មនុស្សដែលត្រូវការមនុស្ស

សូមអ្នក​រាល់គ្នា​ជំរាបសួរ​គ្នា​ទៅវិញទៅមក ដោយ​ការ​ថើប​យ៉ាង​បរិសុទ្ធ ពួក​ជំនុំ​នៃ​ព្រះគ្រីស្ទ​ទាំងអស់ សូម​ជំរាបសួរ​មក​អ្នករាល់គ្នា។ រ៉ូម ១៦:១៦

ក្នុង​អាជីព​ដ៏​ល្បីល្បាញ ជា​អ្នកនិពន្ធ​អត្ថបទ​កាសែត​អំពី​កីឡា លោក​ដេវ ឃីនដ្រិត(Dave Kindred) បាន​សរសេរ​អំពី​ព្រឹត្តិការ​ប្រកួត​កីឡា​រាប់​រយ ដែល​ជា​ការ​ប្រកួត​ធំៗ និង​ការប្រកួត​ជើងឯក ហើយក៏​បាន​សរសេរ​ជីវប្រវត្តិ​របស់​លោក​មហាម៉ាត់ អា​លី(Muhammad Ali)ផង​ដែរ។ ពេល​គាត់​មានការ​អផ្សុក បន្ទាប់ពី​បាន​ចូលនិវត្តន៍ គាត់​ក៏បាន​ចាប់ផ្តើម​ទៅ​មើល​ការប្រកួត​បាល់បោះ​នារី ក្នុង​សាលារៀន​មួយ ក្នុង​តំបន់​ដែល​គាត់​រស់នៅ។ មិនយូរ​ប៉ុន្មាន គាត់​ក៏បាន​ចាប់ផ្តើម​និពន្ធ​រឿង អំពី​ការប្រកួត​នី​មួយៗ ហើយ​បង្ហោះ​នៅ​តាម​អនឡាញ។ ហើយ​ពេល​ដែល​ម្តាយ និង​ចៅប្រុស​គាត់​បាន​លាចាក​លោក ហើយ​ភរិយា​គាត់​មាន​ជំងឺ​ស្លាប់​មួយ​ចំហៀង​ខ្លួន គាត់​ក៏បាន​ដឹង​ថា ក្រុមកីឡា​ដែល​គាត់​បាន​លើក​មក​សរសេរ​នោះ បាន​ផ្តល់​ឲ្យ​គាត់​នូវ​ការ​ទំនាក់ទំនង​ជា​សហគមន៍ និង​ជួយ​ឲ្យ​គាត់​រក​ឃើញ​គោលបំណង​នៃ​ជីវិត។ គាត់ និង​ពួក​គេ​ត្រូវការ​គ្នា​ទៅវិញទៅមក។ លោក​ឃីនដ្រិត​ក៏បាន​និយាយ​ថា “ក្រុម​នេះ​បាន​ជួយ​ខ្ញុំ​ច្រើនណាស់។ ជីវិត​ខ្ញុំ​បាន​ប្រែជា​ងងឹត …តែ​ពួក​គេ​បាន​ធ្វើជា​ពន្លឺ”។

