ជួយសង់គ្រឹះឲ្យក្មេងៗ
ដោយAlyson Kieda
January 25, 2023
ចូរបង្ហាត់កូនក្មេង ឲ្យប្រព្រឹត្តតាមផ្លូវដែលគួរប្រព្រឹត្តនោះវានឹងមិនលះបង់ពីផ្លូវនោះដរាបដល់ចាស់។ សុភាសិត ២២:៦ ក្នុងខ្សែភាពយន្តភាគ ដែលគេបានចាក់បញ្ចាំងនៅតាមទូរទស្សន៍ មានចំណងជើងថា ការសម្ដែងរបស់លោកអ៊ែនឌី គ្រីហ្វ៊ីត(Andy Griffith) មានបុរសម្នាក់ប្រាប់លោកអ៊ែនឌីថា គាត់គួរតែឲ្យកូនគាត់ ឈ្មោះ អូភី(Opie) ធ្វើការសម្រេចចិត្តរស់នៅ តាមចិត្តរបស់ខ្លួន។ លោកអ៊ែនឌីបានបដិសេធន៍។ គាត់ប្រកែកថា “អ្នកមិនអាចឲ្យក្មេងៗធ្វើការសម្រេចចិត្តដោយខ្លួនឯងបានទេ។ ពួកគេនឹងចាប់យករបស់អ្វីដែលមានពន្លឺភ្លឺផ្លេកៗមុនគេ ដែលមានភាពទាក់ទាញដូចអំណោយដ៏មានតម្លៃ។ បន្ទាប់មក នៅពេលដែលពួកគេបានដឹងថា វាគ្រាន់តែជានុយបញ្ឆោតប៉ុណ្ណោះ នោះគឺយឺតពេលហើយ។ គេបានវេចខ្ចប់គំនិតមិនត្រឹមត្រូវ ក្នុងកញ្ចប់អំណោយដែលបញ្ចេញពន្លឺផ្លេកៗ ដែលមានការទាក់ទាញពួកគេយ៉ាងខ្លាំង បានជាយើងពិបាកណែនាំពួកគេឲ្យជឿថា មានជម្រើសផ្សេងទៀត ដែលល្អជាងនេះ ក្នុងរយៈពេលដ៏យូរអង្វែង”។ គាត់ក៏បានសន្និដ្ឋានថា ហេតុនេះហើយ ឪពុកម្តាយចាំបាច់ត្រូវធ្វើជាគំរូល្អដល់កូន ដើម្បីកុំឲ្យពួកគេងាយចាញ់ការល្បួង។ ពាក្យសម្តីរបស់លោកអ៊ែនឌ្រូ បានធ្វើឲ្យខ្ញុំនឹកចាំ អំពីប្រាជ្ញា ដែលឃើញមាន នៅក្នុងបទគម្ពីរសុភាសិត ដែលបានចែងថា “ចូរបង្ហាត់កូនក្មេង ឲ្យប្រព្រឹត្តតាមផ្លូវដែលគួរប្រព្រឹត្ត នោះវានឹងមិនលះបង់ពីផ្លូវនោះដរាបដល់ចាស់”(២២:៦)។ មនុស្សជាច្រើនដែលបានអានខគម្ពីរនេះ ប្រហែលជាគិតថា ខគម្ពីរនេះជាការសន្យា តែខគម្ពីរនេះជាគោលការដ៏សំខាន់សម្រាប់គ្រួសារនីមួយៗអនុវត្តតាម។ ព្រះទ្រង់បានត្រាស់ហៅយើងម្នាក់ៗ ឲ្យធ្វើការសម្រេចចិត្តទទួលជឿព្រះយេស៊ូវ ដោយផ្ទាល់ខ្លួន។ តែយើងអាចជួយសង់គ្រឹះរបស់មនុស្សជំនាន់ក្រោយ ស្របតាមព្រះគម្ពីរ តាមរយៈសេចក្តីស្រឡាញ់ដែលយើងមានចំពោះព្រះ និងព្រះគម្ពីរ។ ហើយខណៈពេលដែលក្មេងៗកំពុងស្ថិតក្រោមការថែរក្សារបស់យើង យើងអាចអធិស្ឋានថា សូមឲ្យពួកគេសម្រេចចិត្តទទួលព្រះគ្រីស្ទជាព្រះអង្គសង្គ្រោះ ហើយដើរតាមផ្លូវព្រះអង្គ មិនមែនតាមផ្លូវរបស់មនុស្សអាក្រក់នោះឡើយ(ខ.៥)។ ជ័យជម្នះដែលយើងមានមកលើការល្បួង ដោយជំនួយពីព្រះវិញ្ញាណបរិសុទ្ធ ក៏ជាទីបន្ទាល់ដ៏មានអំណាចផងដែរ។ ព្រះវិញ្ញាណរបស់ព្រះយេស៊ូវ ជួយយើងឲ្យឈ្នះការល្បួង ហើយកែប្រែជីវិតយើង ឲ្យក្លាយជាគំរូល្អ ដែលសក្តិសមនឹងឲ្យគេយកតម្រាប់តាម។—ALYSON KIEDA
ហេតុអ្វីយើងចាំបាច់ត្រូវចាំថា បទគម្ពីរសុភាសិត ២២:៦ មិនមែនជាការសន្យា តែជាគោលការណ៍ដ៏ឆ្លាតវ័យ? តើអ្នកអាចបង្រៀននរណាខ្លះ ជាមនុស្សជំនាន់ក្រោយ ឲ្យដើរតាមផ្លូវរបស់ព្រះ?
ឱព្រះវរបិតា សូមព្រះអង្គប្រើទូលបង្គំ ឲ្យដាក់គោលតម្លៃព្រះអង្គជាប់ក្នុងចិត្តរបស់ក្មេងៗ ដែលព្រះអង្គបានដាក់ក្នុងជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ : និក្ខមនំ ១២-១៣ និង ម៉ាថាយ ១៦