ព្រះនៃទូលបង្គំទ្រង់បានចាត់ទេវតារបស់ទ្រង់ ឲ្យមកបិទមាត់សិង្ហទាំងអស់។ ដានីយ៉ែល ៦:២២
កាលលោកថាហឺ(Taher) និងភរិយាគាត់ឈ្មោះ ដុនយ៉ា(Donya) ក្លាយជាអ្នកជឿព្រះយេស៊ូវ ពួកគេក៏បានដឹងផងដែរថា ពួកគេអាចជួបការបៀតបៀន ក្នុងប្រទេសកំណើតរបស់ខ្លួន។ ជាការពិតណាស់ ថ្ងៃមួយ លោកថាហឺត្រូវគេចាប់ខ្លួន ដោយរុំភ្នែក ដាក់ខ្នោះ និងដាក់គុក ដោយការចោទប្រកាន់ពីបទបោះបង់ចោលសាសនាដើម។ មុនពេលពួកគេបង្ហាញខ្លួន នៅកន្លែងជំនុំជម្រះទោស គាត់និងភរិយាគាត់បានប្ដេជ្ញាចិត្តថា នឹងមិនក្បត់ព្រះយេស៊ូវឡើយ។
ការអ្វីដែលបានកើតឡើងនៅក្នុងតុលាការបានធ្វើឲ្យគាត់មានការភ្ញាក់ផ្អើលយ៉ាងខ្លាំង។ ពេលនោះ ចៅក្រមបាននិយាយថា “ខ្ញុំមិនដឹងថាមកពីហេតុអ្វីទេ តែខ្ញុំចង់យកអ្នកចេញពីមាត់ត្រីបាឡែន និងមាត់តោ”។ បន្ទាប់មក ថេហឺក៏បានដឹងថា ព្រះទ្រង់កំពុងធ្វើការ ហើយគាត់អាចបកស្រាយថា ចៅក្រមនោះកំពុងដកស្រង់ខគម្ពីរពីរ ក្នុងព្រះគម្ពីរប៊ីប(មើលយ៉ូណាស ២ និងដានីយ៉ែល ៦)។ គេក៏បានដោះលែងលោកថេហឺឲ្យមានសេរីភាព ហើយក្រោយមក ក្រុមគ្រួសារគាត់ត្រូវគេនិរទេស ឲ្យទៅរស់នៅកន្លែងផ្សេង។
ការដោះលែងលោកថេហឺ ដ៏គួរឲ្យភ្ញាក់ផ្អើលនេះគឺបានរំឭកយើង អំពីរឿងលោកដានីយ៉ែល។ ក្នុងនាមគាត់ជាមន្ត្រីដែលមានសមត្ថភាពគេនឹងដំឡើងថានៈគាត់ បណ្តាលឲ្យមន្ត្រីដទៃទៀតមានការច្រណែន(ដានីយ៉ែល ៦:៣-៥)។ ពួកគេក៏បានរៀបគម្រោងកំចាត់គាត់ចោល ដោយបញ្ចុះបញ្ចូលស្តេចដារីយុស ឲ្យបង្កើតច្បាប់តម្រូវឲ្យគេអធិស្ឋានទៅរកស្តេចតែមួយអង្គប៉ុណ្ណោះ តែដានីយ៉ែលមិនអើពើចំពោះរឿងនេះឡើយ។ ស្តេចដារីយុសគ្មានជម្រើសអ្វី ក្រៅពីឲ្យគេចាប់គាត់បោះចូលទៅក្នុងរូងតោ(ខ.១៦)។ តែព្រះទ្រង់បានរំដោះដានីយ៉ែល ហើយបានសង្គ្រោះគាត់ឲ្យរួចពីសេចក្តីស្លាប់(ខ.២៧) គឺដូចដែលព្រះអង្គបានជួយសង្គ្រោះលោកថេហឺ តាមរយៈការសម្រេចរបស់តុលាការ ឲ្យគាត់រួចទោស។
សព្វថ្ងៃនេះ អ្នកជឿព្រះជាច្រើនបានរងទុក្ខ ដោយសារការដើរតាមព្រះយេស៊ូវ ហើយជួនកាល ក៏ត្រូវគេសម្លាប់ ដោយសារជំនឿ។ ពេលណាយើងជួបការបៀតបៀន យើងអាចឈរឲ្យមាំក្នុងជំនឿ ដោយដឹងថា ព្រះទ្រង់អាចធ្វើការ តាមរបៀបដែលយើងមិននឹកស្មានដល់។ ចូរដឹងថា ព្រះអង្គគង់នៅជាមួយអ្នកជានិច្ច ទោះអ្នកកំពុងតែជួបប្រទះសង្គ្រាមអ្វីក៏ដោយ។—AMY BOUCHER PYE
តើអ្នកនឹងឆ្លើយតបយ៉ាងណា អំពីរឿងនៃការដោះលែងរបស់លោកថេហឺ? តើអ្នកអាចទុកចិត្តលើព្រះចេស្ដាដែលគ្មានដែនកំណត់របស់ព្រះ ដូចម្តេចខ្លះ?
ឱព្រះដ៏ជួយសង្គ្រោះ សូមព្រះអង្គជួយទូលបង្គំឲ្យទុកចិត្តព្រះអង្គ ពេលណាទូលបង្គំមានអារម្មណ៍ថា មានឧបសគ្គដែលទូលបង្គំមិនអាចជម្នះបាន។
For further study, read Compassion: When Jesus Asks for More than We Have at DiscoverySeries.org/courses/learning-compassion-when-jesus-asks-for-more-than-we-have/
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ២៧-២៨ និង ម៉ាថាយ ៨:១៨-៣៤
