ការបញ្ចប់ឲ្យបានល្អ
ដោយWinn Collier
December 31, 2022
ខ្ញុំបានតយុទ្ធយ៉ាងល្អ ខ្ញុំបានរត់ប្រណាំងជាស្រេច ខ្ញុំបានរក្សាសេចក្តីជំនឿទៅហើយ។ ២ធីម៉ូថេ ៤:៧ អ្នកស្រីមែន កួរ(Man Kaur) មានអាយុ១០៣ឆ្នាំហើយ តែគាត់បានចូលរួមប្រកួត ក្នុងនាមជាកីឡាករស្ត្រីឥណ្ឌាមានវ័យចំណាស់ជាងគេ ក្នុងអំឡុងពេលនៃការប្រកួតជើងឯក World Masters Athletic Championship នៅប្រទេសប៉ូឡូញ នៅឆ្នាំ២០១៩។ អ្វីដែលគួរឲ្យកត់សំគាល់នោះគឺ អ្នកស្រីមែន គួរ ឈ្នះបានមេដាយមាស៤ ក្នុងវិញ្ញាសារ៤មុខ(ការចោលលំពែង ការរត់ប្រណាំ៦០ម៉ែត្រ និងការរត់ប្រណាំ២០០ម៉ែត្រ)។ តែដែលគួរឲ្យភ្ញាក់ផ្អើលបំផុតនោះគឺ នៅឆ្នាំនោះ គាត់បានរត់លឿនជាងកាលដែលគាត់រត់ប្រណាំង នៅឆ្នាំ២០១៧។ គាត់ជាយាយតួត ដែលបានរត់ប្រណាំងចូលទៅក្នុងសតវត្សរ៍ទី២នៃជីវិតគាត់ ដោយបង្ហាញថា គាត់បានបញ្ចប់ដោយភាពរឹងមាំ។ សាវ័កប៉ុលបានសរសេរសំបុត្រផ្ញើរទៅលោកធីម៉ូថេ ដែលជាសិស្សដ៏ក្មេងវ័យ អំពីរបៀបដែលគាត់បានចូលទៅក្នុងឆ្នាំចុងក្រោយនៃជីវិតគាត់។ គាត់បានសរសេរថា “ឯពេលវេលាដែលខ្ញុំត្រូវលាទៅ ក៏បានមកដល់ហើយ”។ ផ្អែកទៅលើទីបន្ទាល់នៃជីវិតគាត់ គាត់មានទំនុកចិត្តថា គាត់កំពុងតែឈានដល់ការបញ្ចប់ ដោយភាពរឹងមាំ។ បានជាគាត់មានប្រសាសន៍ថា “ខ្ញុំបានតយុទ្ធយ៉ាងល្អ ខ្ញុំបានរត់ប្រណាំងជាស្រេច ខ្ញុំបានរក្សាសេចក្តីជំនឿទៅហើយ”(ខ.៧)។ សាវ័ករូបនេះ នៅតែស្មោះត្រង់ចំពោះព្រះយេស៊ូវ។ ទោះមានទុក្ខលំបាក ឬក្តីអំណរយ៉ាងណាក៏ដោយ ក៏គាត់នៅតែដើរតាមព្រះ ដែលបានរំដោះគាត់ឲ្យរួចផុតពីភាពហិនវិនាស។ ហើយគាត់ក៏ដឹងដែរថា ព្រះយេស៊ូវបានត្រៀមជាស្រេច ដើម្បីប្រទាន “មកុដនៃសេចក្តីសុចរិត” ជារង្វាន់ចុងក្រោយនៃក្តីអំណរ សម្រាប់ជីវិតដ៏ស្មោះត្រង់របស់គាត់(ខ.៨)។ សាវ័កប៉ុលបានលើកឡើងថា មកុដនោះមិនមែនសម្រាប់តែមនុស្សពីរបីនាក់ដែលមានភាពលេចធ្លោជាងគេប៉ុណ្ណោះទេ តែក៏សម្រាប់អស់អ្នកដែលទន្ទឹងរង់ចាំដំណើរយាងត្រឡប់មកវិញ របស់ព្រះគ្រីស្ទ(ខ.៨)។ ខណៈពេលដែលយើងកំពុងបោះជំហានចូលក្នុងឆ្នាំថ្មី ចូរយើងចាំថា ព្រះយេស៊ូវសព្វព្រះទ័យនឹងប្រទានមកុដដល់អស់អ្នកដែលស្រឡាញ់ព្រះអង្គ ហើយបានរស់នៅដោយការបញ្ចប់ដ៏រឹងមាំ។—WINN COLLIER
តើការបញ្ចប់ដោយភាពរឹងមាំ មានន័យដូចម្តេច ចំពោះអ្នក? សម្រាប់ខ្លួនអ្នកផ្ទាល់ តើនរណាខ្លះបានធ្វើជាគំរូនៃការបញ្ចប់បានល្អ?
ឱព្រះអម្ចាស់ ទូលបង្គំចង់បញ្ចប់ឲ្យបានល្អ។ សូមព្រះអង្គជួយទូលបង្គំឲ្យស្រឡាញ់ព្រះអង្គ លើសជាងអ្វីៗទាំងអស់ និងលើសមនុស្សគ្រប់គ្នា។
For further study, read Finishing Well: Gracefully Living with Life’s Changes at DiscoverySeries.org/Q0713.
គម្រោងអានព្រះគម្ពីររយៈពេល១ឆ្នាំ : ម៉ាឡាគី ១-៤ និង វិវរណៈ ២២