ព្រះគុណ ដែលនាំមកនូវការផ្លាស់ប្រែ
ដោយTom Felten
May 5, 2023
ម៉ូសេមានសេចក្តីភិតភ័យណាស់ ដោយគិតថា ការនោះប្រាកដជាគេដឹងហើយ។ និក្ខមនំ ២:១៤ បុរសម្នាក់បានប្រព្រឹត្តអំពើឧក្រិដ្ឋដ៏តក់ស្លុត ហើយគាត់ក៏ត្រូវគេកាត់ទោសឲ្យជាប់គុកអស់មួយជីវិត។ នៅឆ្នាំបន្ទាប់ បុរសនោះ បានចាប់ផ្តើមមានការប្រោសឲ្យជាខាងផ្លូវចិត្ត និងខាងវិញ្ញាណ នៅក្នុងការជាប់ឃុំខ្លួនដាច់ដោយឡែកពីអ្នកដទៃ។ ការនោះបាននាំឲ្យគាត់ប្រែចិត្តចេញពីអំពើបាប ហើយមានការប្រកបទាក់ទងជាមួយព្រះយេស៊ូវឡើងវិញ។ សព្វថ្ងៃនេះ គេបានអនុញ្ញាតឲ្យគាត់មានទំនាក់ទំនងខ្លះៗជាមួយអ្នកទោសដទៃទៀត។ ហើយដោយសារព្រះគុណព្រះ តាមរយៈការធ្វើបន្ទាល់របស់គាត់ អ្នកទោសខ្លះក៏បានទទួលព្រះយេស៊ូវ ជាព្រះអង្គសង្គ្រោះ ដោយរកឃើញការអត់ទោសបាបក្នុងព្រះអង្គ។ លោកម៉ូសេត្រូវបានគេទទួលស្គាល់ថា ជាបុរសនៃសេចក្តីជំនឿដ៏អស្ចារ្យ តែកាលពីមុន គាត់ក៏ធ្លាប់បានប្រព្រឹត្តបទឧក្រិដ្ឋដ៏តក់ស្លុត។ កាលនោះ លោកបានឃើញសាសន៍អេស៊ីព្ទម្នាក់ កំពុងតែវាយសាសន៍ហេព្រើរម្នាក់ ដែលជាសាច់ញាតិ នោះលោកក្រឡេកមើលណេះ មើលណោះឃើញថា គ្មានអ្នកណាសោះ ក៏សំឡាប់សាសន៍អេស៊ីព្ទនោះ កប់ក្នុងខ្សាច់ចោលទៅ(និក្ខមនំ ២:១១-១២)។ ទោះគាត់បានប្រព្រឹត្តអំពើបាបនេះហើយក្តី ព្រះទ្រង់មិនបានបោះបង់ចោលអ្នកបម្រើម្នាក់នេះ ដែលមិនល្អឥតខ្ចោះនោះឡើយ។ ក្រោយមក ព្រះអង្គក៏បានជ្រើសរើសលោកម៉ូសេ ឲ្យរំដោះរាស្រ្តព្រះអង្គ ចេញពីការសង្កត់សង្កិន(៣:១០)។ បទគម្ពីររ៉ូម ៥:១៤ បានចែងថា “ចាប់តាំងពីលោកអ័ដាម ដរាបដល់លោកម៉ូសេ នោះសេចក្តីស្លាប់បានសោយរាជ្យ លើទាំងពួកអ្នកដែលធ្វើបាប”។ តែក្នុងខបន្ទាប់ សាវ័កប៉ុលបានលើកឡើងថា “ព្រះគុណព្រះ” ជួយឲ្យយើងអាចផ្លាស់ប្រែ និងផ្សះផ្សាជាមួយព្រះអង្គបាន ទោះយើងមានបាបពីអតីតកាលដូចម្តេចក៏ដោយ(ខ.១៥-១៦)។ យើងប្រហែលជាគិតថា ការអ្វីដែលយើងបានធ្វើ បានធ្វើឲ្យយើងមិនសក្តិសមនឹងទទួលការអត់ទោសបាបពីព្រះ និងឲ្យព្រះអង្គប្រើ ដើម្បីថ្វាយព្រះកិត្តិនាមដល់ព្រះអង្គ។ តែដោយសារព្រះគុណព្រះអង្គ នៅក្នុងព្រះយេស៊ូវយើងអាចផ្លាស់ប្រែ និងទទួលការរំដោះឲ្យមានសេរីភាព ដើម្បីជួយអ្នកដទៃ ឲ្យមានការផ្លាស់ប្រែអស់កល្បជានិច្ច។—TOM FELTEN
តើព្រះគុណរបស់ព្រះបានកែប្រែអ្នកដូចម្តេចខ្លះ? តើព្រះអង្គកំពុងត្រាស់ហៅអ្នក ឲ្យមានការផ្លាស់ប្រែអ្វីខ្លះ សព្វថ្ងៃនេះ?
ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ ដែលបានប្រទានព្រះគុណកែប្រែជីវិតទូលបង្គំ។
គម្រោងអានព្រះគម្ពីររយៈ១ឆ្នាំ : ១ពង្សាវតាក្សត្រ ១៩-២០ និង លូកា ២៣:១-២៥