ឯក្រឹត្យវិន័យរបស់ព្រះយេហូវ៉ានោះគ្រប់លក្ខណ៍ ក៏កែព្រលឹងឡើងវិញ។ ទំនុកដំកើង ១៩:៧
ខណៈពេលដែលខ្ញុំកំពុងជួយចៅខ្ញុំឈ្មោះ ឡូហ្គិន (Logan) ធ្វើកិច្ចការសាលា ដ៏ពិបាកមួយចំនួន ដែលជាលំហាត់គណិតវិទ្យាថ្នាក់ទី៦ គាត់បានប្រាប់ខ្ញុំថា គាត់មានក្តីស្រមៃចង់ធ្វើជាវិស្វករ។ បន្ទាប់ ពីយើងបានធ្វើលំហាត់ ដែលមានអក្សរ x និង y គាត់ក៏បានសួរខ្ញុំថា “តើយើងរៀនធ្វើលំហាត់ទាំងអស់នេះដើម្បីអ្វី តើវានឹងមានប្រយោជន៍អ្វីសម្រាប់ពេលអនាគត?”
ខ្ញុំក៏បានញញឹម ហើយឆ្លើយប្រាប់គាត់ថា លំហាត់ទាំងអស់នោះ គឺជាអ្វីដែលគាត់នឹងប្រើនៅពេលគាត់ក្លាយជាវិស្វករ។ កាលនោះ គាត់មិនទាន់បានដឹងអំពីទំនាក់ទំនងរវាងគណិតវិទ្យា និងការងារជាវិស្វករដែលគាត់ចង់បាន សម្រាប់ពេលអនាគតទេ។
ជួនកាល យើងក៏មានទស្សនៈដូចនេះ អំពីព្រះគម្ពីរផងដែរ។ ពេលណាយើងស្តាប់គ្រូគង្វាលអធិប្បាយព្រះបន្ទូល និងអានខគម្ពីរណាមួយ យើងប្រហែលជាឆ្ងល់ថា តើយើងនឹងបានប្រើការបង្រៀន ឬខគម្ពីរនោះ នៅពេលណា? ស្តេចដាវីឌ ដែលជាអ្នកនិពន្ធកំណាព្យ មានចម្លើយខ្លះៗ សម្រាប់សំណួរនេះ។ ទ្រង់មានបន្ទូលថា សេចក្តីពិតរបស់ព្រះដែលមានក្នុងព្រះគម្ពីរ កែព្រលឹងយើងឡើងវិញ ធ្វើឲ្យមនុស្សខ្លៅមានប្រាជ្ញា ហើយធ្វើឲ្យចិត្តរីករាយឡើង (ទំនុកដំកើង ១៩:៧-៨)។ ប្រាជ្ញាក្នុងព្រះគម្ពីរដែលមានចែងក្នុងកណ្ឌគម្ពីរទាំង៥ដំបូង ដូចដែលបទគម្ពីរទំនុកដំកើង ជំពូក១៩ បានលើកឡើង (ក៏ដូចជាព្រះគម្ពីរប៊ីបទាំងមូល) បានជួយយើងឲ្យពឹងផ្អែក ទៅលើការដឹកនាំរបស់ព្រះវិញ្ញាណ ជារៀងរាល់ថ្ងៃ(សុភាសិត ២:៦)។
ហើយបើគ្មានព្រះគម្ពីរប្រើទេ យើងក៏គ្មានផ្លូវ ដើម្បីដកបទពិសោធន៍ជាមួយព្រះអង្គ និងស្គាល់សេចក្តីស្រឡាញ់ និងផ្លូវព្រះអង្គកាន់តែច្បាស់បានឡើយ។ ហេតុអ្វីយើងត្រូវសិក្សាព្រះគម្ពីរ? មូលហេតុគឺដោយសារ “សេចក្តីបញ្ញត្តរបស់ព្រះយេហូវ៉ាសុទ្ធតែទៀងត្រង់ ក៏បណ្តាលឲ្យចិត្តរីករាយសប្បាយ”(ទំនុកដំកើង ១៩:៨)។—DAVE BRANON
ហេតុអ្វីប្រាជ្ញាក្នុងព្រះគម្ពីរ មានសារៈសំខាន់ចំពោះអ្នក ក្នុងពេលសព្វថ្ងៃ? តើធ្វើដូចម្តេច ឲ្យអ្នកអាចមានការរីកចម្រើនក្នុងការយល់ដឹង អំពីព្រះគម្ពីរ?
ឱព្រះនៃសេចក្តីស្រឡាញ់ សូមព្រះអង្គធ្វើឲ្យព្រះបន្ទូលព្រះអង្គ ក្លាយជាពន្លឺបំភ្លឺផ្លូវទូលបង្គំ។ សូមព្រះអង្គជួយទូលបង្គំ ឲ្យប្រើប្រាជ្ញាក្នុងព្រះគម្ពីរ ដើម្បីដឹកនាំជំហានទូលបង្គំ ហើយជួយឲ្យទូលបង្គំស្រឡាញ់ព្រះអង្គកាន់តែខ្លាំងឡើង។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៣-១៥ និង លូកា ១:៥៧-៨០
