ទំនុកដំកើង ៤០:១-៤
ទ្រង់បានស្រង់ខ្ញុំចេញពីអន្លង់គួរស្បើម ឲ្យរួចពីភក់ស្អិត ក៏ដាក់ជើងខ្ញុំលើថ្មដា ព្រមទាំងតាំងជំហានខ្ញុំឲ្យខ្ជាប់ខ្ជួន។ ទំនុកដំកើង ៤០:២
កាលលោកជេក ម៉ាណា(Jake Manna) កំពុងដំឡើងផ្ទាំងសូឡា ក្នុងការដ្ឋានរបស់គាត់ គាត់ក៏បានទទួលដំណឹងថា មានក្មេងស្រីអាយុ៥ឆ្នាំម្នាក់បាត់ខ្លួន។ ខណៈពេលដែលអ្នកជិតខាងបានស្វែងរកក្មេងស្រីនោះ នៅតាមបន្ទប់ដាក់រថយន្ត និងទីធ្លាផ្ទះ លោកម៉ាណាក៏បានចេញទៅតាមផ្លូវមួយ ឆ្ពោះទៅរកតំបន់ព្រៃឈើនៅក្បែរនោះ ហើយក៏បានរកឃើញក្មេងស្រីកំពុងវង្វេងម្នាក់ឯង នៅក្នុងព្រៃលិចទឹកត្រឹមចង្កេះ។ គាត់ក៏បានលុយទឹក ដែលមានភក់ជាប់ស្អិតយ៉ាងប្រុងប្រយ័ត្នទៅរកនាង ហើយបានស្រង់នាងចេញពីស្ថានភាពដ៏ពិបាកនោះ។ គាត់ក៏បាននាំនាងត្រឡប់ទៅម្តាយរបស់នាង ទាំងខោអាវនៅសើម ដោយសុវត្ថិភាព។ ម្តាយរបស់នាងមានការដឹងគុណចំពោះគាត់យ៉ាងខ្លាំង។
ស្តេចដាវីឌក៏បានដកពិសោធន៍នឹងការជួយសង្គ្រោះ ឲ្យរួចពីគ្រោះថ្នាក់ ដូចក្មេងស្រីនោះផងដែរ។ ក្នុងបទទំនុកដំកើង ដែលទ្រង់បានច្រៀងថ្វាយព្រះអម្ចាស់ ទ្រង់បានរង់ចាំដោយការអត់ធ្មត់ ចំពោះការឆ្លើយតបរបស់ព្រះអម្ចាស់ ចំពោះការស្រែកសូមក្តីមេត្តារបស់ទ្រង់(ទំនុកដំកើង ៤០:១)។ ហើយព្រះអម្ចាស់ក៏បានឆ្លើយតប និងយាងចូលមកជិតទ្រង់ ដោយយកព្រះទ័យទុកដាក់យ៉ាងជិតស្និទ្ធចំពោះសម្លេងស្រែករបស់ស្តេចដាវីឌសូមជំនួយ ហើយក៏បានឆ្លើយតប ដោយសង្គ្រោះទ្រង់ឲ្យរួចកាលៈទេសៈដ៏ពិបាក ប្រៀបដូចជា “អន្លង់គួរស្បើម ឲ្យរួចពីភក់ស្អិត”(ខ.២) ដោយប្រទានកន្លែងឈរដ៏រឹងមាំ សម្រាប់ជីវិតរបស់ស្តេចដាវីឌ។ ដោយសារទ្រង់បានទទួលការស្រោចស្រង់ចេញពីភក់ស្អិតនៃជីវិត ទ្រង់មានព្រះទ័យកាន់តែចង់ច្រៀងសរសើរដំកើងព្រះអម្ចាស់ ហើយទុកចិត្តព្រះអម្ចាស់នៅពេលអនាគត ហើយចែកចាយរឿងរបស់ព្រះអម្ចាស់ដល់អ្នកដទៃ(ខ.៣-៤)។
ពេលណាជីវិតរបស់យើងជួបបញ្ហាប្រឈម ដែលមានដូចជាទុក្ខលំបាកផ្នែកហិរញ្ញវត្ថុ បញ្ហាទំនាក់ទំនងប្តីប្រពន្ធ និងភាពទាល់ច្រក ចូរយើងស្រែករកព្រះ ហើយរង់ចាំការឆ្លើយតបរបស់ព្រះអង្គ ដោយចិត្តអត់ធ្មត់(ខ.១)។ ព្រះអង្គគង់នៅក្បែរយើងស្រាប់ ដោយត្រៀមខ្លួនជួយយើង ក្នុងពេលដែលយើងត្រូវការជំនួយ ហើយប្រទានយើងនូវកន្លែងដ៏រឹងមាំសម្រាប់ឈរ។—Marvin Williams
តើព្រះទ្រង់រំដោះអ្នក ឲ្យរួចផុតពី “ភក់ស្អិត” នៅពេលណា? តើជំនួយរបស់ព្រះអង្គកាលពីមុន បានលើកទឹកចិត្តអ្នក ឲ្យទុកចិត្តព្រះអង្គយ៉ាងណាខ្លះ?
ឱព្រះនៃសេចក្តីស្រឡាញ់ ពេលណាទូលបង្គំជាប់នៅក្នុងភក់ស្អិត ទូលបង្គំនឹងរង់ចាំព្រះអង្គជួយទូលបង្គំ ដោយចិត្តអត់ធ្មត់។
គម្រោងអានព្រះគម្ពីររយៈពេល១ឆ្នាំ : យេរេមា ៣២-៣៣ និង ហេព្រើរ ១
