គាត់ទូលឆ្លើយថា ឱព្រះអម្ចាស់អើយ ព្រះអង្គណានុ៎ះ? កិច្ចការ ៩:៥
កាលយុវជន លូអ៊ីស រ៉តឌ្រីគេស(Luis Rodriguez) ស្ថិតក្នុងវ័យ១៦ឆ្នាំ គាត់បានជាប់គុក ពីបទជួញដូរគ្រឿងញៀន។ តែឥឡូវនេះ គាត់ត្រូវប៉ូលិសចាប់ខ្លួនពីបទប៉ុនប៉ងមនុស្សឃាត។ គាត់ទំនងជាត្រូវជាប់គុកអស់មួយជីវិត។ តែព្រះទ្រង់បានមានបន្ទូលមកកាន់គាត់ ក្នុងពេលដែលគាត់កំពុងមានទោស។ កាលគាត់កំពុងជាប់គុក យុវជនរូបនេះក៏បាននឹកចាំថា កាលពីក្មេង ម្តាយគាត់បាននាំគាត់ទៅព្រះវិហារ ដោយចិត្តស្មោះត្រង់ចំពោះព្រះ។ ឥឡូវនេះ គាត់ជឿថា ព្រះកំពុងធ្វើការក្នុងចិត្តគាត់។ ទីបំផុត លូអ៊ីសក៏បានប្រែចិត្តចេញពីបាប ហើយក៏បានទទួលជឿព្រះយេស៊ូវ។
ក្នុងកណ្ឌគម្ពីរកិច្ចការ យើងឃើញថា មានពួកឧស្សាហ៍ក្នុងសាសន៍យូដាម្នាក់ ឈ្មោះ សូល ដែលក្រោយមក បានក្លាយជាសាវ័កប៉ុល។ គាត់បានប្រព្រឹត្តអំពើបាប ដោយការបៀតបៀនអ្នកជឿព្រះយេស៊ូវ ហើយក៏មានចិត្តចង់សម្លាប់ពួកគេទៀតផង(កិច្ចការ ៩:១)។ មានភស្តុតាងបង្ហាញថា គាត់ជាអ្នកដឹកនាំក្រុមជនដៃដល់ ហើយក៏មានចំណែកនៅក្នុងចំណោមហ្វូងមនុស្សដែលបានប្រហារជីវិតលោកស្ទេផាន ដោយចោលនឹងថ្មី(៧:៥៨)។ តែក្រោយមក ព្រះទ្រង់បានមានបន្ទូលមកកាន់គាត់ដោយផ្ទាល់។ តាមផ្លូវទៅទីក្រុងដាម៉ាស់ មានពន្លឺមួយបានលេចឡើង ធ្វើឲ្យលោកសូលខ្វាក់ភ្នែក ហើយព្រះយេស៊ូវក៏បានមានបន្ទូលមកគាត់ថា “ហេតុអ្វីបានជាអ្នកបៀតបៀនដល់ខ្ញុំដូច្នេះ?”(៩:៤)។ គាត់ក៏បានទូលសួរព្រះអង្គថា “ឱព្រះអម្ចាស់អើយ ព្រះអង្គណានុ៎ះ?”(ខ.៥) គាត់ក៏បានទទួលជឿព្រះយេស៊ូវ ហើយជីវិតថ្មីរបស់គាត់ក៏បានចាប់ផ្តើម តាំងពីពេលនោះមក។
លោកលូអ៊ីស រ៉តឌ្រីកេសបានជាប់គុកមួយរយៈ ហើយទីបំផុតក៏ត្រូវបានដោះលែង មុនពេលកំណត់។ ចាប់តាំងពីពេលនោះមក គាត់បានបម្រើព្រះ ដោយការប្ដេជ្ញាចិត្ត ក្នុងការឈោងចាប់អ្នកទោស នៅសហរដ្ឋអាមេរិក និងតំបន់អាមេរិកកណ្តាល។
ព្រះទ្រង់មានឯកទេសប្រោសលោះយើង ឲ្យរួចផុតពីសេចក្តីអាក្រក់បំផុត ដែលយើងមានក្នុងជីវិត។ ព្រះអង្គធ្វើការក្នុងចិត្តយើង ហើយមានបន្ទូលមកកាន់ជីវិតដែលមានពេញដោយអំពើបាប។ ពេលនេះ ប្រហែលជាពេលដែលយើងត្រូវប្រែចិត្តចេញពីបាប ហើយសូមឲ្យព្រះអង្គលាងជម្រះយើង។—KENNETH PETERSEN
តើអ្នកកំពុងមានបាបអ្វី ដែលមិនបានសូមឲ្យព្រះអង្គអត់ទោសឲ្យ? តើអ្នកបានដឹងថា ព្រះទ្រង់កំពុងត្រាស់ហៅអ្នក ឲ្យងាកមករកព្រះអង្គវិញយ៉ាងដូចម្តេចខ្លះ?
ឱព្រះយេស៊ូវ ទូលបង្គំបានវង្វេងចេញពីព្រះអង្គ តែព្រះអង្គកំពុងធ្វើការក្នុងចិត្តទូលបង្គំ។ សូមព្រះអង្គអត់ទោសបាប ឲ្យទូលបង្គំ។
For further study, read The Forgiveness of God at DiscoverySeries.org/Q0602.
គម្រោងអានព្រះគម្ពីររយៈ១ឆ្នាំ : លោកុប្បត្តិ ១៨-១៩ និង ម៉ាថាយ ៦:១-១៨
