ចូរឲ្យមានសេចក្តីស្រឡាញ់ឥតពុតមាយា ទាំងខ្ពើមសេចក្តីអាក្រក់ ហើយកាន់ខ្ជាប់ខាងសេចក្តីល្អវិញ។ រ៉ូម ១២:៩
ពេលណាយើងចតឡានរបស់យើង នៅក្បែរវាលស្មៅបើកចំហមួយ ហើយដើរកាត់វាលស្មៅនោះ ទៅរកផ្ទះរបស់យើង ជើងខោរបស់យើងក៏បានជាប់កន្ត្រើយ ស្ទើរតែគ្រប់ពេល ជាពិសេសក្នុងរដូវស្លឹកឈើជ្រុះ។ ផ្កាកន្ត្រើយទាំងនោះបានតោងជាប់ជើងខោ និងស្បែកជើងក្រណាត់ ឬអ្វីក៏ដោយដែលដើរកាត់វា ហើយក្លាយជាយានជំនិះ សម្រាប់ឲ្យវាជិះទៅរកគោលដៅបន្ទាប់។ នេះជារបៀបដែលស្មៅកន្ត្រើយបានសាបព្រោះគ្រាប់របស់វា ក្នុងទីវាល នៅតំបន់ខ្ញុំ និងទូទាំងពិភពលោក។
ពេលណាខ្ញុំព្យាយាមបេះកន្ត្រើយចេញពីជើងខោខ្ញុំ ខ្ញុំច្រើនតែគិត អំពីពាក្យលើកទឹកចិត្តអ្នកជឿព្រះយេស៊ូវ ឲ្យ “ប្រកាន់ខ្ជាប់សេចក្តីល្អ”(រ៉ូម ១២:៩)។ ពេលណាយើងព្យាយាមស្រឡាញ់អ្នកដទៃ យើងអាចមានការពិបាក។ ទោះជាយ៉ាងណាក៏ដោយ ព្រះវិញ្ញាណបរិសុទ្ធជួយយើង ឲ្យប្រកាន់ខ្ជាប់សេចក្តីល្អ មានសេចក្តីស្រឡាញ់ ដោយស្មោះអស់ពីចិត្ត ហើយជម្នះការអាក្រក់ តាមការដឹកនាំរបស់ព្រះអង្គ(ខ.៩)។
បើអ្នកគ្រាន់តែយកដៃបោសផ្កាកន្ត្រើយ នោះពួកវាមិនជ្រុះពីជើងខោរបស់អ្នកងាយៗឡើយ។ ពួកវានៅតែតោងជាប់ ទាល់តែអ្នកបេះពួកវាចេញម្តងមួយៗ។ ហើយពេលណាយើងផ្ដោតទៅលើការអ្វីដែលល្អ ដោយផ្ដោតចិត្តទៅលើសេចក្តីមេត្តា សេចក្តីអាណិត និងព្រះរាជបញ្ជារបស់ព្រះអង្គ នោះយើងអាចមានក្តីស្រឡាញ់ដ៏រឹងមាំ ចំពោះអ្នកដទៃ ដោយពឹងអាងកម្លាំងរបស់ព្រះអង្គ។ ព្រះអង្គជួយយើងឲ្យមានការប្តូរផ្តាច់ចំពោះគ្នា ដោយសេចក្តីស្រឡាញ់ ដោយចាត់ទុកតម្រូវការអ្នកដទៃជាសំខាន់ជាងតម្រូវការខ្លួនឯង(ខ.១០)។
ជាការពិតណាស់ កន្ត្រើយដែលជាប់ជើងខោអាចពិបាកបេះចេញ តែពួកវាក៏បានរំឭកខ្ញុំ ឲ្យប្រកាន់ខ្ជាប់សេចក្តីស្រឡាញ់ដ៏រឹងមាំ ចំពោះអ្នកដទៃ ហើយប្រកាន់ខ្ជាប់សេចក្តីអ្វីដែលល្អ ដោយអំណាចព្រះអង្គ(ខ.៩ និងមើល ភីលីព ៤:៨-៩)។—KATARA PATTON
តើការប្រកាន់ខ្ជាប់នូវសេចក្តីអ្វីដែលល្អ បានជួយអ្នកឲ្យស្រឡាញ់មិត្តភក្ដិ ឬក្រុមគ្រួសារដែលកំពុងជួបការលំបាក ដូចម្តេចខ្លះ? តើហេតុអ្វីសេចក្តីស្រឡាញ់ដ៏ស្មោះត្រង់ គឺជាសេចក្តីស្រឡាញ់ដ៏រឹងមាំ?
ឱព្រះយេស៊ូវ សូមព្រះអង្គរំឭកទូលបង្គំ ឲ្យប្រកាន់ខ្ជាប់សេចក្តីអ្វីដែលល្អ អស់ពីចិត្ត។ ទូលបង្គំចង់បង្ហាញអ្នកដទៃ ឲ្យស្គាល់សេចក្តីស្រឡាញ់របស់ព្រះអង្គ។
For further study, read What Do You Do with a Broken Relationship? at DiscoverySeries.org/Q0703.
គម្រោងអានព្រះគម្ពីររយៈពេល១ឆ្នាំពេញ : ហូសេ ៥-៨ និង វិវរណៈ ២
