ព្រះទ្រង់ហៅឈ្មោះអ្នក
ដោយMike Wittmer
September 26, 2023
សូមអាន : លោកុប្បត្តិ ១៦:១-៩,១៦ ទ្រង់មានព្រះបន្ទូលសួរថា នែហាការ បាវសារ៉ាយអើយ តើឯងមកពីណា ហើយគិតទៅឯណាហ្នឹង? លោកុប្បត្តិ ១៦:៨ ណាថាលា(Natalia) បានធ្វើដំណើរទៅប្រទេសផ្សេង តាមការសន្យាថានឹងបានទទួលការអប់រំនៅសាលាល្អៗ។ តែមិនយូរប៉ុន្មាន បុរសជាឪពុករបស់ក្រុមគ្រួសារដែលនាងស្នាក់នៅជាមួយ ក៏បានចាប់ផ្តើមធ្វើបាបខាងផ្លូវកាយ និងផ្លូវភេទរបស់នាង។ គាត់បានបង្ខំនាងឲ្យធ្វើការជាអ្នកបម្រើក្នុងផ្ទះ និងមើលកូនរបស់គាត់ ដោយគ្មានប្រាក់កំរៃ។ គាត់ថែមទាំងបានបង្ខាំងនាងមិនឲ្យចេញក្រៅផ្ទះ ឬប្រើទូរស័ព្ទឡើយ។ ដូចនេះ នាងក៏បានក្លាយជាទាសកររបស់គាត់។ លោកអាប់រ៉ាម និងនាងសារ៉ាយមានបាវបម្រើម្នាក់ជាជនជាតិអេស៊ីព្ទ ឈ្មោះហាការ។ ពួកគេមិនដែលហៅឈ្មោះរបស់នាង ពួកគេគ្រាន់តែហៅនាងថា “បាវរបស់ខ្ញុំ” ឬ “បាវរបស់អ្នក”(លោកុប្បត្ដិ ១៦:២,៥-៦)។ ហើយពួកគេគ្រាន់តែចង់ប្រើនាង ដើម្បីបង្កើតកូនសម្រាប់ស្នងមរតកលោកអ័ប្រាហាំប៉ុណ្ណោះ។ ព្រះទ្រង់មិនដូចពួកគេទេ។ ទេវតានៃព្រះអម្ចាស់បានបង្ហាញអង្គទ្រង់ជាលើកដំបូង ក្នុងព្រះគម្ពីរ ពេលទ្រង់មានបន្ទូលទៅកាន់នាងហាការនៅវាលរហោស្ថាន កាលនាងកំពុងមានផ្ទៃពោះ។ ទេវតានៃព្រះអម្ចាស់គឺជាអ្នកនាំសាររបស់ព្រះ ឬជាព្រះ។ នាងហាការរជឿថា ទ្រង់ជាព្រះ ព្រោះនាងនិយាយថា នៅទីនេះ នាងបានឃើញព្រះដែលទ្រង់ទតឃើញនាង(ខ.១៣)។ ព្រះអង្គក៏បានហៅឈ្មោះនាងថា “នែហាការ បាវសារ៉ាយអើយ តើឯងមកពីណា ហើយគិតទៅឯណាហ្នឹង?”(ខ.៨)។ ព្រះទ្រង់ក៏បានទតឃើញណាថាលា ហើយក៏បាននាំមនុស្សទៅជួយរំដោះនាង។ សព្វថ្ងៃនេះ នាងកំពុងរៀននៅសាលាពេទ្យ ដើម្បីធ្វើការជាគិលានុបដ្ឋាយិកា នៅពេលអនាគត។ ព្រះទ្រង់ទតឃើញនាងហាការ ហើយក៏បានហៅឈ្មោះនាង។ ហើយព្រះអង្គក៏ទតឃើញអ្នកផងដែរ។ គេប្រហែលមើលរំលងអ្នក ឬធ្វើបាបអ្នក។ តែព្រះយេស៊ូវហៅឈ្មោះអ្នក ចូររត់ទៅរកព្រះអង្គ។—Mike Wittmer
តើការដែលព្រះយេស៊ូវស្គាល់ឈ្មោះអ្នក មានន័យយ៉ាងណា ចំពោះអ្នក? តើអ្នកអាចលើកទឹកចិត្តអ្នកដទៃ តាមរបៀបស្រដៀងនេះ យ៉ាងដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ ដែលបានស្គាល់ឈ្មោះទូលបង្គំ។ ទូលបង្គំសូមសម្រាកក្នុងសេចក្តីស្រឡាញ់ដែលព្រះអង្គមានចំពោះទូលបង្គំ។
For further study, read Reclaiming Hope: Why We All Need Mercy, Justice, and Hope at DiscoverySeries.org.
គម្រោងអានរយៈពេល១ឆ្នាំ : អេសាយ ៣-៤ និង កាឡាទី ៦