស្រែករកព្រះ សូមកម្លាំងបន្ថែម ហើយឈប់ពឹងអាងកម្លំាងខ្លួនឯងទៀត។ ក្រោយមក គាត់ក៏បាននិយាយថា “ខ្ញុំមិនមែនកំពុងតែតថ្លៃជាមួយព្រះនោះឡើយ។ តែខ្ញុំត្រូវការជំនួយពីព្រះអង្គ”។ នៅក្នុងការព្យាយាមលើកដំដែកជាលើកទី៣ គាត់ក៏បានលើកដំដែកទម្ងន់១៨៧គីឡូកន្លះឡើង ផុតក្បាលគាត់ ដោយជោគជ័យ។ លោកប៉ុលជាសាវ័កព្រះគ្រីស្ទ បានសរសេរថា “កាលណាខ្ញុំខ្សោយ នោះខ្ញុំមានកំឡាំងយ៉ាងចំណានវិញ”(២កូរិនថូស ១២:១០)។ ត្រង់ចំណុចនេះ សាវ័កប៉ុលកំពុងនិយាយអំពីកម្លាំងខាងវិញ្ញាណ តែគាត់ដឹងថា អំណាចរបស់ព្រះ “បានពេញខ្នាត ដោយសេចក្តីកំសោយ”(ខ.៩)។ គឺដូចដែលហោរាអេសាយបានប្រកាសថា ព្រះអម្ចាស់ “រមែងចំរើនកំឡាំង ដល់អ្នកដែលល្វើយ ហើយចំណែកអ្នកដែលគ្មានកំឡាំងសោះ នោះទ្រង់ក៏ប្រទានឲ្យ”(អេសាយ ៤០:២៩)។ តើធ្វើដូចម្តេចឲ្យយើងអានទទួលកម្លាំងនោះបាន? គឺយើងត្រូវនៅជាប់ព្រះអង្គ។ ព្រោះព្រះអង្គមានបន្ទូលថា “បើដាច់ពីខ្ញុំចេញ នោះអ្នករាល់គ្នាពុំអាចនឹងធ្វើអ្វីបានទេ”(យ៉ូហាន ១៥:៥)។ ក្នុងនាមលោកអ៊ែនឌ័រសិនជាកីឡាករលើកដុំដែក គាត់ច្រើនតែនិយាយថា “បើមនុស្សមានកម្លាំងខ្លាំងជាងគេ មិនអាចរស់នៅមួយថ្ងៃ ដោយគ្មានអំណាចចេស្តាព្រះយេស៊ូវ គ្រីស្ទ បានទេ ចុះទំរាំតែអ្នកវិញ តើអ្នកមានជម្រើសអ្វី?” ដូចនេះ ចូរយើងឈប់ពឹងផ្អែកលើកម្លាំងខ្លួនឯង ហើយទូលសូមកម្លាំងពីព្រះអង្គវិញ។—Patricia Raybon ពេលណាអ្នកពឹងផ្អែកលើកម្លាំងមកពីព្រះ មិនមែនកម្លាំងខ្លួនឯង តើអ្នកទទួលលទ្ធផលដូចម្តេចខ្លះ? តើការនៅជាប់ព្រះយេស៊ូវ បាននាំឲ្យអ្នកមានកម្លាំងដូចម្តេចខ្លះ? ឱព្រះដ៏មានគ្រប់ចេស្តា បន្ទុកក្នុងជីវិតទូលបង្គំធ្ងន់ ហើយធ្វើឲ្យទូលបង្គំមានអារម្មណ៍ថាមិនអាចទ្រាំទ្របាន តែការនៅជាប់ព្រះអង្គ បាននាំឲ្យទូលបង្គំមានកម្លាំង ដើម្បីបន្តដំណើរទៅមុខ និងមានជ័យជម្នះ។ ទូលបង្គំសូមអរព្រះគុណព្រះអង្គខ្លាំងណាស់! គម្រោងអានព្រះគម្ពីររយៈពេល១ឆ្នាំ : ទំនុកដំកើង ៧២-៧៣ និង រ៉ូម ៩:១-១៥