ធ្វើការដោយការអធិស្ឋាន
ដោយJennifer Benson Schuldt
May 3, 2023
យ៉ូសាផាតទ្រង់ក៏ភ័យខ្លាច ហើយតាំងព្រះទ័យស្វែងរកព្រះយេហូវ៉ា ទ្រង់ប្រកាសប្រាប់ឲ្យមានការតមអត់ នៅពេញក្នុងស្រុកយូដា។ ២របាក្សត្រ ២០:៣ ពេលដែលកូនប្រុសខ្ញុំត្រូវការការព្យាបាល ដោយការវះកាត់សន្លាក់ ខ្ញុំអរព្រះគុណព្រះអង្គ ដែលបានប្រទានវេជ្ជបណ្ឌិត ដ៏ល្អ សម្រាប់ធ្វើការវះកាត់នៅថ្ងៃនោះ។ វេជ្ជបណ្ឌិតដែលជិតដល់ពេលចូលនិវត្តន៍រូបនោះ បានធានាយើងថា គាត់បានជួយព្យាបាលមនុស្សរាប់ពាន់នាក់ ដែលមានបញ្ហាដូចកូនប្រុសខ្ញុំ។ ជាងនេះទៅទៀត មុនពេលគាត់ចាប់ផ្តើមការវះកាត់ គាត់បានអធិស្ឋាន សូមព្រះអង្គប្រទានលទ្ធផលល្អ។ ហើយខ្ញុំអរព្រះគុណព្រះអង្គ ដែលបានប្រទានពរឲ្យការវះកាត់ជោគជ័យ។ ស្តេចយ៉ូសាផាត ជាអ្នកដឹកនាំប្រទេសដែលមានបទពិសោធន៍បានអធិស្ឋានផងដែរ ក្នុងអំឡុងពេលដែលមានគ្រោះវិបត្តិ។ ប្រទេសបីបានរួមគ្នាទាស់នឹងទ្រង់ ហើយពួកគេនឹងលើកទ័ពមកវាយប្រហាររាស្រ្តទ្រង់។ ទោះទ្រង់មានបទពិសោធន៍ជាង២ទសវត្សរ៍ក៏ដោយ ក៏ទ្រង់បានសម្រេចព្រះទ័យទូលសូមព្រះទ្រង់បង្ហាញផ្លូវ។ ទ្រង់ក៏បានអធិស្ឋានថា “យើងរាល់គ្នាអំពាវនាវដល់ទ្រង់ ក្នុងសេចក្តីវេទនារបស់យើង នោះទ្រង់នឹងព្រមទទួល ហើយនឹងជួយសង្គ្រោះយើង” (២របាក្សត្រ ២០:៩)។ ទ្រង់ក៏បានទូលសូមការដឹកនាំពីព្រះអម្ចាស់ យ៉ាងដូចនេះថា “យើងខ្ញុំក៏មិនដឹងធ្វើដូចម្តេចដែរ ប៉ុន្តែភ្នែកយើងខ្ញុំទន្ទឹងមើលតែទ្រង់ទេ”(ខ.១២)។ ការដែលស្តេចយ៉ូសាផាតបន្ទាបខ្លួន ក្នុងការស្វែងរកដំណោះស្រាយ គឺបានបើកព្រះទ័យទ្រង់ ឲ្យទទួលជំនួយពីព្រះអម្ចាស់ ដែលមានដូចជាការលើកទឹកចិត្ត និងការធ្វើអន្តរាគមន៍របស់ព្រះអង្គ(ខ.១៥-១៧,២២)។ ទោះយើងមានបទពិសោធន៍ច្រើន នៅក្នុងផ្នែកណាក៏ដោយ ក៏ការអធិស្ឋានសូមជំនួយពីព្រះអង្គ ជួយយើងមានទម្លាប់ពឹងផ្អែកលើព្រះអង្គ។ គឺបានរំឭកយើងថា ព្រះអង្គជ្រាបអំពីបញ្ហារបស់យើង លើសពីលទ្ធភាពដែលយើងអាចដឹង ហើយក៏គ្រប់គ្រងបញ្ហាយើងទាំងស្រុង។ ការនេះក៏បានជួយយើងឲ្យមានការបន្ទាបខ្លួន ដែលធ្វើឲ្យព្រះអង្គសព្វព្រះទ័យនឹងឆ្លើយតប ហើយជួយយើង ទោះយើងនឹងទទួលលទ្ធផលបែបណាក៏ដោយ។—JENNIFER BENSON SCHULDT
តើការអធិស្ឋានបានជួយអ្នកជម្នះបញ្ហាប្រឈមយ៉ាងដូចម្តេចខ្លះ? តើមានបញ្ហាប្រឈមអ្វីខ្លះក្នុងពេលថ្មីៗនេះ ដែលអ្នកចាំបាច់ត្រូវអធិស្ឋាន?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការស្តាប់ និងឆ្លើយតបការអធិស្ឋានរបស់ទូលបង្គំ។ ទូលបង្គំសូមថ្វាយបង្គំព្រះអង្គ ជាព្រះដែលជ្រាបអំពីអ្វីៗគ្រប់យ៉ាង និងមានគ្រប់ចេស្តា។ សូមព្រះអង្គជួយទូលបង្គំ ជម្នះបញ្ហាដែលទូលបង្គំកំពុងជួបប្រទះនៅថ្ងៃនេះ។
To learn more about how to pray effectively, visit ODBU.org/SF120.
គម្រោងអានព្រះគម្ពីររយៈ១ឆ្នាំ : ១ពង្សាវតាក្សត្រ ១៦-១៨ និង លូកា ២២:៤៧-៧១