គេបានប្រាប់ដល់ខ្ញុំ ពីគ្រប់ទាំងកិរិយា ដែលនាងបានប្រព្រឹត្តនឹងម្តាយក្មេក តាំងពីប្តីនាងស្លាប់ចោលទៅ ហើយពីនាងបានលះចោលឪពុកម្តាយ និងស្រុកកំណើតរបស់នាង មកឯសាសន៍នេះ ដែលមិនបានស្គាល់កាលពីដើមផង។ នាងរស់ ២:១១
មានពេលមួយ ខ្ញុំបានធ្វើដំណើរមកដល់មជ្ឈមណ្ឌលថែទាំអ្នកជំងឺមហារីក ដើម្បីមើលថែសុខភាពម្តាយខ្ញុំ ដោយអារម្មណ៍ឯកោ និងភ័យខ្លាច។ ខ្ញុំបានធ្វើដំណើរប្រហែល១ពាន់គីឡូម៉ែត្រ ចេញពីគ្រួសាររបស់ខ្ញុំ។ ប៉ុន្តែ មុនពេលខ្ញុំចាប់លើកឥវ៉ាន់របស់ខ្ញុំ លោកហ្វ្រែង(Frank) បានស្ម័គ្រចិត្តជួយយូរឥវ៉ាន់ខ្ញុំ ដោយទឹកមុខញញឹមស្រស់។ ពេលយើងឡើងទៅដល់ជាន់ទី៦ ខ្ញុំក៏បានគ្រោងទៅជួបភរិយាគាត់ ឈ្មោះឡូរី(Lori) ដែលបានមើលថែគាត់ ក្នុងអំឡុងពេលគាត់កំពុងព្យាបាលជំងឺ។ មិនយូរប៉ុន្មានប្តីប្រពន្ធមួយគូរនេះ ប្រៀបដូចជាគ្រួសារខ្ញុំអញ្ចឹង ខណៈពេលដែលយើងពឹងផ្អែកលើព្រះ និងពឹងផ្អែកគ្នាទៅវិញទៅមក។ យើងបានសើច យើងចែកចាយអារម្មណ៍របស់យើង ហើយយើងក៏បានយំទាំងអស់គ្នា ព្រមទាំងអធិស្ឋានជាមួយគ្នាផងដែរ។ ទោះយើងមានអារម្មណ៍ថា យើងបានចេញឆ្ងាយពីគ្រួសារក៏ដោយ ក៏ការប្រកបទាក់ទងដែលយើងមានជាមួយព្រះ និងជាមួយគ្នាទៅវិញទៅមក បានបន្តជួយឲ្យយើងចាក់ឫសជាប់ក្នុងក្តីស្រឡាញ់ ខណៈពេលដែលយើងជួយយកអសារគ្នាទៅវិញទៅមក។
កាលនាងរស់បានប្តេជ្ញាចិត្តថែរក្សាអ្នកស្រីណាអូមីជាម្តាយក្មេក គឺនាងបានស្ម័គ្រចិត្តទៅកន្លែងដែលនាងមិនស្គាល់។ នាងរស់បាន ទៅរើសសន្សំគួរស្រូវក្នុងស្រែ តាមពីក្រោយពួកអ្នកច្រូតស្រូវ(នាងរស់ ២:៣)។ មេកាក៏បានប្រាប់លោកបូអូស ដែលជាម្ចាស់ស្រែថា នាងរស់បានមកវាលស្រែតាំងពីព្រលឹម លើកលែងតែកាលនាងសំរាកនៅផ្ទះ១ភ្លែតប៉ុណ្ណោះ(ខ.៧)។ នាងរស់រកបានកន្លែងដ៏សុខសាន្ត នៅជាមួយមនុស្សដែលស្ម័គ្រចិត្តយកអសារនាង ខណៈពេលដែលនាងមើលថែអ្នកស្រីណាអូមី (ខ.៨-៩)។ ហើយព្រះទ្រង់ក៏បានផ្គត់ផ្គង់នាងរស់ និងអ្នកស្រីណាអូមី តាមរយៈភាពសប្បុរសរបស់លោកបូអូស(ខ.១៤-១៦)។
កាលៈទេសៈនៃជីវិតយើង អាចបើកផ្លូវឲ្យយើងទៅកន្លែងដែលយើងមិននឹកស្មានដល់ នៅឆ្ងាយពីកន្លែងដ៏សុខស្រួលរបស់យើង។ កាលណាយើងនៅជាប់ជាមួយព្រះ និងបន្តប្រកបគ្នា ព្រះអង្គនឹងជួយឲ្យយើងចាក់ឫសក្នុងក្តីស្រឡាញ់ ខណៈពេលដែលយើងទ្រទ្រង់គ្នាទៅវិញទៅមក។—XOCHITL DIXON
តើព្រះបានកម្សាន្តចិត្តអ្នកយ៉ាងណាខ្លះ ពេលដែលអ្នកមានអារម្មណ៍ឯកោ? តើព្រះអង្គបានប្រើអ្នកដទៃ យ៉ាងណាខ្លះ ដើម្បីទ្រទ្រង់អ្នក តាមរយៈសហគមន៍ ដែលចាក់ឫសក្នុងសេចក្តីស្រឡាញ់របស់ព្រះអង្គ?
ឱព្រះវរបិតានៃសេចក្តីស្រឡាញ់ ទូលបង្គំសូមអរព្រះគុណព្រះអង្គ ដែលបានសន្យាថា នឹងគង់នៅជាមួយទូលបង្គំ និងបំពេញតម្រូវការគ្រប់យ៉ាងរបស់ទូលបង្គំ។
For further study, read What Is Real Love? at DiscoverySeries.org/Q0714.
គម្រោងអានព្រះគម្ពីរយៈពេល១ឆ្នាំ : ទំនុកដំកើង ១៤០-១៤២ និង ១កូរិនថូស ១៤:១-២០