តើ​ហេតុអ្វី​អ្នក​កាសែត​ជើងចាស់​ដ៏​ល្បីល្បាញ បាន​ងាក​មក​ពឹងផ្អែក​ទៅលើ​សហគមន៍​របស់​ក្មេង​ជំទង់​ទាំងនោះ? រឿង​នេះ​បាន​ធ្វើឲ្យ​ខ្ញុំ​នឹក​ចាំ​អំពី​សាវ័ក​ដ៏​ឆ្នើម​ម្នាក់​របស់​ព្រះយេស៊ូវ​​  ដែល​បាន​ពឹងផ្អែក​ទៅលើ​ការ​ប្រកប​ស្និទ្ធស្នាល​របស់​អ្នក​ដែល​គាត់​បាន​ជួប ក្នុង​ដំណើរ​បេសកកម្ម​របស់​គាត់។ តើ​អ្នក​បាន​កត់សំគាល់​ឈ្មោះ​មនុស្ស​ទាំងអស់ ដែល​សាវ័ក​ប៉ុល​បាន​ជំរាបសួរ នៅ​ចុង​សំបុត្រ​របស់​គាត់​ឬ​ទេ? (រ៉ូម ១៦:៣-១៥)។ គឺ​ដូចដែល​គាត់​បាន​សរសេរ​ថា “សូម​ជំរាបសួរ​អ្នក​អាន់​ត្រូ​នីក និង​អ្នក​យូ​នាស ជា​ញាតិ​ខ្ញុំ គឺជា​អ្នកជាប់គុក​ជាមួយនឹង​ខ្ញុំ​”(ខ.៧)។ “សូម​ជំរាបសួរ​អ្នក​អាំ​ភ្លាស ជា​ស្ងួនភ្ងា​ខ្ញុំ​ក្នុង​ព្រះអម្ចាស់​”(ខ.៨)។ នៅក្នុង​ខគម្ពីរ​ផ្សេងទៀត​ក្នុង​ជំពូក​ដដែល​នេះ ជា​សរុប គាត់​បាន​បញ្ចេញ​ឈ្មោះ​មនុស្ស២៥នាក់ ដែល​ភាគច្រើន​មិន​មាន​លើក​មក​និយាយ​ម្តង​ទៀត ក្នុង​បទ​គម្ពីរ​ផ្សេងទៀត​ទេ។ តែ​សាវ័ក​ប៉ុល​ត្រូវការ​ពួក​គេ។

តើមាន​នរណា​ខ្លះ នៅក្នុង​សហគមន៍​របស់​អ្នក? ពួក​ជំនុំ​របស់​អ្នកជា​កន្លែង​ល្អ​បំផុត ដែល​អ្នក​អាច​ចាប់ផ្តើម​រកមើល​មនុស្ស​ដែល​ត្រូវការ​អ្នក។ នៅ​ទីនោះ តើមាន​នរណា​ខ្លះ​កំពុង​ជួប​ភាព​ងងឹត ក្នុង​ជីវិត? ខណៈ​ពេល​ដែល​ព្រះ​ដឹកនាំ​អ្នក អ្នក​អាច​ធ្វើជា​ពន្លឺ ដើម្បី​នាំ​ពួក​គេ​ឲ្យ​ងាក​ទៅ​រក​ព្រះយេស៊ូវ​​។ នៅ​ថ្ងៃណាមួយ ពួក​គេ​អាច​ជួយ​យក​អសារ​អ្នក​វិញ។—MIKE WITTMER

តើមាន​នរណា​ខ្លះ ដែល​អ្នកដឹង​ថា អ្នក​អាច​ពឹងពាក់​បាន? ចូរ​ទូល​សូម​ព្រះ ឲ្យ​ប្រទាន​មិត្តភក្ដិ​ប្រភេទ​នោះ។ តើ​អ្នក​អាច​ធ្វើជា​មិត្ត​ភក្តិ​ដែល​ល្អ​ដូចនោះ ដោយ​របៀបណា?

ឱ​ព្រះ​វរបិតា ព្រះយេស៊ូវ​​ជា​មិត្តសម្លាញ់​ពិត! សូម​ព្រះអង្គ​ជួយ​ទូលបង្គំ ឲ្យ​ធ្វើជា​មិត្តសម្លាញ់​ពិត សម្រាប់​អ្នកដទៃ?

For further study, read Who’s My Neighbor? at DiscoverySeries.org​/Q0308.

គម្រោងអានព្រះគម្ពីរយៈពេល១ឆ្នាំ : សាស្ដា ១០-១២ និង កាឡាទី ១

Share this post:
Facebook
Twitter
LinkedIn
WhatsApp

More articles