កន្លែងសុវត្ថិភាពរបស់យើង
ដោយMonica Larose
June 9, 2023
ព្រះយេហូវ៉ាទ្រង់ជាព្រះដែលថែរក្សាអ្នក ព្រះយេហូវ៉ាទ្រង់ជាម្លប់នៅខាងស្តាំអ្នក។ ទំនុកដំកើង ១២១:៥ អ្នកគ្រូ ដេប៊ី ស្ទីហ្វិន ប្រោឌ័រ(Debbie Stephens Browder) ជាគ្រូបង្រៀនដែលបានចូលនិវត្ត។ គាត់បានចេញទៅបំពេញបេសកកម្ម ដោយនាំមនុស្សដាំដើមឈើ ឲ្យបានច្រើនបំផុតតាមដែលអាចធ្វើទៅបាន។ តើហេតុអ្វី? គឺដោយសារការឡើងកម្តៅពិភពលោក។ ការឡើងកម្តៅខ្លាំងជ្រុល នៅសហរដ្ឋអាមេរិក គឺជាកត្តាអាកាសធាតុទី១ ដែលបណ្តាលឲ្យមនុស្សស្លាប់។ គាត់ក៏បានចាប់ផ្តើមឆ្លើយតបចំពោះបញ្ហានេះ ដោយការដាំដើមឈើ។ គំរបការពារកម្តៅ ដែលដើមឈើបានផ្តល់ឲ្យ គឺជាមធ្យោបាយដ៏សំខាន់ ដើម្បីការពារសហគមន៍។ គាត់ថា “វាជារឿងស្លាប់រស់។ វាមិនគ្រាន់តែបានជួយកែលម្អសោភណ្ឌភាពសហគមន៍ឲ្យមានភាពស្រស់ស្អាតប៉ុណ្ណោះឡើយ”។ ម្លប់ដើមឈើមិនគ្រាន់តែបានផ្តល់ឲ្យនូវភាពស្រស់ថ្លា តែថែមទាំងបានជួយសង្គ្រោះជីវិតផងដែរ។ អ្នកនិពន្ធបទគម្ពីរទំនុកដំកើង ជំពូក១២១ ប្រាកដជាបានដឹងច្បាស់ អំពីការពិតនេះ ព្រោះនៅតំបន់មជ្ឈិមបូព៌ា ហានិភ័យនៃគ្រោះថ្នាក់ដោយសារពន្លឺថ្ងៃ បានកើតមានជាប្រចាំ។ ហេតុនេះហើយ អ្នកនិពន្ធបទគម្ពីរទំនុកដំកើង បានធ្វើការពិពណ៌នា កាន់តែស៊ីជម្រៅថា ព្រះទ្រង់ជាកន្លែងជ្រកកោនដ៏រឹងមាំរបស់យើង ដែលនៅក្នុងការថែរក្សារបស់ព្រះអង្គ “នៅពេលថ្ងៃអ្នកនឹងមិនត្រូវព្រះអាទិត្យធ្វើទុក្ខឡើយ ហើយនៅពេលយប់ក៏មិនត្រូវព្រះចន្ទធ្វើទុក្ខដែរ”(ខ.៦)។ ខគម្ពីរនេះគឺមិនមានន័យថា អ្នកជឿព្រះយេស៊ូវ នឹងមិនរងគ្រោះដោយសារការឈឺជាប់ ឬការបាត់បង់ ក្នុងជីវិតនេះ (ឬកម្តៅថ្ងៃមិនមានគ្រោះថ្នាក់នោះឡើយ!)។ ព្រះគ្រីស្ទបានប្រាប់យើងថា “នៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ”(យ៉ូហាន ១៦:៣៣)។ ប៉ុន្តែ ការប្រៀបប្រដូចព្រះអម្ចាស់ទៅនឹងជម្រកដែលមានម្លប់ គឺបានធានាយើងថា ទោះយើងជួបប្រទះបញ្ហាអ្វីក៏ដោយ ក៏ជីវិតយើងនៅតែស្ថិតក្រោមការថែរក្សារបស់ព្រះអង្គជានិច្ច(ទំនុកដំកើង ១២១:៧-៨)។ នៅក្នុងព្រះអង្គ យើងអាចរកឃើញការសម្រាក តាមរយៈការទុកចិត្តព្រះអង្គ ដោយដឹងថា គ្មានអ្វីអាចពង្រាត់យើង ចេញពីសេចក្តីស្រឡាញ់របស់ព្រះអង្គបានឡើយ(យ៉ូហាន ១០:២៨ និង រ៉ូម ៨:៣៩)។—MONICA LA ROSE
តើអ្នកបានដកពិសោធន៍នឹងម្លប់នៃការថែរក្សារបស់ព្រះអង្គ ដូចម្តេចខ្លះ? តើការនឹកចាំថា អ្នកតែងតែស្ថិតក្នុងការថែរក្សារបស់ព្រះអង្គ បាននាំឲ្យអ្នកមានសេចក្តីក្លាហានយ៉ាងណាខ្លះ?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការធ្វើជាជម្រកដែលមានម្លប់ និងការការពារសម្រាប់ទូលបង្គំ។ សូមព្រះអង្គជួយទូលបង្គំឲ្យរកឃើញការសម្រាក និងសេចក្តីក្លាហាន ខណៈពេលដែលទូលបង្គំមានការទុកចិត្តព្រះអង្គ កាន់តែខ្លាំងឡើង។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ៣២-៣៣ និង យ៉ូហាន ១៨:១៩-៤០