ព្រះអម្ចាស់មិនផ្អាកសេចក្តីសន្យារបស់ទ្រង់…គឺទ្រង់មានព្រះហឫទ័យអត់ធ្មត់នឹងយើងរាល់គ្នាវិញ ដោយមិនចង់ឲ្យអ្នកណាមួយវិនាសឡើយ។ ២ពេត្រុស ៣:៩
ខណៈពេលដែលលោកចន អ៊ែម ភើឃីន(John M. Perkins) ជិតដល់ចុងបញ្ចប់នៃជីវិត គាត់ក៏បានបន្សល់ទុកនូវសារដ៏សំខាន់មួយ សម្រាប់មនុស្សដែលគាត់នឹងជំរាបលា។ លោកភើឃីនមានឈ្មោះល្បី ដោយសារគាត់បានផ្សះផ្សាជាតិសាសន៍ដែលមានជម្លោះ។ គាត់មានប្រសាសន៍ថា “ការប្រែចិត្តចេញពីអំពើបាប គឺជាផ្លូវតែមួយគត់ឆ្ពោះទៅរកព្រះ។ បើអ្នកមិនប្រែចិត្តទេ អ្នកនឹងវិនាសមិនខាន”។
ពាក្យសម្តីនេះគឺផ្អែកទៅលើព្រះបន្ទូលរបស់ព្រះយេស៊ូវ និងការបង្រៀនរបស់សាវ័កព្រះអង្គ ក្នុងព្រះគម្ពីរ។ គឺដូចដែលព្រះអង្គបានមានបន្ទូលថា “បើអ្នករាល់គ្នាមិនប្រែចិត្តទេ នោះនឹងត្រូវវិនាសទាំងអស់គ្នាដូច្នោះដែរ”(លូកា ១៣:៣)។ សាវ័កពេត្រុសក៏បានបង្រៀនផងដែរថា “ចូរប្រែចិត្ត ហើយវិលមកចុះ ដើម្បីឲ្យបាបរបស់អ្នករាល់គ្នាបានលុបចេញ”(កិច្ចការ ៣:១៩)។
នៅក្នុងព្រះគម្ពីរសញ្ញាចាស់ មានមនុស្សម្នាក់ទៀត ដែលចង់ឲ្យប្រជាជនគាត់ងាកបែរទៅរកព្រះអង្គវិញ។ នៅក្នុងពាក្យផ្តាំផ្ញើចុងក្រោយរបស់ហោរាសាំយូអែល ទៅកាន់សាសន៍អ៊ីស្រាអែលទាំងអស់(១សាំយ៉ូអែល ១២:១) ក្នុងនាមគាត់ជាហោរា សង្ឃ និងចៅក្រម គាត់មានប្រសាសន៍ថា “កុំឲ្យខ្លាចឡើយ អ្នករាល់គ្នាបានប្រព្រឹត្តការអាក្រក់ទាំងនេះមែន ប៉ុន្តែ កុំឲ្យតែបែរចេញពីព្រះយេហូវ៉ាទៀត គឺត្រូវឲ្យគោរពប្រតិបត្តិដល់ទ្រង់ ឲ្យអស់ពីចិត្តចុះ”(ខ.២០)។ នេះជាសារដាស់តឿនឲ្យប្រែចិត្តចេញពីអំពើបាប និងការអាក្រក់ ហើយឲ្យវិលត្រឡប់មកដើរតាមព្រះអស់ពីចិត្ត។
យើងរាល់គ្នាសុទ្ធតែមានបាប ហើយខ្វះមិនដល់ស្តង់ដា ឬខ្នាតគំរូរបស់ព្រះអង្គ។ ដូចនេះ យើងចាំបាច់ត្រូវប្រែចិត្ត ដោយងាកចេញពីអំពើបាប ហើយវិលត្រឡប់មកព្រះយេស៊ូវិញ ដែលព្រះអង្គអត់ទោសឲ្យយើង ហើយប្រទានកម្លាំងឲ្យយើងដើរតាមព្រះអង្គ។ ដូចនេះ ចូរយើងស្តាប់តាមព្រះបន្ទូលព្រះអង្គ ដែលអាចប្រើអំណាចនៃការប្រែចិត្ត ដើម្បីកែប្រែយើងឲ្យក្លាយជាមនុស្ស ដែលព្រះអង្គអាចប្រើ ដើម្បីថ្វាយសិរីល្អដល់ព្រះអង្គ។—DAVE BRANON
ហេតុអ្វីយើងចាំបាច់ត្រូវងាកចេញពីអំពើបាប ហើយសូមព្រះគ្រីស្ទអត់ទោសឲ្យយើង? តើការដើរតាមព្រះអស់ពីចិត្តមានន័យចំពោះអ្នក ដូចម្តេចខ្លះ?
ឱព្រះអម្ចាស់ សូមព្រះអង្គដឹកនាំទូលបង្គំ ទៅរកការប្រែចិត្តពិតប្រាកដ។ សូមព្រះអង្គជួយទូលបង្គំឲ្យទទួលស្គាល់អំពើបាបរបស់ទូលបង្គំ ហើយទុកចិត្តទាំងស្រុង ទៅលើព្រះចេស្តារបស់ព្រះយេស៊ូវដែលជួយសង្រ្គោះឲ្យរួចពីបាប។
For further study, read Taking Sin Seriously at DiscoverySeries.org.
គម្រោងអានព្រះគម្ពីររយៈពេល១ឆ្នាំ : យ៉ូប ១៧-១៩ និង កិច្ចការ ១០:១-២៣
