ខ្ញុំនឹងតាំងពួកជំនុំខ្ញុំនៅលើថ្មដានេះ ហើយទ្វារស្ថានឃុំព្រលឹងមនុស្សស្លាប់នឹងមិនដែលឈ្នះពួកជំនុំឡើយ។ ម៉ាថាយ ១៦:១៨
កាលពីឆ្នាំ១៨៨៩ គម្រោងសាងសង់ផ្ទះឯកជនមួយ ដែលមានមហិច្ឆតាបំផុត បានចាប់ផ្តើម នៅសហរដ្ឋអាមេរិក។ គេបានផលិតឥដ្ឋនៅការដ្ឋានសំណង់នោះ ដោយផ្ទាល់ ក្នុងមួយថ្ងៃ បាន៣ម៉ឺន២ពាន់ដុំ។ គេក៏បានបន្តការសាងសង់ “ផ្ទះរដូវក្តៅ” របស់លោកចន វែនឌ័របីល ទី២(George Vanderbilt II) រហូតដល់ចប់សព្វគ្រប់ ក្នុងរយៈពេល៦ឆ្នាំ ហើយបានដាក់ឈ្មោះឲ្យផ្ទះដ៏ធំស្កឹមស្កៃមួយនោះ នៅទីក្រុងអាសេវីល រដ្ឋឃែរ៉ូឡាយណា ខាងជើងថា គេហដ្ឋាន ប៊ីលមរ។ រហូតមកដល់សព្វថ្ងៃនេះ ផ្ទះនោះនៅតែជាលំនៅដ្ឋានឯកជនដែលធំជាងគេបំផុត នៅសហដ្ឋអាមេរិក ដែលមាន២៥០បន្ទប់(បន្ទប់គេង៣៥ និងបន្ទប់ទឹក៤៣) ហើយផ្ទៃបាតដ៏ធំសម្បើមរបស់វា មានក្រឡាផ្ទៃ ១៦២២៦ ម៉ែត្រការ៉េ។
វាជាគម្រោងសាងសង់ ដែលមានមហិច្ឆតាខ្ពស់ តែមិនអាចប្រៀបផ្ទឹមនឹង “សំណង់” ដែលព្រះយេស៊ូវបានប្រកាស ដល់ពួកសាវ័កព្រះអង្គ ក្នុងបទគម្ពីរម៉ាថាយ ជំពូក១៦។ នៅពេលដែលលោកពេត្រុសបានបញ្ជាក់ថា ព្រះយេស៊ូវ ជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់”(ខ១៦) ព្រះយេស៊ូវក៏បានប្រកាសថា “អ្នកឈ្មោះពេត្រុស ខ្ញុំនឹងតាំងពួកជំនុំខ្ញុំនៅលើថ្មដានេះ ហើយទ្វារស្ថានឃុំព្រលឹងមនុស្សស្លាប់នឹងមិនដែលឈ្នះពួកជំនុំឡើយ”(ខ.១៨)។ យើងអាចដឹងថា ហេតុអ្វីព្រះយេស៊ូវបានប្រើពាក្យ “ថ្មដា”។ ព្រះអង្គសព្វព្រះទ័យនឹងសង់ពួកជំនុំព្រះអង្គ ដែលលាតសន្ធឹងទៅដល់ចុងបំផុតនៃផែនដី(ម៉ាថាយ ២៨:១៩-២០) ដែលរាប់បញ្ចូលមនុស្សមកពីគ្រប់ជាតិសាសន៍ នៅទូទាំងពិភពលោក(វិវរណៈ ៥:៩)។
តើព្រះយេស៊ូវបានលះបង់អ្វីខ្លះ ក្នុងគម្រោងសាងសង់នេះ? គឺព្រះអង្គបានលះបង់ព្រះជន្មព្រះអង្គ នៅលើឈើឆ្កាង(កិច្ចការ ២០:២៨)។ ក្នុងនាមយើងជាសមាជិននៃពួកជំនុំ(អេភេសូរ ២:២១) ដែលព្រះអង្គបានទិញ ដោយការបង់ថ្លៃខ្ពស់បំផុត ចូរយើងអបអរការលះបង់ ដោយសេចក្តីស្រឡាញ់ និងចូលរួមជាមួយព្រះអង្គ ក្នុងមហាបេសកកម្មនេះ។—BILL CROWDER
តើពួកជំនុំព្រះអង្គត្រូវឆ្លុះបញ្ចាំងឲ្យគេស្គាល់ព្រះគ្រីស្ទ ដោយរបៀបណា? តើមានអ្វីខ្លះដែលអាចរារាំងអ្នក មិនឲ្យឆ្លុះបញ្ចាំងអំពីព្រះយេស៊ូវ ឲ្យបានត្រឹមត្រូវ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការលះបង់របស់ព្រះអង្គ។ សូមព្រះអង្គជួយទូលបង្គំ ឲ្យអបអរព្រះអង្គ ក្នុងចិត្តទូលបង្គំ ក៏ដូចជាជាមួយអ្នកដទៃ ក្នុងមហាគ្រួសារនៃជំនឿ។
For further study, read The Church We Need at DiscoverySeries.org/Q0904.
គម្រោងអានព្រះគម្ពីរយៈពេល១ឆ្នាំ : សុភាសិត ៣-៥ និង ២កូរិនថូស ១
