ការលើកទឹកចិត្តឲ្យបម្រើ
ដោយAnne Cetas
April 6, 2023
ដូចជាកូនមនុស្សបានមក មិនមែនឲ្យគេបំរើលោកទេ គឺនឹងបំរើគេវិញ។ ម៉ាថាយ ២០:២៨ ដឺអេវីយ៉ុន(DeAvion) មានអាយុតែ១៣ឆ្នាំទេ តែគាត់បានទទួលការលើកទឹកចិត្តឲ្យបម្រើអ្នកដទៃ។ គាត់ និងម្តាយគាត់ បានឮគេចែកចាយរឿង អំពីបុរសម្នាក់ ដែលបានហៅក្មេងៗឲ្យស្ម័គ្រចិត្តកាត់ស្មៅ នៅតែតាមទីធ្លាផ្ទះ៥០កន្លែង ក្នុងអំឡុងពេលសម្រាកវិស្សមកាល នៅរដូវក្តៅ។ ពួកគេបានផ្តោតទៅលើការជួយអតីតយុទ្ធជន ស្រ្តីមេម៉ាយ និងជនពិការ ឬនរណាក៏ដោយ ដែលត្រូវការជំនួយ។ អ្នកបង្កើតកម្មវិធីនេះ(ដែលបានកាត់ស្មៅក្នុងទីធ្លាផ្ទះ៥០កន្លែង ក្នុង៥០រដ្ឋ) បានលើកទឹកចិត្តក្មេងៗឲ្យចូលរួម ក្នុងការបម្រើនេះ ដើម្បីបង្រៀនពួកគេ អំពីសារៈសំខាន់នៃក្រមសីលធម៌ការងារ និងការបម្រើសហគមន៍។ ទោះអាកាសធាតុក្តៅ ហើយក្មេងជំទង់ ដឺអេវីយ៉ុន មានសកម្មភាពផ្សេងទៀតជាច្រើន ដែលអាចធ្វើបាន ក្នុងរដូវក្តៅ ក៏គាត់នៅតែសម្រេចចិត្តបម្រើអ្នកដទៃ ហើយបានបំពេញភារៈកិច្ចរបស់ខ្លួន។ ការលើកទឹកចិត្តឲ្យបម្រើ ក៏មានសម្រាប់អ្នកជឿព្រះយេស៊ូវផងដែរ។ នៅពេលល្ងាច មុនថ្ងៃដែលព្រះយេស៊ូវសុគត សម្រាប់មនុស្សទាំងអស់ ព្រះអង្គបានសោយអាហារពេលល្ងាច ជាមួយមិត្តសំឡាញ់របស់ព្រះអង្គ(យ៉ូហាន ១៣:១-២)។ ព្រះអង្គបានជ្រាប អំពីទុក្ខវេទនា និងសេចក្តីស្លាប់ ដែលព្រះអង្គនឹងទទួលនៅពេលដ៏ខ្លីខាងមុខ តែព្រះអង្គបានងើបឡើងពីតុអាហារ ហើយក៏បានធ្វើពិធីលៀងជើងឲ្យពួកសាវ័ក(ខ.៣-៥)។ ព្រះអង្គក៏បានមានបន្ទូលថា “ដូច្នេះ បើខ្ញុំ ដែលជាព្រះអម្ចាស់ ហើយជាគ្រូ បានលាងជើង ឲ្យអ្នករាល់គ្នា នោះគួរតែឲ្យអ្នករាល់គ្នាលាងជើង ដល់គ្នានឹងគ្នាដែរ”(ខ.១៤)។ ព្រះយេស៊ូវជាអ្នកបម្រើដែលបន្ទាបព្រះកាយ និងជាគំរូរបស់យើង។ ព្រះអង្គយកព្រះទ័យទុកដាក់ចំពោះរាស្រ្តព្រះអង្គ ដោយព្រះអង្គបានប្រោសមនុស្សខ្វាក់ និងអ្នកជំងឺ ឲ្យជា និងបានប្រកាសដំណឹងល្អអំពីនគរព្រះ ហើយក៏បានលះបង់ព្រះជន្មដើម្បីយើងរាល់គ្នា។ ដោយសារព្រះគ្រីស្ទស្រឡាញ់អ្នក នោះចូលទូលសូមព្រះអង្គថា ព្រះអង្គសព្វព្រះទ័យឲ្យអ្នកបម្រើនរណាខ្លះក្នុងសប្តាហ៍នេះ។—ANNE CETAS
តើសេចក្តីស្រឡាញ់ និងសេចក្តីអាណិតរបស់ព្រះ មានន័យបំផុត ចំពោះអ្នក ត្រង់ចំណុចណាខ្លះ? តើអ្នកអាចប្រើអំណោយទានរបស់អ្នក ដើម្បីបម្រើអ្នកដទៃដូចម្តេចខ្លះ ក្នុងសប្តាហ៍នេះ?
ឱព្រះអម្ចាស់ សូមព្រះអង្គបង្រៀនទូលបង្គំ ឲ្យចេះស្រឡាញ់អ្នកដទៃ ដោយសេចក្តីស្រឡាញ់ ដែលព្រះអង្គមានចំពោះទូលបង្គំ។
គម្រោងអានព្រះគម្ពីររយៈពេល១ឆ្នាំ: ១សាំយ៉ូអែល ៤-៦ និង លូកា ៩:១-១៧