សូមអាន រ៉ូម ៥:៦-១០
តែឯព្រះ ទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង។ រ៉ូម ៥:៨
លោករ៉ូបឺត ថដ លីនខិន(Robert Todd Lincoln) បានរស់នៅ ក្រោមស្រមោលរបស់ឪពុកគាត់ គឺលោកប្រធានាធិបតីអាមេរិក អ័ប្រាហាំ លីនខិន(Abraham Lincoln)។ បន្ទាប់ពីឪពុកគាត់បានស្លាប់ជាច្រើនឆ្នាំហើយ អត្តសញ្ញាណរបស់លោករ៉ូបឺត ត្រូវបានគ្របដណ្តប់យ៉ាងលើសលប់ ទៅដោយភាពល្បីល្បាញរបស់ឪពុកគាត់។ មិត្តភក្តិរបស់គាត់ ឈ្មោះ នីកូឡាស មួរេយ បាត់ល័រ(Nicholas Murray Butler) បានសរសេរថា លោករ៉ូបឺតច្រើនតែនិយាយថា គេបានតែងតាំងគាត់ឲ្យធ្វើជារដ្ឋមន្រ្តីក្រសួងការពារជាតិ ហើយក្រោយមក គេតែងតាំងគាត់ជា ឯកអគ្គរាជទូតអាមេរិកប្រចាំចក្រភពអង់គ្លេស ហើយក៏បានឲ្យគាត់ធ្វើជាប្រធានក្រុមហ៊ុនភូលមិន។ តែគាត់ថា គេបានប្រគល់មុខនាទីទាំងអស់នេះឲ្យគាត់ ដោយសារគាត់ជាកូនរបស់លោកអ័ប្រាហាំ លីនខិនប៉ុណ្ណោះ មិនមែនដោយសារសមត្ថភាពរបស់គាត់នោះទេ។
មិនមែនមានតែកូនជនល្បីឈ្មោះប៉ុណ្ណោះទេ ដែលជួបរឿងដែលគួរឲ្យនឿយណាយដូចនេះ។ យើងរាល់គ្នាសុទ្ធតែធ្លាប់មានអារម្មណ៍ថា គេមិនឲ្យតម្លៃយើង ដោយសារគេដឹងថា យើងជានរណា។ តែយើងអាចដឹងច្បាស់ថា យើងមានតម្លៃ ដោយសារព្រះទ្រង់ស្រឡាញ់យើង។
សាវ័កប៉ុលបានទទួលស្គាល់ថា យើងជានរណាកាលយើងនៅរស់ក្នុងអំពើបាប ហើយក៏ដឹងថា យើងជានរណាក្នុងព្រះគ្រីស្ទ។ គាត់បានបង្រៀនថា “ដ្បិតកាលយើងនៅខ្សោយនៅឡើយ លុះដល់កំណត់ហើយ នោះព្រះគ្រីស្ទទ្រង់បានសុគតជំនួសមនុស្សទមិលល្មើស”(រ៉ូម ៥:៦)។ ព្រះទ្រង់ស្រឡាញ់យើង ទោះយើងជានរណាក៏ដោយ ហើយទោះយើងអាក្រក់យ៉ាងណាក៏ដោយ។ សាវ័កប៉ុលបង្រៀនទៀតថា “តែឯព្រះ ទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង”(ខ.៨)។ ព្រះទ្រង់បានឲ្យតម្លៃយើងយ៉ាងខ្លាំង បានជាព្រះអង្គអនុញ្ញាតឲ្យព្រះរាជបុត្រាព្រះអង្គ យាងទៅឈើឆ្កាង ជំនួសយើង។
តើយើងជានរណា? យើងជាកូនជាទីស្រឡាញ់របស់ព្រះ។ តើមានអ្វីដែលល្អលើសនេះទៀត?—Bill Crowder
តើអ្នកធ្លាប់រស់នៅ ដោយមិនមានគេឲ្យតម្លៃ នៅពេលណាខ្លះ? តើការនេះបានបង្រៀនអ្នកអ្វីខ្លះ អំពីព្រះដែលយកព្រះទ័យទុកដាក់ចំពោះអ្នក ដោយផ្ទាល់ៗខ្លួន?
ឱព្រះវរបិតាទូលបង្គំសូមអរព្រះគុណព្រះអង្គ ដែលបានស្រឡាញ់ទូលបង្គំ ទោះទូលបង្គំជាមនុស្សបែបណាក៏ដោយ ហើយសូមអរព្រះគុណព្រះអង្គ សម្រាប់ការអត់ទោសបាបឲុ្យទូលបង្គំ ហើយស្រឡាញ់ទូលបង្គំ។
For further study, explore Finding Our Identity in Christ at DiscovertheWord.org.
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៨១-៨៣ និង រ៉ូម ១១:១៩-៣៦
