២សាំយ៉ូអែល ៩:១-១០
កុំខ្លាចអ្វីឡើយ ដ្បិតយើងនឹងសំដែងសេចក្តីករុណាដល់អ្នក ដោយយល់ដល់យ៉ូណាថានបិតាអ្នក។ ២សាំយ៉ូអែល ៩:៧
នៅក្នុងអត្ថបទដែលមានការលើកទឹកចិត្តយ៉ាងខ្លាំង ដែលលោកយ៉ូណាថាន ចាក(Jonathan Tjarks) បាននិពន្ធ មានចំណងជើងថា “តើកូនប្រុសខ្ញុំស្គាល់អ្នកទេ?” លោកយ៉ូណាថានបានពិពណ៌នា អំពីការតយុទ្ធរបស់គាត់ជាមួយនឹងជំងឺមហារីកដំណាក់កាលចុងក្រោយ និងអំពីបំណងចិត្តរបស់គាត់ ដែលចង់ឲ្យអ្នកដទៃជួយយកអសារប្រពន្ធ និងកូនប្រុសរបស់គាត់ ដែលនៅក្មេងនៅឡើយ។ បន្ទាប់ពីបុរសអាយុ៣៤ឆ្នាំរូបនេះ បានសរសេរអត្ថបទនេះបាន៦ខែ គាត់ក៏បានលាចាកលោក ។ លោកយ៉ូណាថាន ជាអ្នកជឿព្រះយេស៊ូវ ដែលឪពុករបស់គាត់បានស្លាប់ កាលគាត់កំពុងស្ថិតក្នុងវ័យជំទង់ ដូចនេះ គាត់ក៏បានចែកចាយខគម្ពីរ ដែលបានបង្រៀនឲ្យគេជួយទំនុកបំរុងស្រ្តីមេម៉ាយ និងក្មេងកំព្រា(និក្ខមនំ ២២:២២ និងអេសាយ ១១៧ យ៉ាកុប ១:២៧)។ ហើយក្នុងពាក្យសម្តីដែលគាត់សរសេរ សំដៅទៅរកមិត្តភក្តិរបស់គាត់ គាត់ក៏បានសរសេរថា “ពេលខ្ញុំជួបអ្នកនៅស្ថានសួគ៌ ខ្ញុំមានសំណួរតែមួយប៉ុណ្ណោះ សម្រាប់សួរអ្នក។ តើអ្នកបានប្រព្រឹត្តល្អចំពោះកូនប្រុស និងភរិយាខ្ញុំទេ? … តើកូនប្រុសខ្ញុំស្គាល់អ្នកទេ?”
រឿងនេះបានធ្វើឲ្យខ្ញុំនឹកចាំ អំពីពេលមួយដែលស្តេចដាវីឌស្វែងរក ពូជពង្សរបស់ស្តេចសូលដែលនៅសល់ ដើម្បីឲ្យទ្រង់បានសម្ដែងសេចក្តីករុណាដល់អ្នកនោះ ដោយយល់ដល់យ៉ូណាថាន(២សាំយ៉ូអែល ៩:១)។ បុត្រារបស់ព្រះអង្គម្ចាស់យ៉ូណាថាន ព្រះនាមមភីបូសែត ជាជនពិការជើងទាំងសង្ខាង(ខ.៣) ដោយសារទ្រង់ជួបគ្រោះថ្នាក់កាលពីក្មេង(៤:៤)។ គេក៏បាននាំទ្រង់ចូលគាត់ស្តេចដាវីឌ។ ស្តេចដាវីឌក៏បានមានបន្ទូល ទៅកាន់ទ្រង់ថា “កុំខ្លាចអ្វីឡើយ ដ្បិតយើងនឹងសំដែងសេចក្តីករុណាដល់អ្នក ដោយយល់ដល់យ៉ូណាថានបិតាអ្នក ហើយយើងនឹងប្រគល់អស់ទាំងស្រែចំការរបស់សូលជាជីតាដល់អ្នក តែឯខ្លួនអ្នក និងបរិភោគនៅតុជាមួយនឹងយើងជានិច្ច”(៩:៧)។ ស្តេចដាវីឌបានបង្ហាញព្រះទ័យទុកដាក់ ដោយសេចក្តីស្រឡាញ់ចំពោះព្រះអង្គម្ចាស់មភីបូសែត ហើយព្រះអង្គម្ចាស់មភីបូសែត ទំនងពិតជាបានដឹងថា ស្តេចដាវីឌមានសេចក្តីមេត្តាចំពោះទ្រង់មែន(មើល ១៩:២៤-៣០)។
ព្រះយេស៊ូវបានត្រាស់ហៅយើង ឲ្យស្រឡាញ់អ្នកដទៃ ដូចដែលព្រះអង្គស្រឡាញ់យើង(យ៉ូហាន ១៣:៣៤)។ ខណៈពេលដែលព្រះអង្គធ្វើការនៅក្នុង និងតាមរយៈយើង ចូរយើងស្គាល់ពួកគេ និងស្រឡាញ់ពួកគេ យ៉ាងច្បាស់លាស់ផងដែរ។—Tom Felten
តើធ្វើដូចម្តេចឲ្យអ្នកស្គាល់អ្នកដទៃកាន់តែច្បាស់? តើអ្នកអាចស្រឡាញ់ពួកគេ ដូចដែលព្រះស្រឡាញ់អ្នក យ៉ាងដូចម្តេចខ្លះ?
ឱព្រះវរបិតាដែលគង់នៅស្ថានសួគ៌ សូមព្រះអង្គជួយទូលបង្គំ ឲ្យថ្វាយព្រះកិត្តិនាមដល់ព្រះអង្គ ដោយព្យាយាមស្គាល់ និងស្រឡាញ់អ្នកដទៃ។
គម្រោងអានព្រះគម្ពីររយៈពេល១ឆ្នាំ : អេសាយ ៣៩-៤០ និង កូល៉ុស ៤
