សូមអាន : អេសាយ ៦៥:១៦-២២
សេចក្តីវេទនាពីជាន់មុនបានភ្លេចទៅហើយ … ដ្បិតមើល អញនឹងបង្កើតផ្ទៃមេឃថ្មី ហើយនឹងផែនដីថ្មី។ អេសាយ ៦៥:១៦-១៧
វិចិត្រករជប៉ុន ឈ្មោះ ម៉ាកូតូ ហ្វ៊ូជីមូរ៉ា(Makoto Fujimura) បាននិពន្ធសៀវភៅដ៏ល្បីល្បាញ មានចំណងជើងថា សិល្បៈ បូកនឹងជំនឿ : ទេវសាស្ត្រនៃការបង្កើត ដែលក្នុងសៀវភៅនេះ គាត់បានពិពណ៌នាអំពីវិធីសាស្ត្រឃីនសូគិ ដែលជាទម្រង់សិល្បៈបុរាណរបស់ជនជាតិជប៉ុន។ នៅក្នុងសិល្បៈនេះ សិល្បករបានយកអំបែង(របស់ពែង ឬប៉ាន់តែ) ហើយក៏បានផ្គុំអំបែងចូលគ្នា ដោយប្រើកាវ និងបញ្ចូលសរសៃមាស នៅក្នុងស្នាមប្រេះបែកទាំងនោះ។ លោកហ្វ៊ូជីមូរ៉ាក៏បានពន្យល់ថា វិធីសាស្រ្តឃីនស៊ូគិ មិនគ្រាន់តែបានជួសជុលពែងដែលបានបែកប៉ុណ្ណោះទេ តែថែមទាំងធ្វើឲ្យពែងដែលបានបែកនោះ មានសម្រស់ស្អាតលើសដើម។ វិធីសាស្រ្តឃីនស៊ូគិត្រូវបានគេយកមកអនុវត្តន៍ជាលើកដំបូង កាលប៉ុន្មានសតវត្សរ៍មុន នៅពេលដែលពែងរបស់ស្តេចក្រាញ់ម្នាក់បានបែក ហើយបន្ទាប់មក គេក៏បានជួសជុលវាឡើងវិញយ៉ាងស្រស់ស្អាត។ ចាប់តាំងពីពេលនោះមក វាក៏បានក្លាយជាសិល្បៈដែលគេបានឲ្យតម្លៃ និងស្រឡាញ់យ៉ាងខ្លាំង។
ហោរាអេសាយក៏បានពិពណ៌នា អំពីរបៀបដែលព្រះអម្ចាស់ទ្រង់នឹងជួសជុលផែនដីឡើងវិញ ដោយសិល្បៈដ៏ស្រស់ស្អាត ។ យើងមានភាពប្រេះបែក ដោយសារការបះបោរទាស់នឹងព្រះ ហើយក៏បានបែកខ្ទេច ដោយសារភាពអាត្មានិយមរបស់យើង តែទោះជាយ៉ាងណាក៏ដោយ ព្រះទ្រង់បានសន្យាថានឹង “បង្កើតផ្ទៃមេឃ និងផែនដីថ្មី”(៦៥:១៧)។ ព្រះអង្គមិនគ្រាន់តែមានផែនការជួសជុលផែនដីចាស់ប៉ុណ្ណោះទេ តែថែមទាំងកែប្រែផែនដីឲ្យថ្មីស្រឡាង ដោយកែប្រែពីភាពប្រេះបែក ទៅជាភាពស្រស់ស្អាត។ ស្នាព្រះហស្តថ្មីនេះនឹងមានភាពអស្ចារ្យណាស់ បានជាគេនឹងភ្លេចសេចក្តីវេទនាកាលពីមុន ហើយគេក៏លែងនឹកចាំអ្វីៗដែលកន្លងផុតទៅ(ខ.១៦-១៧)។ នៅក្នុងការបង្កើតថ្មីនេះ ព្រះទ្រង់នឹងមិនព្យាយាមលាក់បាំងកំហុសរបស់យើងនោះទេ តែនឹងប្រើព្រះចេស្តាដ៏ប៉ិនប្រសប់របស់ព្រះអង្គ ដើម្បីកែប្រែអ្វីៗដែលអាក្រក់ ឲ្យមានភាពស្រស់ស្អាត ហើយអ្វីដែលស្លាប់ ឲ្យមានដង្ហើមជាថ្មី។
ខណៈពេលដែលយើងពិនិត្យមើលជីវិតរបស់យើង ដែលបានប្រេះបែក យើងមិនចាំបាច់ត្រូវអស់សង្ឃឹមឡើយ។ ព្រះទ្រង់កំពុងធ្វើការស្អាងជីវិតយើង ឲ្យស្រស់ស្អាតឡើងវិញ។—Winn Collier
តើមានអ្វីខ្លះក្នុងជីវិតអ្នក ដែលត្រូវការការស្អាងឡើងវិញ ឲ្យមានភាពស្រស់ស្អាត? តើព្រះបន្ទូលសន្យាអំពីការស្អាងឡើងវិញ បានបណ្តាលចិត្តអ្នកឲ្យមានសង្ឃឹមឡើងវិញ ដូចម្តេចខ្លះ?
ឱព្រះអម្ចាស់ សូមព្រះអង្គស្អាងទូលបង្គំឡើងវិញ ហើយជួយទូលបង្គំឲ្យនាំអ្នកដទៃ ទទួលយកការផ្លាស់ប្រែពីព្រះអង្គផងដែរ។
គម្រោងអានរយៈពេល១ឆ្នាំ : សាស្តា ១០-១២ និង កាឡាទី ១
