សេចក្តីសប្បុរសដែលមិននឹកស្មានដល់
ដោយArthur Jackson
September 4, 2023
សូមអាន : យេរេមា ៥២:៣១-៣៤ កាលសេចក្តីសប្បុរស របស់ព្រះដ៏ជាព្រះអង្គសង្គ្រោះនៃយើង និងសេចក្តីស្រឡាញ់ របស់ទ្រង់ដល់មនុស្ស បានលេចមកឲ្យឃើញ នោះទ្រង់បានជួយសង្គ្រោះយើង។ ទីតុស ៣:៤-៥ លោកខេវិន ហ្វ៊ឌ(Kevin Ford) បានធ្វើការនៅភោជនីយដ្ឋានលក់អាហាររហ័ស មិនដែលបានខកខាន មកធ្វើការសូម្បីតែម្តង ក្នុងរយៈពេល២៧ឆ្នាំ។ នៅក្នុងវីដេអូដែលគេបានបង្ហោះតាមបណ្ដាញសង្គម គាត់បានបង្ហាញចេញនូវការដឹងគុណចំពោះអំណោយតូចមួយ ដែលគេបានជូនគាត់ ដើម្បីរំឭកខួបនៃការងារ ដែលគាត់បានធ្វើជាងពីរទសវត្សរ៍មកនេះ។ មនុស្សរាប់ពាន់នាក់ដែលបានមើលវីដេអូនោះ ក៏បានរួមគ្នាបង្ហាញចិត្តសប្បុរសដល់គាត់ ដោយរៃអង្គាសប្រាក់បាន២៥ម៉ឺនដុល្លា សម្រាប់គាត់ ក្នុងរយៈពេលជាង១សប្តាហ៍។ គាត់មានអារម្មណ៍ថា វាជាការស្រមៃ គឺការស្រមៃដែលក្លាយជាការពិត។ ស្តេចយេហូយ៉ាគីន ជាស្តេចនៃនគរយូដា ដែលបានក្លាយជាឈ្លើយសឹក។ ទ្រង់ក៏ជាអ្នកទទួលសេចក្តីសប្បុរស ដែលមិននឹកស្មានដល់ផងដែរ។ បន្ទាប់ពីទ្រង់បានជាប់ឃុំខ្លួនអស់រយៈពេល៣៧ឆ្នំាំ ស្តេចបាប៊ីឡូនដែលមានចិត្តសប្បុរស ក៏បានដោះលែងទ្រង់ឲ្យមានសេរីភាព។ ស្តេចបាប៊ីឡូន “ក៏លើកមុខយ៉ូយ៉ាគីន ជាស្តេចយូដាឡើង នៅក្នុងឆ្នាំទី១នៃរាជ្យទ្រង់ ហើយដោះទ្រង់ឲ្យរួចចេញពីគុក ក៏មានព្រះបន្ទូលនឹងទ្រង់ដោយផ្អែមពីរោះ ហើយតាំងបល្ល័ង្កទ្រង់ឲ្យខ្ពស់ជាងបល្ល័ង្កនៃពួកស្តេច ដែលនៅជាមួយក្នុងក្រុងបាប៊ីឡូន”(យេរេមា ៥២:៣១-៣២)។ ស្តេចយេហូយ៉ាគីនទទួលបានមុខតំណែងថ្មី សំលៀកបំពាក់ថ្មី និងដំណាក់ថ្មី។ ព្រះទ្រង់បានប្រទានជីវិតថ្មីដល់ទ្រង់ តាមរយៈការឧបត្ថម្ភទាំងស្រុងពីស្តេចបាប៊ីឡូន។ រឿងនេះបានធ្វើឲ្យខ្ញុំនឹកចាំ អំពីរឿងខាងវិញ្ញាណ ដែលបានកើតឡើង ពេលដែលព្រះទ្រង់ប្រទានសេចក្តីសង្រ្គោះដល់មនុស្សទាំងអស់ ដែលទទួលជឿព្រះយេស៊ូវ មិនមែនដោយសារទង្វើល្អរបស់ពួកគេ ឬអ្នកដទៃនោះឡើយ តែដោយសារសេចក្តីសប្បុរស និងសេចក្តីស្រឡាញ់របស់ព្រះអង្គ។ ព្រះអង្គបាននាំពួកគេចេញពីសេចក្តីងងឹត និងសេចក្តីស្លាប់ ចូលទៅក្នុងពន្លឺ ហើយនាំចូលទៅក្នុងមហាគ្រួសាររបស់ព្រះអង្គ ដោយសារសេចក្តីសប្បុរស និងសេចក្តីស្រឡាញ់ដ៏អស្ចារ្យរបស់ព្រះអង្គ។—Arthur Jackson
តើសេចក្តីសប្បុរសអ្វីខ្លះរបស់មនុស្ស ដែលបានធ្វើឲ្យអ្នកនឹកចាំ អំពីសេចក្តីល្អរបស់ព្រះអង្គ? តើអ្នកនឹងឆ្លើយតប ដូចម្តេចខ្លះ ចំពោះសេចក្តីសប្បុរសរបស់ព្រះអង្គ ដែលបានស្វាគមន៍អ្នក ចូលទៅក្នុងមហាគ្រួសារព្រះអង្គ ផ្អែកទៅលើអ្វីដែលព្រះយេស៊ូវបានធ្វើ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការបង់ថ្លៃលោះបាបទូលបង្គំ ទោះបាបទូលបង្គំបានប្រឡាក់ខ្លាំងយ៉ាងណាក៏ដោយ ក៏ព្រះអង្គបានលាងសម្អាតឲ្យសរស្អាតដូចហិមៈ។
គម្រោងអានរយៈពេល១ឆ្នាំ : ទំនុកដំកើង ១៤៣-១៤៥ និង ១កូរិនថូស ១៤:២១-៤០