ការមើលឃើញជាថ្មី
ដោយKatara Patton
January 4, 2023
អញនឹងធ្វើផ្លូវ១នៅទីរហោស្ថាន ហើយទន្លេនៅសមុទ្រខ្សាច់។ អេសាយ ៤៣:១៩ មានពេលមួយ ខ្ញុំបានពាក់វ៉ែនតាដែលទើបកាត់ថ្មី ហើយបោះជំហានចូលទៅក្នុងព្រះវិហារ។ ពេលខ្ញុំអង្គុយចុះ ខ្ញុំក៏បានឃើញមិត្តភក្តិម្នាក់កំពុងអង្គុយ នៅជួរម្ខាងទៀតក្នុងព្រះវិហារ។ ពេលខ្ញុំគ្រវីដៃដាក់គាត់ ខ្ញុំមើលឃើញគាត់ច្បាស់ ដូចនៅជិតខ្ញុំទេ។ ខ្ញុំមានអារម្មណ៍ថា ខ្ញុំអាចឈោងទៅរកគាត់ ទោះគាត់កំពុងអង្គុយនៅចម្ងាយបួនប្រាំម៉ែត្រពីខ្ញុំក៏ដោយ។ ក្រោយមក ពេលយើងជជែកគ្នា បន្ទាប់ពីកម្មវិធីថ្វាយបង្គំចប់ ខ្ញុំក៏បានដឹងថា គាត់បានអង្គុយនៅកន្លែងដដែលទេ។ តាមពិត ខ្ញុំអាចមើលឃើញគាត់ច្បាស់ជាងមុន និងនៅជិតជាងមុន គឺដោយសារខ្ញុំបានពាក់វ៉ែនតាថ្មី។ កាលព្រះទ្រង់មានបន្ទូលតាមរយៈហោរាអេសាយ ព្រះអង្គជ្រាបថា ពួកអ៊ីស្រាអែលដែលកំពុងរស់នៅជាឈ្លើយសឹក ក្នុងចក្រភពបាប៊ីឡូន ចាំបាច់ត្រូវមានការមើលឃើញជាថ្មី។ ព្រះអង្គប្រាប់ពួកគេថា “អញនឹងធ្វើការ១ថ្មីវិញ ការនោះនឹងលេចឡើងឥឡូវ តើឯងរាល់គ្នានឹងមិនស្គាល់ទេឬ អញនឹងធ្វើផ្លូវ១នៅទីរហោស្ថាន ហើយទន្លេនៅសមុទ្រខ្សាច់”(អេសាយ ៤៣:១៩)។ ហើយព្រះបន្ទូលនៃសេចក្តីសង្ឃឹមរបស់ព្រះអង្គ បានរំឭកពួកគេថា ព្រះអង្គបានបង្កើតពួកគេ ប្រោសលោះពួកគេ ហើយនឹងគង់នៅជាមួយពួកគេ។ ព្រះអង្គបានលើកទឹកចិត្តពួកគេថា ពួកគេជាកម្មសិទ្ធិរបស់ព្រះអង្គ(ខ.១)។ ទោះអ្នកកំពុងជួបប្រទះបញ្ហាអ្វីក៏ដោយនៅថ្ងៃនេះ ព្រះវិញ្ញាណបរិសុទ្ធអាចប្រទាននូវការមើលឃើញដែលល្អជាងមុន ដល់អ្នក។ ដោយសេចក្តីស្រឡាញ់របស់ព្រះអង្គ(ខ.៤) យើងអាចឃើញការជាច្រើន ដែលព្រះអង្គកំពុងធ្វើនៅជុំវិញខ្លួនយើង។ តើអ្នកអាចមើលឃើញការអ្វីដែលព្រះអង្គកំពុងធ្វើ នៅពេលដែលអ្នកកំពុងមានការឈឺចាប់ និងជាប់ចំណងឬទេ? ចូរយើងមានការមើលឃើញជាថ្មីខាងវិញ្ញាណ ដើម្បីមើលឃើញការថ្មីៗ ដែលព្រះអង្គកំពុងធ្វើ សូម្បីតែនៅក្នុងវាលរហោស្ថានខាងវិញ្ញាណរបស់យើងក៏ដោយ។—KATARA PATTON
តើមានការថ្មីអ្វីខ្លះ ដែលអ្នកបានឃើញព្រះអង្គធ្វើ ក្នុងវាលរហោស្ថានខាងវិញ្ញាណរបស់អ្នក? តើការផ្លាស់ប្តូរការមើលឃើញ មានប្រយោជន៍យ៉ាងណាខ្លះ សម្រាប់អ្នក ក្នុងការផ្ដោតទៅលើការថ្មី ជាជាងផ្ដោតទៅលើអតីតកាល?
ឱព្រះនៃការចាប់ផ្តើមជាថ្មី ទូលបង្គំសូមអរព្រះគុណសម្រាប់ព្រះបន្ទូលសន្យាទាំងអស់ ដែលព្រះអង្គបានប្រទាន។ សូមព្រះអង្គជួយទូលបង្គំ ឲ្យមើលឃើញការថ្មី ដែលព្រះអង្គបានធ្វើ សូម្បីតែក្នុងពេលដែលហូតហែងបំផុត។
For further study, read When God Says No—Broken Dreams to New Beginnings at DiscoverySeries.org/Q0736.
គម្រោងអានព្រះគម្ពីររយៈ១ឆ្នាំ : លោកុប្បត្តិ ១០-១២ និង ម៉ាថាយ ៤