ព្រះអង្គល្អ ហើយខ្លាំង
ដោយPatricia Raybon
April 26, 2023
ឯថ្មដែលពួកជាងសង់ផ្ទះបានចោលចេញ នោះបានត្រឡប់ជាថ្មជ្រុងយ៉ាងឯកហើយ។ ទំនុកដំកើង ១១៨:២២ យុវជនម្នាក់បានធ្វើការបម្រើព្រះ ដោយឈោងចាប់និស្សិតមហាវិទ្យាល័យ។ គាត់មានភាពតប់ប្រមល់នៅក្នុងចិត្ត។ គាត់បង្ហាញទឹកមុខច្របូកច្របល់ ពេលដែលខ្ញុំហ៊ានសួរគាត់ថា តើគាត់បានអធិស្ឋានសូមការដឹកនាំពីព្រះ និងសូមជំនួយពីព្រះអង្គឬទេ? គឺអធិស្ឋានឥតឈប់ឈរ ដូចដែលសាវ័កប៉ុលបានបង្រៀន។ យុវជននោះក៏បានឆ្លើយតប ដោយសារភាពថា គាត់មិនដឹងច្បាស់ថា គាត់នៅតែជឿលើការអធិស្ឋាន ឬនៅតែជឿថា ព្រះទ្រង់កំពុងតែស្តាប់គាត់អធិស្ឋានឬអត់ទេ ព្រោះគាត់មើលទៅលោកិយ ឃើញបញ្ហាជាច្រើនដែលហាក់ដូចជាគ្មានដំណោះស្រាយ។ អ្នកដឹកនាំវ័យក្មេងនោះ កំពុងតែបង្កើតការងារបម្រើព្រះ ដោយពឹងអាងកម្លាំងរបស់គាត់ ហើយគួរឲ្យស្តាយណាស់ ដែលគាត់កំពុងតែបរាជ័យ។ ហេតុអ្វី? ព្រោះគាត់កំពុងបដិសេធន៍ព្រះអម្ចាស់។ ព្រះយេស៊ូវគឺជាគ្រឹះនៃពួកជំនុំ ដែលគេបានបដិសេធន៍ដោយរាប់ចាប់ពីសាសន៍របស់ព្រះអង្គ(យ៉ូហាន ១:១១)។ មនុស្សជាច្រើន នៅតែបដិសេធន៍ព្រះអង្គ ក្នុងពេលសព្វថ្ងៃ ដោយមានការពិបាកក្នុងការកសាងជីវិត ការងារ ឬពួកជំនុំ នៅលើគ្រឹះដ៏ទន់ខ្សោយ ដែលជាផែនការ ក្តីស្រមៃ និងការអ្វីផ្សេងទៀតដែលមិនអាចពឹងផ្អែកបាន។ ប៉ុន្តែ មានតែព្រះអង្គសង្គ្រោះរបស់យើងទេ ដែលជាកម្លាំង និងកំផែងដែលការពារយើង(ទំនុកដំកើង ១១៨:១៤)។ ជាការពិតណាស់ “ឯថ្មដែលពួកជាងសង់ផ្ទះបានចោលចេញ នោះបានត្រឡប់ជាថ្មជ្រុងយ៉ាងឯកហើយ”(ខ.២២)។ ដើម្បីសម្រេចកិច្ចការថ្វាយព្រះអង្គ អ្នកជឿព្រះអង្គត្រូវតែពឹងផ្អែកលើការដឹកនាំ និងជំនួយរបស់ព្រះអង្គ។ ដូចនេះ យើងត្រូវអធិស្ឋានទៅកាន់ព្រះអង្គថា “ឱព្រះយេហូវ៉ាអើយ យើងខ្ញុំទូលអង្វរដល់ទ្រង់ សូមជួយសង្គ្រោះឥឡូវ ឱព្រះយេហូវ៉ាអើយ យើងខ្ញុំទូលអង្វរដល់ទ្រង់ សូមចាត់សេចក្តីចំរើនមកឥឡូវ”(ខ.២៥)។ ចូរអរព្រះគុណព្រះអង្គចុះ ដ្បិតទ្រង់ល្អ ហើយមានគ្រប់ព្រះចេស្តា។—PATRICIA RAYBON
តើអ្នកមានក្តីស្រមៃ និងផែនការអ្វី ខណៈពេលដែលអ្នកកំពុងធ្វើការថ្វាយព្រះ? តើអ្នកអាចមានផែនការស្របតាមបំណងព្រះទ័យព្រះ ដូចម្តេចខ្លះ ដើម្បីធ្វើការបម្រើព្រះអង្គ?
ឱព្រះយេស៊ូវ យើងខ្ញុំសូមសរសើរដំកើងព្រះអង្គ ដែលបានធ្វើជាថ្មជ្រុងយ៉ាងឯក។ មានតែព្រះអង្គទេ ដែលអាចធ្វើជាគ្រឹះដ៏រឹងមាំ សម្រាប់ឲ្យពួកជំនុំរបស់ព្រះអង្គ និងជីវិតទូលបង្គំអាចឈររឹងមាំបាន។
គម្រោងអានព្រះគម្ពីររយៈពេល១ឆ្នាំ: ២សាំយ៉ូអែល ២៣-២៤ និង លូកា ១៩:១-២៧