មានពរហើយ មនុស្សណាដែលការរំលង ច្បាប់របស់ខ្លួនបានអត់ទោសឲ្យ គឺដែលបាបរបស់ខ្លួនបានគ្របបាំងហើយ។ ទំនុកដំកើង ៣២:១
ជាច្រើនឆ្នាំមុន នៅក្នុងប្រទេសមួយ គេបានតំឡើងកាំភ្លើងបាញ់ទឹកបំបាត់ក្លិនស្អុយ១រយដើម ដោយប្រើសម្ពាធទឹកខ្លាំង នៅកន្លែងចាក់សំរាមធំ មួយកន្លែង ដែលស្ថិតក្នុងចំណោមកន្លែងចាក់សំរាមរាប់រយ ទូទាំងប្រទេស ដែលកំពុងតែនាំឲ្យប្រជាពលរដ្ឋមានការព្រួយបារម្ភកាន់តែខ្លាំង។ កាំភ្លើងទាំងនោះបានបាញ់ទឹកក្រអូបជាច្រើនលីត្រ ក្នុងមួយនាទី បានចំងាយប្រហែល៥០ម៉ែត្រ មកលើភ្នំសំរាមជាច្រើន។ ប៉ុន្តែ ទោះពួកគេបានបាញ់ មកលើគំនរសំរាមនោះ បានប៉ុន្មានលីត្រក៏ដោយ ក៏ទឹកអប់ទាំងនោះគ្រាន់តែបានគ្របពីលើក្លឹនស្អុយប៉ុណ្ណោះ ទាល់តែពួកគេដកប្រភពនៃក្លិនស្អុយចេញ ទើបពួកគេអាចបំបាត់ក្លិនស្អុយបាន។
ស្តេចដាវីឌក៏ធ្លាប់ព្យាយាមគ្របបាំងក្លិនស្អុយ នៃអំពើបាបរបស់ទ្រង់ផងដែរ។ ទ្រង់បានប្រើអំណាចជាស្តេចក្នុងផ្លូវខុស ដើម្បីយកនាងបាតសេបាធ្វើជាប្រពន្ធ ហើយបញ្ជាឲ្យគេសម្លាប់លោកអ៊ូរី ដែលជាស្វាមីរបស់នាង(២សាំយ៉ូអែល ១១:១-២៤) ហើយបន្ទាប់មក ទ្រង់ក៏បានប្រើវិធីបិទបាំងភាពស្មោកគ្រោករបស់ទ្រង់ ដោយភាពស្ងាត់ស្ងៀម ល្បិចកល និងការគោរពប្រតិបត្តិព្រះតែសម្បកក្រៅ។ ប៉ុន្តែ ព្រះអម្ចាស់ក៏បានបណ្តាលឲ្យទ្រង់ទទួលស្គាល់កំហុស(ទំនុកដំកើង ៣២:៣-៤) ដោយអំណាចចេស្តាព្រះអង្គ។ ទ្រង់មិនអាចស៊ូទ្រាំនឹងទោសកំហុសនៃអំពើបាបរបស់ទ្រង់ និងការដាក់ទោសពីព្រះ បានតទៅទៀត ដូចនេះ ទ្រង់ក៏បានទូលសូមសេចក្តីមេត្តា និងការលាងសម្អាងខាងវិញ្ញាណពីព្រះ(៥១:១-៤)។ ទ្រង់ក៏បានសារភាពបាបរបស់ទ្រង់នៅចំពោះព្រះ ហើយព្រះអង្គក៏បានអត់ទោសបាប ឲ្យស្តេចអង្គនេះ ហើយក៏បានប្រទានអំណរជាថ្មី(៣២:១,១១ ៥១:១២-១៥)។
ពេលយើងប្រព្រឹត្តអំពើបាប ការព្យាយាមបិទបាំងអំពើបាបរបស់យើង គឺគ្មានប្រយោជន៍ទេ។ ប៉ុន្តែ ពេលណាយើងសារភាពបាប និងប្រែចិត្ត នៅចំពោះព្រះវត្តមាននៃព្រះវរបិតានៃយើង ដែលមានព្រះទ័យមេត្តា ព្រះអង្គនឹងអត់ទោសបាបឲ្យយើង ប្រទាននូវក្លិនដ៏ក្រអូបនៃព្រះគុណព្រះអង្គ ហើយប្រទានឲ្យយើងមានក្តីអំណរឡើងវិញ ដោយសារសេចក្តីសង្រ្គោះដែលព្រះអង្គប្រទាន(ទំនុកដំកើង ៥១:៧-១២)។—Marvin Williams
តើអ្នកចាំបាច់ត្រូវផ្លាស់ប្តូរអាកប្បកិរិយា ចំពោះអំពើបាបរបស់អ្នក និងការអត់ទោសប្រកបដោយព្រះគុណរបស់ព្រះ យ៉ាងដូចម្តេចខ្លះ? តើអ្នកគួរតែធ្វើដូចម្តេច ដើម្បីឆ្លើយតប ចំពោះការអត់ទោសរបស់ព្រះ?
ឱព្រះនៃសេចក្តីស្រឡាញ់ ទូលបង្គំមិនចង់បិទបាំងបាបទូលបង្គំ ដោយក្លិននៃភាពស្ងាត់ស្ងៀម ការបោកបញ្ឆោត និងការគោរពប្រតិបត្តព្រះអង្គតែសម្បកក្រៅទៀតឡើយ។ សូមព្រះអង្គប្រទានអំណោយនៃការប្រែចិត្ត ដើម្បីឲ្យទូលបង្គំអាចរកឃើញសេចក្តីមេត្តា ការអត់ទោស និងក្តីអំណរ។
To learn more about the importance of forgiveness, visit ODBU.org/SF107.
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១០០-១០២ និង ១កូរិនថូស ១
