ការជួបជុំគ្នាដើម្បីថ្វាយបង្គំ
ដោយKirsten Holmberg
August 18, 2023
សូមអាន ចោទិយកថា ១៦:៩-១៦ ហើយឯង និងកូនប្រុសកូនស្រីឯង ត្រូវអរសប្បាយនៅចំពោះព្រះយេហូវ៉ា ជាព្រះនៃឯង .. នៅកន្លែងដែលព្រះយេហូវ៉ា ជាព្រះនៃឯង ទ្រង់នឹងរើសសំរាប់តាំងព្រះនាមទ្រង់។ ចោទិយកថា ១៦:១១ ការចូលរួមកម្មវិធីជួបជុំធំៗ អាចកែប្រែជីវិតអ្នក តាមរបៀបដែលគួរឲ្យភ្ញាក់ផ្អើល។ បន្ទាប់ពីលោកដានីញែល យូដឃីន(Daniel Yudkin) ដែលជាអ្នកស្រាវជ្រាវ បានចូលរួមជាជាមួយមនុស្ស១២០០នាក់ ក្នុងការជួបជុំជាច្រើនថ្ងៃ ក្នុងប្រទេសអង់គ្លេស និងសហរដ្ឋអាមេរិក គាត់និងសហការីរបស់គាត់ក៏បានដឹងថា ពិធីបុណ្យធំៗអាចមានឥទ្ធិពលមកលើសមត្ថភាពរបស់យើង នៅក្នុងការដឹងខុសត្រូវ ហើយថែមទាំងមានផលប៉ះពាល់មកលើការសម្រេចចិត្តរបស់យើង នៅក្នុងការចែករំលែកធនធានជាមួយអ្នកដទៃ។ ការស្រាវជ្រាវរបស់ពួកគេក៏បានរកឃើញថា ៦៣ភាគរយនៃអ្នកចូលរួម ទទួលបាននូវបទពិសោធន៍ “នៃការកែប្រែ” នៅកម្មវិធីជួបជុំនោះ ដែលបានជួយពួកគេឲ្យមានអារម្មណ៍ថា ពួកគេមានការតភ្ជាប់កាន់តែជិតស្និទ្ធជាមួយមនុស្សជាតិ ហើយកាន់តែមានចិត្តសប្បុរសចំពោះមិត្តភក្តិ គ្រួសារ និងថែមទាំងមនុស្សដែលយើងមិនស្គាល់ផងដែរ។ ទោះជាយ៉ាងណាក៏ដោយ ពេលណាយើងជួបជុំគ្នាជាមួយអ្នកដទៃ ដើម្បីថ្វាយបង្គំព្រះ យើងមិនគ្រាន់តែអាចដកពិសោធន៍ជាមួយការកែប្រែផ្នែកសង្គម ក្នុងកម្មវិធីជួបជុំប៉ុណ្ណោះទេ តែយើងក៏អាចប្រកបទាក់ទងជាមួយព្រះអង្គដោយផ្ទាល់។ រាស្រ្តរបស់ព្រះពិតជាបានដកពិសោធន៍ជាមួយនឹងការប្រកបទាក់ទងជាមួយព្រះអង្គ កាលពួកគេជួបជុំគ្នា ក្នុងទីក្រុងយេរូសាឡិម នៅសម័យបុរាណ ក្នុងការប្រារព្ធពិធីពិធីបុណ្យសំខាន់ៗ ជារៀងរាល់ឆ្នាំ។ ពួកគេគ្មានយានជំនិះទំនើបៗដូចសម័យបច្ចុប្បន្ន សម្រាប់ធ្វើដំណើរទៅឲ្យដល់ព្រះវិហារ ដើម្បីឲ្យមានវត្តមាននៅទីនោះក្នុង១ឆ្នាំ៣ដង ដើម្បីចូលរួម “បុណ្យនំបុ័ងឥតដំបែ បុណ្យអាទិត្យទី៧ និងបុណ្យបារាំ”(ចោទិយកថា ១៦:១៦)។ ការជួបជុំគ្នានោះ គឺជាពេលនឹកចាំ ថ្វាយបង្គំ និងអរសប្បាយ នៅចំពោះព្រះអម្ចាស់ ជាមួយក្រុមគ្រួសារ អ្នកបម្រើ ជនបរទេស និងអ្នកផ្សេងទៀត(ខ.១១)។ ចូរយើងជួបជុំគ្នាជាមួយអ្នកដទៃ ដើម្បីថ្វាយបង្គំ ដើម្បីជួយស្អាងគ្នាទៅវិញទៅមក ឲ្យបន្តអរសប្បាយនឹងព្រះអង្គ ហើយទុកចិត្តលើសេចក្តីស្មោះត្រង់របស់ព្រះអង្គ។—Kirsten Holmberg
តើអ្នកបានដកពិសោធន៍ជាមួយនឹងការប្រកបទាក់ទងជាមួយព្រះអម្ចាស់ ដូចម្តេចខ្លះ ពេលដែលអ្នកជួបជុំជាមួយអ្នកដទៃ ដើម្បីថ្វាយបង្គំព្រះអង្គ? តើវត្តមានរបស់អ្នកដទៃ នៅពេលនោះបានមានអត្ថប្រយោជន៍អ្វីខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការត្រាស់ហៅរាស្រ្តព្រះអង្គឲ្យថ្វាយបង្គំព្រះអង្គទាំងអស់គ្នា។
គម្រោងអានព្រះគម្ពីររយៈពេល១ឆ្នាំ : ការជួបជុំគ្នាដើម្បីថ្វាយបង្គំ