សូមអាន លោកុប្បត្ដិ ៤:២-១១
ឯងបានធ្វើអ្វីដូច្នេះ ពីព្រោះឮសូរសំរែកនៃឈាមរបស់ប្អូនឯងពីដីឡើងទៅដល់អញ។ លោកុប្បត្ដិ ៤:១០
ក្នុងបទកំណាព្យដែលលោក ហេនរី វ៉ាតវើត ឡងហ្វេឡូ(Henry Wadsworth Longfellow ឆ្នាំ១៨០៧ ដល់១៨៨២) បាននិពន្ធមានចំណងជើងថា “សាក្សី” គាត់បានពិពណ៌នាអំពីសំពៅដឹកទាសករ ដែលបានលិចចូលបាតសមុទ្រ។ នៅក្នុងការសរសេរអំពី “គ្រោងឆ្អឹង ដែលបានជាប់ច្រវាក់” ក្នុងបាតសំពៅ លោកឡងហ្វេឡូក៏បានសោកសង្រេងចំពោះការស្លាប់របស់ជនរងគ្រោះដែលគ្មានឈ្មោះ មានចំនួនរាប់មិនអស់។ គាត់ក៏បានពិពណ៌នាក្នុងបទកំណាព្យគាត់ថា “ទាំងនេះសុទ្ធតែជាទុក្ខវេទនារបស់ទាសករ ពួកគេសម្លឹងមើលពីក្នុងរណ្តៅមក ពួកគេទួញយំចេញពីផ្នូរដែលគ្មានផ្លាកឈ្មោះថា យើងគឺជាសាក្សី!”
ប៉ុន្តែ តើសាក្សីទាំងនោះនិយាយទៅកាន់នរណា? តើការធ្វើបន្ទាល់ដ៏ស្ងាត់ស្ងៀម គ្មានមនុស្សណាឮដូចនេះមានប្រយោជន៍អ្វី? តែព្រះទ្រង់ជាសាក្សី ដែលបានទតឃើញអ្វីៗទាំងអស់។ បន្ទាប់ពីលោកកាអ៊ីន សម្លាប់លោកអេបិលហើយ គាត់ធ្វើពុតជាមិនបានធ្វើអ្វីខុស។ ពេលដែលព្រះអង្គសួរនាំគាត់ គាត់ប្រកែកថា “ទូលបង្គំមិនដឹងទេ តើទូលបង្គំជាអ្នកថែរក្សាប្អូនឬអី?” តែព្រះអង្គមានបន្ទូលថា “ឯងបានធ្វើអ្វីដូច្នេះ ពីព្រោះឮសូរសំរែកនៃឈាមរបស់ប្អូនឯងពីដីឡើងទៅដល់អញ ឥឡូវនេះ ឯងត្រូវដីដាក់បណ្តាសាដោយបានទទួលឈាមនៃប្អូនពីដៃឯង”(លោកុប្បត្តិ ៤:៩-១១)។
ក្រោយមក គេក៏បានបន្តប្រើឈ្មោះរបស់លោកកាអ៊ីន ដើម្បីធ្វើការដាស់តឿនអ្នកជឿព្រះអង្គ។ គឺដូចដែលសាវ័កយ៉ូហានបានដាស់តឿនយើងថា “ត្រូវឲ្យយើងស្រឡាញ់គ្នាទៅវិញទៅមក មិនមែនដូចជាកាអ៊ីន ដែលកើតពីមេកំណាចមក ហើយបានសំឡាប់ប្អូនខ្លួននោះឡើយ”(១យ៉ូហាន ៣:១១-១២)។ ឈ្មោះរបស់លោកអេបិល ក៏នៅមានគេយកមកប្រើផងដែរ តែដើម្បីហេតុផលផ្សេងពីនេះ។ គឺដូចដែលកណ្ឌគម្ពីរហេព្រើរបានចែងថា “ដោយសារសេចក្តីជំនឿ នោះអេបិលបានថ្វាយយញ្ញបូជាដល់ព្រះ ដែលប្រសើរជាងដង្វាយរបស់កាអ៊ីន ហើយមានសេចក្តីបន្ទាល់ពីគាត់ ដោយព្រោះយញ្ញបូជានោះថា គាត់សុចរិត ទាំងមានព្រះធ្វើបន្ទាល់ពីដង្វាយគាត់ផង បានជាទោះបើគាត់ស្លាប់ក៏ដោយ គង់តែនៅមាននិយាយទៅទៀត ដោយសារដង្វាយនោះឯង(ហេព្រើរ ១១:៤)។
ដូចនេះ គេនៅបន្តយកឈ្មោះអេបិលមកនិយាយ ក៏ដូចជាបន្តលើកឡើងអំពីជនរងគ្រោះ ជាទាសករ ដែលគេបានភ្លេចជាយូរមកហើយ។ ការនឹកចាំអំពីពួកគេគឺជាការល្អ ហើយយើងក៏ប្រឆាំងនឹងការកៀបសង្កត់ និងអំពើអយុត្តិធម៌គ្រប់ប្រភេទ។ ព្រះទ្រង់បានទតឃើញអ្វីៗទាំងអស់។ ព្រះអង្គនឹងប្រទានសេចក្តីយុត្តិធម៌។—Tim Gustafson
តើមានអំពើអយុត្តិធម៌ និងការកៀបសង្កត់អ្វីខ្លះ ដែលអ្នកបានឃើញ? តើព្រះទ្រង់អាចត្រាស់ហៅអ្នក ឲ្យធ្វើអ្វីខ្លះ ដើម្បីជួយជនរងគ្រោះ នៅថ្ងៃនេះ?
ឱព្រះវរបិតា ព្រះអង្គជាព្រះដែលទតឃើញអ្វីៗទាំងអស់។ សូមព្រះអង្គបង្ហាញទូលបង្គំ អំពីរបៀបជួយជនរងគ្រោះ នៃការកៀបសង្កត់ និងអំពើអយុត្តិធម៌។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១១៣-១១៥ និង ១កូរិនថូស ៦
