សូមអាន យ៉ូហាន ១១:២៥-៣៦
ពួកសាសន៍យូដានិយាយថា មើល លោកស្រឡាញ់គាត់ណាស់ហ្ន៎។ យ៉ូហាន ១១:៣៦
ខ្ញុំ និងមិត្តភក្តិដែលខ្ញុំបានរាប់អានគ្នាជាយូរមកហើយ បានបែកគ្នាពីរបីឆ្នាំហើយ។ ក្នុងអំឡុងពេលនោះ គាត់បានពិនិត្យសុខភាពរកឃើញថា គាត់មានជំងឺមហារីក ហើយក៏បានចាប់ផ្តើមការព្យាបាល។ មានពេលមួយ ខ្ញុំក៏បានធ្វើដំណើរទៅរដ្ឋរបស់គាត់ ដោយគ្មានការរំពឹងទុក ហើយក៏មានឱកាសជួបគាត់ម្តងទៀត។ ខ្ញុំបានដើរចូលទៅក្នុងភោជនីយដ្ឋាន ដោយទឹកភ្នែករលីងរលោង។ យើងមិនបានជួបគ្នាដោយផ្ទាល់ អស់រយៈពេលជាច្រើនឆ្នាំមកហើយ ហើយឥឡូវនេះ សេចក្តីស្លាប់កំពុងតែពួកសម្ងំនៅកៀនជ្រុង បានជាយើងនឹកចាំ អំពីភាពផុយស្រួលនៃជីវិត។ ទឹកភ្នែកដែលហូរចេញពីភ្នែករបស់យើងមក គឺបានកើតចេញពីមិត្តភាពដ៏វែងឆ្ងាយ ដែលមានពេញទៅដោយការធ្វើដំណើរផ្សងព្រេង ភាពកំប្លុកកំប្លែង សំណើច ការបាត់បង់ និងសេចក្តីស្រឡាញ់។ គឺពេញដោយក្តីស្រឡាញ់ខ្លាំងណាស់ បានជាយើងស្រក់ទឹកភ្នែកគ្រាន់តែបានឃើញគ្នា។
ព្រះយេស៊ូវក៏ព្រះកន្សែងផងដែរ។ កណ្ឌគម្ពីរដំណឹងល្អតាមលោកយ៉ូហាន បានកត់ទុកអំពីពេលមួយ ដែលពួកសាសន៍យូដាបានយាងព្រះអង្គទៅមើលកន្លែងដែលគេបានបញ្ចុះសពលោកឡាសា ជាមិត្តសំឡាញ់របស់ព្រះអង្គ(១១:៣៤)។ ពេលនោះ ព្រះអង្គក៏បានព្រះកន្សែង(ខ.៣៥)។ ពាក្យ “ព្រះកន្សែង” ក្នុងបទគម្ពីរនេះបានបង្ហាញឲ្យយើងដឹង អំពីជម្រៅនៃសេចក្តីស្រឡាញ់របស់ព្រះអង្គ ព្រោះនៅពេលដែលពួកសាសន៍យូដាបានឃើញព្រះអង្គព្រះកន្សែង ពួកគេក៏បានលាន់មាត់ថា “មើល លោកស្រឡាញ់គាត់ណាស់ហ្ន៎”(ខ.៣៦)។ ពាក្យមួយឃ្លានេះ គឺអាចនាំឲ្យមានការប៉ះពាល់ចិត្តល្មមនឹងឲ្យយើងឈប់បង្អង់ ដើម្បីថ្វាយបង្គំព្រះដ៏ជាមិត្តសំឡាញ់របស់យើង ដែលជ្រាបអំពីភាពកម្សោយរបស់យើង។ ព្រះយេស៊ូវជាព្រះដែលបានយកកំណើតជាមនុស្ស មានសាច់ មានឈាម និងទឹកភ្នែក ដូចយើងផងដែរ។ ដូចនេះ ព្រះអង្គជាព្រះសង្រ្គោះដែលស្រឡាញ់ និងជ្រាបអំពីភាពកម្សោយរបស់យើង។—John Blasé
តើអ្នកបានពិចារណា អំពីភាពជាមនុស្សរបស់ព្រះយេស៊ូវ នៅពេលណា? តើការដឹងថា ព្រះយេស៊ូវជ្រាបអំពីទុកលំបាករបស់មនុស្ស ហើយព្រះកន្សែង ដូចយើងដែរ បានលើកទឹកចិត្តអ្នក នៅថ្ងៃនេះដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ ដែលបានធ្វើជាព្រះ ដែលជួយសង្រ្គោះ និងព្រះកន្សែង ដោយសេចក្តីស្រឡាញ់។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១១៩:១-៨៨ និង ១កូរិនថូស ៧:២០-៤០
