សេចក្តីស្រឡាញ់ដែលមានការអត់ទោស
ដោយLisa Samra
January 26, 2023
ហើយទ្រាំទ្រគ្នា ទាំងអត់ទោសទៅវិញទៅមក។ កូល៉ុស ៣:១៣ ឪពុកក្មេកខ្ញុំ មានប្អូនប្រុសឈ្មោះភីត(Pete) ដែលបានរៀបការជាមួយអ្នកស្រីរស់(Ruth) អស់រយៈពេល៨០ឆ្នាំហើយ។ គូស្វាមីភរិយានេះបានធ្វើកម្មវិធីខួបអាពាហ៍ពិពាហ៍គំរប់៨០ឆ្នាំ ដ៏គួរឲ្យកត់សំគាល់ នៅថ្ងៃទី៣១ ខែឧសភា ឆ្នាំ២០២១។ អ្នកទាំងពីរបានជួបគ្នាជាលើកដំបូង នៅឆ្នាំ១៩៤១ ដោយមិនបានព្រៀងទុក កាលអ្នកស្រីរស់កំពុងរៀននៅវិទ្យាល័យ។ ក្រោយមក គូរស្នេហ៍វ័យក្មេងនេះមានចិត្តអន្ទះសាចង់រៀបការណាស់ ហើយពួកគេក៏បានសម្រេចបំណង បន្ទាប់ពីអ្នកស្រីរស់បានរៀនចប់។ លោកភីទ និងអ្នកស្រីរស់ ជឿថា ព្រះទ្រង់បានរៀបចំឲ្យពួកគាត់ជួបគ្នា ហើយបានដឹកនាំពួកគេក្នុងរយៈពេលជាច្រើនឆ្នាំកន្លងមកនេះ។ លោកភីត និងអ្នកស្រីរស់បានគិតអំពីជីវិតអាពាហ៍ពិពាហ៍របស់ខ្លួន ដែលមានរយៈពេល៨ទសវត្សរ៍ ហើយបានយល់ស្របថា ការសម្រេចចិត្តអត់ទោសឲ្យគ្នា គឺជាគន្លឹះដែលជួយទ្រទ្រង់ទំនាក់ទំនងរបស់ពួកគេ។ អ្នកដែលមានទំនាក់ទំនងរឹងមាំ សុទ្ធតែដឹងថា យើងម្នាក់ៗត្រូវការការអត់ឱនទោសឲ្យគ្នាជាទៀងទាត់ បន្ទាប់ពីយើងបានធ្វើឲ្យមានការឈឺចាប់ មកលើគ្នាទៅវិញទៅមក ទោះតាមរយៈពាក្យសម្ដីអាក្រក់ ការធ្វើខុសពាក្យសន្យា ឬភ្លេចធ្វើអ្វីមួយសម្រាប់គ្នាក៏ដោយ។ ក្នុងការបង្រៀនអ្នកជឿព្រះយេស៊ូវ ឲ្យរស់នៅដោយការរួបរួមគ្នា សាវ័កប៉ុលបានលើកឡើង អំពីតួនាទីដ៏សំខាន់នៃការអត់ឱនទោសឲ្យគ្នាទៅវិញទៅមក។ គាត់បានជំរុញពួកជំនុំឲ្យជ្រើសរើសយក “ចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(កូល៉ុស ៣:១២)។ បន្ទាប់មក គាត់ក៏បានលើកទឹកចិត្តពួកគេឲ្យ “អត់ទោសឲ្យគ្នាទៅវិញទៅមក បើអ្នកណាមានហេតុទាស់នឹងអ្នកណា”(ខ.១៣)។ ដែលសំខាន់បំផុតនោះ ត្រូវទំនាក់ទំនងគ្នា ដោយសេចក្តីស្រឡាញ់(ខ.១៤)។ ប្រភេទនៃទំនាក់ទំនងដែលមានចារិកលក្ខណៈដូចដែលសាវ័កប៉ុលបានលើកឡើង គឺជាព្រះពរ។ សូមព្រះទ្រង់ជួយយើងរាល់គ្នា ឲ្យបង្កើតទំនាក់ទំនងដ៏រឹងមាំ ដែលមានសេចក្តីស្រឡាញ់ និងការអត់ឱនទោស។—LISA M. SAMRA
តើអ្នកបានទទួលការប្រោសឲ្យជាដូចម្តេចខ្លះ តាមរយៈការអត់ទោស ឬទទួលការអត់ទោស? តើទំនាក់ទំនងរបស់អ្នកមានភាពរឹងមាំប៉ុណ្ណា ពេលដែលអ្នកមានការអត់ទោសឲ្យគ្នាទៅវិញទៅមក និងការទទួលខុសត្រូវ?
ឱព្រះយេស៊ូវ សូមព្រះអង្គជួយទូលបង្គំឲ្យអត់ទោសឲ្យអ្នកដទៃ ដូចដែលព្រះអង្គបានអត់ទោសបាបឲ្យទូលបង្គំ។
គម្រោងអានព្រះគម្ពីររយៈពេល១ឆ្នាំ : និក្ខមនំ ១៤-១៥ និង ម៉ាថាយ ១៧