មនុស្សល្ងីល្ងើក៏ពង្រីកពាក្យពោលជាច្រើន ឯមនុស្សលោកគេមិនដឹងជានឹងកើតមានអ្វីទេ។ សាស្តា ១០:១៤
កាលពីឆ្នាំ ២០១០ លោកឡាសស្លូ ហ៊ែនីយែក(Laszlo Hanyecz) បានធ្វើការទិញជាលើកដំបូង ដោយប្រើលុយប៊ីតខញ (bitcoin ជារូបិយបណ្ណឌីជីធល ដែលមានតម្លៃមួយភាគ មួយសេន) ដោយបង់ប្រាក់ ១ម៉ឺន ប៊ីតខញ ដើម្បីទិញនំភីហ្សា២បន្ទះ(តម្លៃ២៥ដុល្លា)។ នៅឆ្នាំ២០២១ លុយប៊ីតខញបានឡើងថ្លៃខ្ពស់បំផុត ដោយ១ម៉ឺនប៊ីតខញ មានតម្លៃជាង ៥០០លានដុល្លា។ មុនពេលតម្លៃលុយនេះឡើងថ្លៃកប់ពពក គាត់បានបន្តបញ្ជាទិញនំភីហ្សា ដោយប្រើលុយ ១០ម៉ឺនប៊ីតខញជាសរុប។ បើសិនជាគាត់សន្សំលុយប៊ីតខញទាំងនោះ គាត់ប្រាកដជាក្លាយជាមហាសេដ្ឋីប្រាក់ពាន់លានដុល្លា ហើយមានឈ្មោះក្នុងបញ្ជីអ្នកមានបំផុតនៅលើពិភពលោក។ តែគួរឲ្យស្តាយ ដែលគាត់បានដឹងជាមុនថា នឹងមានរឿងនេះកើតឡើង។
ជាការពិតណាស់ លោកហ៊ែនយេកមិនអាចដឹងជាមុនបានទេ។ គ្មាននរណាអាចដឹងបានទេ។ កណ្ឌគម្ពីរសាស្តាបានចែងថា “មនុស្សលោកគេមិនដឹងជានឹងកើតមានអ្វីទេ”(១០:១៤)។ ទោះយើងបានព្យាយាមយល់ និងគ្រប់គ្រងពេលអនាគតយ៉ាងណាក៏ដោយ ក៏ខគម្ពីរនេះនៅតែជាសេចក្តីពិត។ អ្នកខ្លះគិតស្មានថា ខ្លួនឯងមានការយល់ដឹង លើសពីអ្វីដែលខ្លួនពិតជាដឹងមែន ឬដែលអាក្រក់ជាងនេះទៀតនោះ គឺយើងគិតស្មានថា យើងបានដឹងអំពីជីវិត ឬអនាគតរបស់នរណាម្នាក់។ តែដូចដែលកណ្ឌគម្ពីរសាស្តាបានសួរយ៉ាងច្បាស់ថា “ការអ្វីដែលនឹងកើតមកខាងក្រោយខ្លួន នោះតើអ្នកណានឹងថ្លែងប្រាប់បាន?”(ខ.១៤)។ ទេ គ្មាននរណាអាចថ្លែងប្រាប់បានទេ។
ព្រះគម្ពីរបានប្រៀបធៀបមនុស្សមានប្រាជ្ញា និងមនុស្សល្ងង់ ហើយចំណុចខុសគ្នាមួយ ក្នុងចំណោមចំណុចខុសគ្នាជាច្រើនរវាងអ្នកទាំងពីរ គឺការបន្ទាបខ្លួន ក្នុងការយល់ដឹងអំពីពេលអនាគត(សុភាសិត ២៧:១)។ មនុស្សមានប្រាជ្ញាទទួលស្គាល់ថា មានតែព្រះទេដែលពិតជាជ្រាបអំពីពេលអនាគត ពេលដែលពួកគេធ្វើការសម្រេចចិត្ត។ តែមនុស្សល្ងង់គិតស្មានថា ខ្លួនឯងដឹង។ សូមព្រះទ្រង់ប្រទានយើងនូវប្រាជ្ញា ដោយថ្វាយពេលអនាគតរបស់យើងដាច់ដល់ព្រះ ដែលពិតជាជ្រាបថា នឹងមានរឿងអ្វីខ្លះកើតឡើង។—WINN COLLIER
តើនៅពេលណា អ្នកបានជួបការល្បួងដែលនាំឲ្យអ្នកចង់គ្រប់គ្រងពេលអនាគត? តើធ្វើដូចម្តេចឲ្យអ្នកអាចទុកចិត្តថា ព្រះទ្រង់ គ្រប់គ្រងថ្ងៃដែលត្រូវមកដល់?
ឱព្រះអម្ចាស់ សូមព្រះអង្គជួយទូលបង្គំឲ្យទុកចិត្តព្រះអង្គ នៅថ្ងៃនេះ ហើយទុកចិត្តថា ព្រះអង្គបានរៀបចំពេលអនាគត សម្រាប់ទូលបង្គំ តាមបំណងព្រះទ័យព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសេគាល ២០-២១ និង យ៉ាកុប ៥
