ប្រឈមមុខដោះស្រាយដោយក្តីស្រឡាញ់
ដោយTom Felten
November 18, 2023
លោកុប្បត្តិ ៤:១-១២ ព្រះយេហូវ៉ាទ្រង់មានព្រះបន្ទូលសួរកាអ៊ីនថា ឯងខឹងធ្វើអី ហេតុអ្វីបានជាឯងធ្វើទឹកមុខក្រញូវដូច្នេះ? លោកុប្បត្ដិ ៤:៦ បងប្អូនក្នុងព្រះគ្រីស្ទម្នាក់បានធ្វើកិច្ចការជាច្រើនបានល្អ តែគាត់មានបញ្ហាមួយ។ គ្រប់គ្នាសុទ្ធតែដឹងអំពីរឿងនេះ។ តែដោយសារគាត់បានសម្រេចបានជោគជ័យ ក្នុងកិច្ចការភាគច្រើន យ៉ាងមានប្រសិទ្ធភាព គេមិនបានលើកឡើងអំពីបញ្ហានៃភាពឆេវឆាវរបស់គាត់ ឲ្យបានគ្រប់គ្រាន់ទេ។ គេក៏មិនដែលបានប្រឈមមុខជួយដោះស្រាយបញ្ហាកំហឹងរបស់គាត់ដែរ។ គួរឲ្យស្តាយណាស់ បញ្ហានេះបានបណ្តាលឲ្យមនុស្សជាច្រើនទទួលរងការឈឺចាប់ ក្នុងអំឡុងពេលប៉ុន្មានឆ្នាំនោះ។ ហើយនៅទីបញ្ចប់ វាបាននាំឲ្យគាត់បាត់បង់អាជីពរបស់គាត់ ដោយមិនបានព្រៀងទុក។ ខ្ញុំគួរតែបានជួយប្រឈមមុខដោះស្រាយបញ្ហានេះ ជាមួយគាត់ ដោយក្តីស្រឡាញ់ តាំងពីយូរមកហើយ។ ក្នុងបទគម្ពីរ លោកុប្បត្តិ ជំពូក៤ ព្រះទ្រង់បានប្រទានយើងនូវការបកស្រាយដ៏ឥតខ្ចោះ អំពីការប្រឈមមុខដោះស្រាយបញ្ហានៃអំពើបាបរបស់នរណាម្នាក់ ដោយក្តីស្រឡាញ់។ លោកកាអ៊ីនមានបញ្ហាកំហឹងដែលនាំទៅរកការប្រព្រឹត្តអំពើបាបធ្ងន់ធ្ងរ។ ក្នុងនាមគាត់ជាកសិករ គាត់បានយកផលដំណាំរបស់គាត់មកថ្វាយព្រះអម្ចាស់(ខ.៣)។ តែព្រះអង្គមិនសព្វព្រះហឫទ័យចំពោះដង្វាយកាអ៊ីនទេ នោះកាអ៊ីនក៏ក្តៅក្រហាយ ហើយឡើងទឹកមុខក្រញូវ(ខ.៥)។ ដូចនេះ ព្រះទ្រង់ក៏បានប្រឈមមុខដោះស្រាយបញ្ហានេះ ដោយសួរគាត់ថា “ឯងខឹងធ្វើអ្វី?”(ខ.៦)។ បន្ទាប់មក ព្រះអង្គក៏បានប្រាប់លោកកាអ៊ីនឲ្យងាកចេញពីបាបរបស់គាត់ ហើយដេញតាមការអ្វីដែលល្អ និងត្រឹមត្រូវវិញ។ គួរឲ្យស្តាយណាស់ លោកកាអ៊ីនមិនបានអើពើចំពោះព្រះបន្ទូលព្រះអង្គ ហើយក៏បានប្រព្រឹត្តអំពើដ៏អាក្រក់បំផុត(ខ.៨)។ យើងមិនអាចបង្ខំនរណាម្នាក់ ឲ្យងាកចេញពីអំពើបាប តែយើងអាចជួយប្រឈមមុខដោះស្រាយបញ្ហាគាត់ ដោយក្តីអាណិត។ យើងអាច “និយាយចេញនូវសេចក្តីពិត ដោយសេចក្តីស្រឡាញ់” ដើម្បីឲ្យយើងបានផ្លាស់ប្រែកាន់តែមានលក្ខណៈដូចព្រះគ្រីស្ទ(អេភេសូរ ៤:១៥)។ ហើយ ខណៈពេលដែលព្រះទ្រង់ប្រទានយើងឲ្យមានត្រចៀកស្តាប់ យើងក៏អាចបើកចិត្តស្តាប់អ្នកដទៃនិយាយសេចក្តីពិតដែលពិបាកទទួលយក ដើម្បីកែប្រែជីវិតយើងផងដែរ។—Tom Felten
ហេតុអ្វីយើងចាំបាច់ត្រូវប្រឈមមុខដោះស្រាយបញ្ហានៃអំពើបាបរបស់អ្នកដទៃ ដោយក្តីស្រឡាញ់? តើអ្នកបានទទួលពាក្យសម្ដីដែលពិបាកទទួល តែមានប្រយោជន៍ ដោយរបៀបណាខ្លះ?
ឱព្រះវរបិតា សូមព្រះអង្គជួយទូលបង្គំឲ្យមានសេចក្តីក្លាហាន ដើម្បីប្រឈមមុខដោះស្រាយបញ្ហាអំពើបាបរបស់អ្នកដទៃ ដើម្បីទទួលពាក្យពិតដោយព្រះគុណ ទោះពិបាកទទួលយ៉ាងណាក៏ដោយ។
គម្រោងអានព្រះគម្ពីររយៈពេល១ឆ្នាំ : អេសេគាល ៨-១០ និង ហេព្រើរ ១៣