ព្រះទ្រង់មានព្រះជន្មរស់ឡើងវិញដើម្បីយើងរាល់គ្នា
ដោយPatricia Raybon
May 8, 2023
នាងបែរខ្លួនទៅទូលទ្រង់ ជាភាសាហេព្រើរថា រ៉ាបូនី ដែលស្រាយថា លោកគ្រូអើយ។ យ៉ូហាន ២០:១៦ បងប្អូនប្រុសពីរនាក់បានបែកគ្នា បន្ទាប់ពីមានគេយកទៅចិញ្ចឹម។ ប៉ុន្តែ ជិត២០ឆ្នាំក្រោយមក ការធ្វើតេស្តDNA ក៏បានជួយពួកគេឲ្យជួបជុំគ្នាវិញ។ ពេលខេរិន(Kieron) ផ្ញើសារទៅវីនសិន(Vincent) ជាបុរសដែលគាត់ជឿថា ជាបងប្អូនគាត់ វីនសិនគិតថា តើអ្នកផ្ញើសារមកគាត់ ជានរណា? ពេលដែលខេរិនសួរគាត់ អំពីឈ្មោះពីកំណើតរបស់គាត់ គាត់ក៏បានឆ្លើយថា គាត់ឈ្មោះ “ថាយល័រ”។ បន្ទាប់មក គាត់ក៏បានដឹងថា វិនសិនជាបងប្អូនបង្កើតរបស់គាត់ គឺដោយសារឈ្មោះពីកំណើតរបស់វិនសិន។ រឿងនេះបានធ្វើឲ្យខ្ញុំនឹកចាំ អំពីសារៈសំខាន់នៃតួនាទីរបស់ឈ្មោះ ក្នុងរឿងព្រះយេស៊ូវមានព្រះជន្មរស់ឡើងវិញ។ នាងម៉ារា អ្នកស្រុកម៉ាដាឡា បានមកផ្នូររបស់ព្រះអង្គ ហើយក៏បានយំ ពេលដែលនាងមិនឃើញព្រះសពព្រះអង្គ នៅក្នុងផ្នូរ។ ព្រះយេស៊ូវក៏បានសួរនាងថា “នាងអើយ ហេតុអ្វីបានជាយំ នាងរកអ្នកណា?”(យ៉ូហាន ២០:១៥)។ ពេលនោះ នាងមិនស្គាល់ព្រះអង្គទេ ទាល់តែព្រះអង្គបានមានបន្ទូលហៅឈ្មោះនាងថា “ម៉ារាអើយ”(ខ.១៦)។ នោះនាងបែរខ្លួនទៅទូលទ្រង់ ជាភាសាហេព្រើរថា “រ៉ាបូនី” ដែលស្រាយថា “លោកគ្រូអើយ”(ខ.១៦)។ ការឆ្លើយតបរបស់នាង បានបង្ហាញចេញនូវក្តីអំណររបស់អ្នកជឿព្រះយេស៊ូវ នៅពេលព្រឹកថ្ងៃព្រះយេស៊ូវមានព្រះជន្មរស់ឡើងវិញ ដោយទទួលស្គាល់ថា ព្រះគ្រីស្ទដែលមានព្រះជន្មរស់ឡើងវិញ បានឈ្នះសេចក្តីស្លាប់ទាំងស្រុង ដោយហៅយើងម្នាក់ៗថា កូនព្រះអង្គ។ គឺដូចដែលព្រះអង្គមានបន្ទូលទៅនាងម៉ារាថា “ខ្ញុំឡើងទៅឯព្រះវរបិតាខ្ញុំ ជាព្រះវរបិតានៃអ្នករាល់គ្នា គឺជាព្រះនៃខ្ញុំ ហើយជាព្រះនៃអ្នករាល់គ្នាដែរ”(ខ.១៧)។ នៅក្នុងរដ្ឋចចជា បងប្អូនប្រុសពីរនាក់បានជួបជុំគ្នាវិញ ដោយសារឈ្មោះពីកំណើតរបស់ពួកគេ ដោយប្ដេជ្ញាចិត្តថា នឹងធ្វើឲ្យទំនាក់ទំនងរបស់ខ្លួនកាត់នៅល្អប្រសើរឡើងមួយកំរិតទៀត។ នៅថ្ងៃព្រះយេស៊ូវមានព្រះជន្មរស់ឡើងវិញ យើងសរសើរដំកើងព្រះអង្គ ដែលបានបោះជំហានដ៏សំខាន់បំផុត ដើម្បីមានព្រះជន្មរស់ឡើងវិញ ដោយសេចក្តីស្រឡាញ់ដែលមានការលះបង់ ដល់អ្នកដែលជាកូនព្រះអង្គ។ ព្រះអង្គមានព្រះជន្មរស់ ដើម្បីអ្នកនិងខ្ញុំ។—PATRICIA RAYBON
តើអ្នកមានអារម្មណ៍យ៉ាងណា ពេលដែលបានដឹងថា ព្រះយេស៊ូវមានព្រះជន្មរស់ឡើងវិញ ហើយស្គាល់ឈ្មោះរបស់អ្នក? តើធ្វើដូចម្តេចឲ្យអ្នកអាចស្គាល់ព្រះអង្គកាន់តែច្បាស់?
ឱព្រះអម្ចាស់យេស៊ូវ ព្រះអង្គស្គាល់ទូលបង្គំច្បាស់។ ទូលបង្គំសូមអរព្រះគុណព្រះអង្គ សម្រាប់អំណោយនៃការលះបង់ នៃសេចក្តីស្រឡាញ់របស់ព្រះអង្គ។
គម្រោងអានព្រះគម្ពីររយៈ១ឆ្នាំ : ២ពង្សាវតាក្សត្រ ៧-៩ និង យ៉ូហាន ១:១-២៨