មានចិត្តស្រេកឃ្លានយុត្តិធម៌
ដោយKaren Pimpo
January 16, 2023
មានពរហើយ អស់អ្នកដែលស្រេកឃ្លាននូវសេចក្តីសុចរិត ដ្បិតអ្នកទាំងនោះនឹងបានឆ្អែត។ ម៉ាថាយ ៥:៦ ហេតុការណ៍ដ៏តក់ស្លុតនៃការធ្វើឃាតលោកបណ្ឌិត ម៉ាទីន លូស័រ ឃីង(Dr. Martin Luther King Jr.) បានកើតឡើង ក្នុងពេលដែលចលនាទាមទារសិទ្ធិជនស៊ីវិលនៅអាមេរិក បានឈានដល់ចំណុចខ្ពស់បំផុត ក្នុងទសវត្សរ៍ឆ្នាំ១៩៦០។ តែ៤ថ្ងៃក្រោយមក អ្នកស្រីខូរេតា ស្កត់ ឃីង(Coretta Scott King) ដែលជាភរិយារបស់គាត់ ក៏បានបន្តដឹកនាំបាតុកម្ម ដោយចិត្តក្លាហានជំនួសគាត់។ អ្នកស្រីខូរេតាមានចិត្តឆេះឆួល នៅក្នុងការទាមទាយុត្តិធម៌ ហើយបានដឹកនាំចលនាសំខាន់ៗជាច្រើនទៀត ដោយចិត្តក្លាហាន។ ព្រះយេស៊ូវមានបន្ទូលថា “មានពរហើយ អស់អ្នកដែលស្រេកឃ្លាននូវសេចក្តីសុចរិត ដ្បិតអ្នកទាំងនោះនឹងបានឆ្អែត”(ម៉ាថាយ ៥:៦)។ យើងដឹងថា ព្រះទ្រង់នឹងយាងត្រឡប់មកវិញ ដើម្បីប្រទាននូវសេចក្តីយុត្តិធម៌ ក្នុងការជំនុំជម្រះចុងក្រោយ តែទំរាំតែដល់ពេលនោះ យើងមានឱកាសចូលរួម នាំឲ្យយុត្តិធម៌របស់ព្រះអង្គកើតមាន នៅលើផែនដី ដូចអ្នកស្រីខូរេតាផងដែរ។ បទគម្ពីរអេសាយ ជំពូក ៥៨ បានចែងច្បាស់ នូវការអ្វីដែលព្រះទ្រង់ត្រាស់ហៅរាស្រ្តព្រះអង្គ ឲ្យធ្វើ ដូចជា ដោះច្រវ៉ាក់ដ៏អយុត្តិធម៌ ដោះលែងអ្នកដែលគេសង្កត់សង្កិន ចែកអាហារដល់អ្នកអត់ឃ្លាន … ផ្តល់ជម្រកដល់អ្នកក្រ … ឲ្យសម្លៀកបំពាក់ដល់អ្នកដែលគ្មានខោអាវ ហើយកុំងាកចេញពីមនុស្សដែលត្រូវការជំនួយ(ខ.៦-៧)។ ការស្វែងរកយុត្តិធម៌សម្រាប់អ្នកដែលគេសង្កត់សង្កិន និងអ្នកទន់ខ្សោយ គឺជារបៀបដែលយើងនាំគេឲ្យងាកទៅរកព្រះ។ ហោរាអេសាយបានសរសេរថា រាស្រ្តទ្រង់ដែលស្វែងរកយុត្តិធម៌ គឺប្រៀបដូចជាពន្លឺនៅពេលព្រឹក ហើយនាំមកនូវការប្រោសឲ្យជាសម្រាប់ខ្លួនឯង និងអ្នកដទៃផងដែរ(ខ.៨)។ នៅថ្ងៃនេះ សូមព្រះទ្រង់ជួយយើង ឲ្យមានចិត្តស្រេកឃ្លានរកសេចក្តីសុចរិតរបស់ព្រះអង្គ នៅលើផែនដីនេះ។ ព្រះគម្ពីរចែងថា យើងនឹងមានចិត្តស្កប់ស្កល់ ពេលណាយើងស្វែងរកសេចក្តីយុត្តិធម៌ តាមផ្លូវព្រះអង្គ និងដោយអំណាចរបស់ព្រះអង្គ។—KAREN PIMPO
តើមានអំពើអយុត្តិធម៌អ្វី ដែលកំពុងទាក់ទាញចំណាប់អារម្មណ៍របស់អ្នក? តើអ្នកអាចបោះជំហានទៅមុខ ឆ្ពោះទៅរកការធ្វើអ្វីដែលត្រឹមត្រូវ និងយុត្តិធម៌នៅថ្ងៃនេះ យ៉ាងដូចម្តេចខ្លះ?
ឱព្រះអម្ចាស់ សូមព្រះអង្គប្រទានទូលបង្គំនូវចិត្តស្រេកឃ្លានយុត្តិធម៌។ សូមព្រះអង្គជួយទូលបង្គំឲ្យធ្វើជាផ្នែកមួយនៃព្រះរាជកិច្ចព្រះអង្គ ក្នុងការធ្វើអ្វីដែលត្រឹមត្រូវ។
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ៣៩-៤០ និង ម៉ាថាយ ១១