ឥតលួចបំបាត់ឡើយ ត្រូវសំដែងខ្លួនជាស្មោះត្រង់ល្អគ្រប់ជំពូក ដើម្បីឲ្យបានតាក់តែងសេចក្តីបង្រៀនរបស់ព្រះ ដ៏ជាព្រះអង្គសង្គ្រោះនៃយើងរាល់គ្នា ក្នុងគ្រប់ការទាំងអស់។ ទីតុស ២:១០
កាលឆ្នាំ ១៩១៧ ពេលដែលលោក នែលសិន(Nelson) មានអាយុ ២៣ឆ្នាំ គាត់បានបញ្ចប់ការសិក្សានៅសាលាពេទ្យ ក្នុងរដ្ឋវើជីនា ដែលជាស្រុកកំណើតរបស់គាត់។ ហើយគាត់ក៏បានទៅប្រទេសចិន ដើម្បីធ្វើការជាប្រធានមន្ទីរពេទ្យសេចក្តីស្រឡាញ់ និងមេត្តាករុណា ដែលជាមន្ទីរពេទ្យតែមួយ ក្នុងតំបន់ដែលមានជនជាតិចិន២លាននាក់ កំពុងរស់នៅ។ លោកនែលសិនបានរស់នៅជាមួយគ្រួសារគាត់ ក្នុងតំបន់នេះ អស់រយៈពេល២៤ឆ្នាំ ដោយគ្រប់គ្រងមន្ទីរពេទ្យ ធ្វើការវះកាត់ និងផ្សាយដំណឹងល្អដល់មនុស្សរាប់ពាន់នាក់។ ពីដំបូងជនជាតិចិនបានហៅលោកនែលសិន ប៊ែលថា “បីសាចបរទេស” ដោយសារគេមិនទុកចិត្តជនបរទេស។ តែក្រោយមក គេក៏បានហៅគាត់ថា “អ្នកប្រុសប៊ែល ជាអ្នកស្រឡាញ់ប្រជាជនចិន”។ ក្រោយមក កូនស្រីរបស់គាត់ក៏បានរៀបការជាមួយអ្នកផ្សាយដំណឹងល្អ ឈ្មោះ ប៊ីលី ក្រាហាំ(Billy Graham)។
ទោះលោកនែលសិន ជាពេទ្យផ្នែកវះកាត់ដ៏ចំណាន និងជាគ្រូបង្រៀនព្រះគម្ពីរក៏ដោយ ក៏មនុស្សជាច្រើនបានចូលមករកព្រះយេស៊ូវ តាមរយៈគាត់ មិនមែនដោយសារជំនាញរបស់គាត់នោះទេ តែដោយសារចរិយាសម្បត្តិ និងរបៀបដែលគាត់រស់នៅ ស្របតាមដំណឹងល្អ។ ក្នុងសំបុត្រដែលសាវ័កប៉ុលបានសរសេរផ្ញើទៅលោកទីតុស ជាអ្នកដឹកនាំសាសន៍ដទៃ ក្នុងពួកជំនុំនៅកោះក្រេត គាត់បានមានប្រសាសន៍ថា ការរស់នៅតាមគំរូព្រះគ្រីស្ទមានសារៈសំខាន់ណាស់ ព្រោះវាបានតុបតែងដំណឹងល្អឲ្យមានភាពទាក់ទាញ(ទីតុស ២:១០)។ តែយើងមិនធ្វើកិច្ចការទាំងនេះ ដោយពឹងអាងកម្លាំងខ្លួនឯងនោះទេ។ ព្រះគុណព្រះជួយឲ្យយើងរស់នៅ ដោយការអត់សង្កត់ចិត្ត ភាពទៀងត្រង់ និងកោតខ្លាចព្រះ(ខ.១២) ដោយឆ្លុះបញ្ចាំងឲ្យគេឃើញសេចក្តីពិតនៃជំនឿរបស់យើង(ខ.១)។
នៅជុំវិញខ្លួនយើង មានមនុស្សជាច្រើនដែលមិនទាន់បានឮដំណឹងល្អរបស់ព្រះគ្រីស្ទ តែពួកគេស្គាល់យើង។ សូមព្រះអង្គជួយយើង ឲ្យរស់នៅ ដោយចរិយាសម្បត្តិល្អ ដើម្បីបណ្តាលចិត្តគេឲ្យចង់ស្តាប់ព្រះបន្ទូលព្រះអង្គ។—KAREN HUANG
តើការរស់នៅរបស់អ្នក បានទាក់ទាញអ្នកដទៃ ឲ្យចង់ស្តាប់ដំណឹងល្អយ៉ាងណាខ្លះ? តើអ្នកអាចរៀនសូត្របានអ្វីខ្លះ ពីគំរូរបស់អ្នកដែលមានទីបន្ទាល់ល្អ ក្នុងការនាំអ្នកដទៃឲ្យស្គាល់ព្រះអង្គ?
ឱព្រះនៃសេចក្តីស្រឡាញ់ សូមព្រះអង្គជួយទូលបង្គំ ឲ្យរស់នៅដោយទីបន្ទាល់ល្អ ដើម្បីងាយស្រួលនាំអ្នកដទៃឲ្យស្គាល់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ជនគណនា ២៨-៣០ និង ម៉ាកុស ៨:២២-៣៨
