អំណោយដែលយើងមិនសមទទួល
ដោយKaren Pimpo
February 11, 2023
ព្រះគ្រីស្ទយេស៊ូវទ្រង់បានយាងមកក្នុងលោកីយ៍ ដើម្បីនឹងជួយសង្គ្រោះមនុស្សមានបាប ដែលខ្ញុំនេះជាលេខ១ក្នុងពួកគេ។ ១ធីម៉ូថេ ១:១៥ ថ្មីៗនេះ ខ្ញុំមានការភ្ញាក់ផ្អើល ពេលដែលបានទទួលអំណោយពីមិត្តភក្តិខ្ញុំ។ ខ្ញុំគិតថា ខ្ញុំមិនសមនឹងទទួលអំណោយល្អយ៉ាងនេះ ពីនាងឡើយ។ នាងបានផ្ញើអំណោយនោះមកខ្ញុំ បន្ទាប់ពីបានដឹងថា ខ្ញុំកំពុងមានភាពតប់ប្រមល់នឹងការងារ។ តែនាងក៏កំពុងតែមានភាពតប់ប្រមល់ផងដែរ ដោយសារការជាប់រវល់ថែរក្សាឪពុកម្តាយចាស់ជរា ចិញ្ចឹមកូនដែលបង្កបញ្ហាជាច្រើន ទទួលរងសំពាធការងារ និងមានបញ្ហាទំនាក់ទំនងប្តីប្រពន្ធ។ ខ្ញុំមិននឹកស្មានសោះថា នាងបានគិតពីខ្ញុំច្រើនជាងខ្លួនឯង ហើយអំណោយដ៏សាមញ្ញរបស់នាងបានធ្វើឲ្យខ្ញុំរំភើបចិត្តឡើងស្រក់ទឹកភ្នែក។ តាមពិត យើងរាល់គ្នាសុទ្ធតែជាអ្នកទទួលអំណោយមួយ ដែលយើងមិនសមនឹងទទួល។ គឺដូចដែលសាវ័កប៉ុលបានបង្រៀនថា “ព្រះគ្រីស្ទយេស៊ូវទ្រង់បានយាងមកក្នុងលោកីយ៍ ដើម្បីនឹងជួយសង្គ្រោះមនុស្សមានបាប ដែលខ្ញុំនេះជាលេខ១ក្នុងពួកគេ”(១ធីម៉ូថេ ១:១៥)។ ទោះកាលពីមុន គាត់ “ជាអ្នកប្រមាថ ធ្វើទុក្ខបៀតបៀន ហើយព្រហើន” តែព្រះគុណរបស់ព្រះអម្ចាស់នៃយើងចាក់បង្ហូរមកលើគាត់ ជាបរិបូរ(ខ.១៣-១៤)។ ព្រះយេស៊ូវដែលមានព្រះជន្មរស់ឡើងវិញ បានបណ្តាលចិត្តសាវ័កប៉ុលឲ្យយល់ច្បាស់ អំពីអំណោយនៃព្រះគុណ ដែលព្រះអង្គបានប្រទានមកដោយឥតគិតថ្លៃ។ ជាលទ្ធផល គាត់ក៏បានយល់អត្ថន័យនៃការមិនសក្តិសមនឹងទទួលអំណោយនោះ ហើយគាត់ក៏បានក្លាយជាឧបករណ៍ដ៏មានអំណាច នៃសេចក្តីស្រឡាញ់របស់ព្រះ ហើយក៏បានប្រាប់មនុស្សជាច្រើន អំពីការអ្វីដែលព្រះទ្រង់បានធ្វើសម្រាប់គាត់។ ដោយសារព្រះគុណព្រះ យើងទទួលសេចក្តីស្រឡាញ់ ជាជាងទទួលការថ្កោលទោស និងសេចក្តីមេត្តា ជាជាងការជំនុំជម្រះ។ នៅថ្ងៃនេះ ចូរយើងអបអរព្រះគុណដែលយើងមិនសមនឹងទទួល ដែលព្រះបានប្រទាន និងស្វែងរកវិធីបង្ហាញអ្នកដទៃឲ្យស្គាល់ព្រះគុណព្រះអង្គផងដែរ។—KAREN PIMPO
តើអ្នកបានភ្លេចអំណោយនៃព្រះគុណដ៏អស្ចារ្យ យ៉ាងដូចម្តេចខ្លះ? តើការបណ្តាលចិត្តជាថ្មី ដោយព្រះគុណព្រះ មានលក្ខណៈដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យយល់កាន់តែច្បាស់ អំពីអត្ថន័យនៃការនាំអ្នកដទៃ ឲ្យទទួលព្រះគុណព្រះអង្គ។
គម្រោងអានព្រះគម្ពីររយៈពេល១ឆ្នាំ : លេវីវិន័យ ១១-១២ និង ម៉ាថាយ ២៦:១-២៥