រឿងល្អ និងការឈឺចាប់
ដោយKirsten Holmberg
November 12, 2022
ពីព្រោះគឺព្រះទេតើ ដែលទ្រង់ចាត់ខ្ញុំមកជាមុន ដើម្បីនឹងរក្សាជីវិតអ្នករាល់គ្នាទុក។ លោកុប្បត្ដិ ៤៥:៥ ហ្វេង លូលូ (Feng Lulu) បានជួបជុំគ្រួសារកំណើតរបស់នាងវិញ បន្ទាប់ពីបានបាត់ខ្លួនអស់រយៈពេល៣ទសវត្សរ៍។ កាលនាងនៅក្មេងចេះដើរតេសតាស់ នាងត្រូវគេចាប់ជំរិត ពេលនាងកំពុងលេងនៅក្រៅផ្ទះ តែប្រហែល៣០ឆ្នាំក្រោយមក ទីបំផុត សមាគមន៍ស្រ្តីចិនក៏បានរកឃើញទីតាំងរបស់នាង។ នាងមិនបានចាំថា ខ្លួនឯងជាកូនរបស់នរណាទេ ដោយសារគេបានចាប់ជំរិតនាង កាលនាងនៅក្មេងពេក។ នាងបានចម្រើនវ័យធំឡើង ដោយជឿថា ឪពុកម្តាយនាងបានលក់នាងឲ្យគេ ដោយសារគ្មានលទ្ធភាពចិញ្ចឹមនាង ដូចនេះ ពេលដែលនាងបានដឹងការពិត នាងមានសំណួរ និងអារម្មណ៍លាយឡំជាច្រើន។ កាលលោកយ៉ូសែបបានជួបជុំជាមួយបងប្អូនគាត់វិញ គាត់ក៏ទំនងជាមានអារម្មណ៍ច្របូកច្របល់ផងដែរ។ គាត់ត្រូវពួកបងៗលក់ ឲ្យធ្វើជាទាសករក្នុងទឹកដីអេស៊ីព្ទ កាលគាត់នៅក្មេង។ ទោះគាត់បានឆ្លងកាត់ជីវិតផ្លាស់ប្តូរដ៏ឈឺចាប់ជាបន្តបន្ទាប់ក៏ដោយ ក៏ព្រះទ្រង់បានលើកគាត់ឡើង ឲ្យក្លាយជាអ្នកមានអំណាចម្នាក់ក្នុងនគរអេស៊ីព្ទ។ ពេលពួកបងប្រុសគាត់បានមកនគរអេស៊ីព្ទដើម្បីទិញស្បៀងអាហារ ក្នុងអំឡុងពេលមានគ្រោះអត់ឃ្លាន ពួកគេក៏បានទៅទិញស្បៀងអាហារដោយផ្ទាល់ពីគាត់ ដោយមិនបានស្គាល់គាត់។ លោកយ៉ូសែបទទួលស្គាល់ថា ព្រះទ្រង់បានប្រោសលោះកំហុសរបស់ពួកគេហើយ បានជាគាត់ប្រាប់ពួកគេថា ព្រះអង្គបានប្រើកំហុសរបស់ពួកគេដើម្បី ជួយសង្គ្រោះជីវិតពួកគេ ដោយសេចក្តីប្រោសប្រាណយ៉ាងធំ(លោកុប្បត្តិ ៤៥:៧)។ លោកយ៉ូសែបមិនបាននិយាយការពារទង្វើដ៏ឈឺចាប់ដែលពួកគេបានធ្វើមកលើគាត់នោះឡើយ តែគាត់បាននិយាយយ៉ាងច្បាស់ថា ពួកគេបានលក់គាត់(ខ.៥)។ ជួនកាល យើងព្យាយាមប្រើគំនិតវិជ្ជមានខ្លាំងពេក មកលើរឿងពិបាកៗ ដោយគ្រាន់តែផ្តោតទៅលើការល្អ ដែលព្រះទ្រង់បណ្តាលឲ្យកើតចេញពីរឿងអាក្រក់ទាំងនោះ តែយើងមិនបានទទួលស្គាល់ការលំបាកផ្លូវអារម្មណ៍។ ដូចនេះ ចូរយើងមានការប្រុងប្រយ័ត្ន គឺមិនត្រូវចាត់ទុករឿងអាក្រក់ថា ជារឿងល្អ គ្រាន់តែដោយសារព្រះទ្រង់បានប្រោសលោះវានោះទេ តែយើងអាចរំពឹងថា ព្រះអង្គនឹងនាំការល្អ ចេញពីរឿងអាក្រក់នោះ ដោយនៅតែទទួលស្គាល់ការឈឺចាប់ ដែលកើតចេញពីរឿងអាក្រក់នោះ ហើយសូមព្រះអង្គប្រោសចិត្តយើងឲ្យជា ឬធ្វើការផ្សះផ្សាជាដើម។—KIRSTEN HOLMBERG
តើអ្នកបានពិសោធន៍នឹងទុក្ខលំបាក ដោយសារកំហុសរបស់អ្នកដទៃឬទេ? តើអ្នកបានឃើញព្រះទ្រង់នាំការល្អចេញពីរឿងអាក្រក់ ដោយរបៀបណា?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការព្យាបាលរបួសក្នុងចិត្តទូលបង្គំ ដោយសេចក្តីស្រឡាញ់។
គម្រោងអានព្រះគម្ពីររយៈពេល១ឆ្នាំ : យេរេមា ៥១-៥២ និង ហេព្រើរ ៩