រឿងដែលព្រះទ្រង់សរសេរបញ្ចប់
ដោយWinn Collier
August 31, 2023
សូមអាន : យ៉ូហាន ១៦:២៥-៣៣ នៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ។ យ៉ូហាន ១៦:៣៣ នៅលើក្របរបស់ទស្សនាវដី្តជីវិតដែលបានចេញផ្សាយ នៅថ្ងៃទី១២ ខែកក្កដា ឆ្នាំ១៩៦៨ គេឃើញមានរូបថតកុមារស្គមស្គាំងកំពុងស្រេកឃ្លានអាហារ នៅប្រទេសបាយអាហ្វ្រា(សព្វថ្ងៃ ជាប្រទេសនីហ្សេរីយ៉ា ក្នុងអំឡុងសម័យសង្គ្រាមស៊ីវិល)។ មានក្មេងប្រុសម្នាក់បានឃើញរូបនៅលើក្របទស្សនាវដី្តនោះ ហើយក៏បានយកវាទៅបង្ហាញគ្រូគង្វាល ហើយសួរគាត់ថា “តើព្រះទ្រង់ជ្រាបអំពីរឿងនេះទេ?” លោកគ្រូគង្វាលក៏បានឆ្លើយថា “លោកគ្រូដឹងថា ប្អូនមិនយល់អំពីរឿងនេះទេ តែព្រះទ្រង់ពិតជាបានជ្រាបអំពីរឿងនេះ”។ ក្មេងប្រុសនោះក៏បានដើរចេញ ដោយប្រកាសថា គាត់មិនមានចំណាប់អារម្មណ៍ចំពោះព្រះដែលមិនបានជួយពួកគេ នៅពេលដែលព្រះអង្គជ្រាបអំពីបញ្ហារបស់ពួកគេនោះទេ។ សំណួរដូចនេះ មិនគ្រាន់តែបានរំខានអារម្មណ៍របស់ក្មេងៗប៉ុណ្ណោះទេ តែក៏បានធ្វើឲ្យយើងចង់បានចម្លើយផងដែរ។ ក្មេងប្រុសម្នាក់នោះបានទទួលចម្លើយ អំពីការដែលព្រះទ្រង់ជ្រាបអំពីរឿងនោះយ៉ាងអាថ៌កំបាំង តែទន្ទឹមនឹងនោះ ខ្ញុំក៏ចង់ឲ្យគាត់បានឮអំពីរឿងដែលគួរឲ្យប៉ះពាល់ចិត្ត ដែលព្រះទ្រង់នៅបន្តសរសេរ សូម្បីតែនៅក្នុងតំបន់ ដូចអតីតប្រទេសបាយអាហ្វ្រាក៏ដោយ។ ព្រះយេស៊ូវបានបកស្រាយរឿងនេះ ឲ្យសិស្សរបស់ព្រះអង្គបានយល់ គឺដល់ពួកអ្នកដែលបានសន្និដ្ឋានថា ព្រះអង្គនឹងការពារពួកគេមិនឲ្យមានទុក្ខលំបាក ក្នុងការរស់នៅ។ ផ្ទុយទៅវិញ ព្រះគ្រីស្ទបានប្រាប់ពួកគេថា “នៅលោកីយ៍នេះ នោះអ្នករាល់គ្នាមានសេចក្តីវេទនាមែន”។ ទោះជាយ៉ាងណាក៏ដោយ ព្រះយេស៊ូវបានសន្យាថា ការអាក្រក់ទាំងនោះមិនមានជារៀងរហូតនោះទេ។ តាមពិត ព្រះអង្គបានឈ្នះលោកិយហើយ(យ៉ូហាន ១៦:៣៣)។ ហើយនៅក្នុងជំពូកចុងក្រោយរបស់រឿងនៃព្រះគម្ពីរដែលព្រះអង្គបាននិពន្ធ មានសេចក្តីចែងថា អំពើអយុត្តិធម៌ទាំងអស់នឹងទទួលការជំនុំជម្រះ ហើយទុក្ខលំបាកនីមួយៗទទួលការប្រោសឲ្យជា។ រឿងដែលបានចែង ចាប់តាំងពីកណ្ឌលោកុប្បត្ដិ រហូតដល់កណ្ឌវិវរណៈ បាននិយាយអំពីការដែលព្រះទ្រង់បានបំផ្លាញសេចក្តីអាក្រក់ ដោយការជំនុំជម្រះដ៏យុត្តិធម៌។ រឿងនេះបាននាំឲ្យយើងស្គាល់ព្រះនៃសេចក្តីស្រឡាញ់ ដែលយកព្រះទ័យទុកដាក់ចំពោះយើង យ៉ាងពិតប្រាកដ។ ព្រះយេស៊ូវបានប្រាប់ពួកសិស្សព្រះអង្គថា “ខ្ញុំប្រាប់សេចក្តីទាំងនេះ ដើម្បីឲ្យអ្នករាល់គ្នា បានសេចក្តីសុខសាន្ត ដោយសារខ្ញុំ”(ខ.៣៣)។ ចូរយើងសម្រាកក្នុងសេចក្តីសុខសាន្ត ឬសន្តិភាព និងព្រះវត្តមានរបស់ព្រះអង្គ នៅថ្ងៃនេះ។—Winn Collier
តើអ្នកមានអារម្មណ៍សោកសៅប៉ុណ្ណា ពេលដែលស្តាប់រឿងកំសត់? តើអ្នកបានរួចផុតពីអារម្មណ៍សោកសៅយ៉ាងណាខ្លះ ពេលដែលព្រះយេស៊ូវបានសន្យាថា នឹងសរសេរបញ្ចប់រឿងរបស់អ្នកឲ្យបានល្អ?
ឱព្រះអម្ចាស់ ទូលបង្គំមានការពិបាកចិត្ត ពេលដែលបានមើលឃើញការអាក្រក់ក្នុងលោកិយនេះ។ តែទូលបង្គំទុកចិត្តថា ព្រះអង្គនឹងជំនុំជម្រះការអាក្រក់គ្រប់យ៉ាង ដោយយុត្តិធម៌។
To learn more about the grand story of the Bible, visit ODBU.org/courses/HR110.
គម្រោងអានរយៈពេល១ឆ្នាំ : ទំនុកដំកើង ១៣៥-១៣៦ និង ១កូរិនថូស ១២