ការចុះចូលស្តាប់បង្គាប់ព្រះយេស៊ូវ
ដោយTim Gustafson
December 3, 2023
យេរេមា ៣៨:១៧-២៣ សូមស្តាប់ព្រះបន្ទូលនៃព្រះយេហូវ៉ា តាមសេចក្តីដែលទូលបង្គំទូលដល់ទ្រង់ចុះ នោះទ្រង់នឹងបានសេចក្តីសុខ ហើយនឹងមានព្រះជន្មនៅ។ យេរេមា ៣៨:២០ កាលពីឆ្នាំ១៩៥១ វេជ្ជបណ្ឌិតរបស់លោក យ៉ូសែប ស្តាលីន(Joseph Stalin) បានដាស់តឿនគាត់ ឲ្យកាត់បន្ថយបន្ទុកការងារ ដើម្បីថែរក្សាសុខភាពឲ្យបានល្អ។ អ្នកដឹកនាំសហភាពសូវៀតរូបនេះ ក៏បានចោទប្រកាន់គ្រូពេទ្យនោះថា ជាគិញសម្ងាត់របស់សត្រូវ ហើយក៏បានឲ្យគេចាប់ខ្លួនគាត់។ អ្នកដឹកនាំផ្តាច់ការនេះបានកៀបសង្កត់មនុស្សជាច្រើន ដោយការកុហករបស់ខ្លួន បានជាមិនអាចទទួលយកការពិត ហើយក៏បានកម្ចាត់មនុស្សដែលនិយាយការពិត អស់ច្រើននាក់ហើយ។ តែទោះជាយ៉ាងណាក៏ដោយ សេចក្តីពិតនៅតែមានជ័យជម្នះមកលើគាត់។ លោកស្តាលីនក៏បានបាត់បង់ជីវិត ក្នុងឆ្នាំ១៩៥៣។ ហោរាយេរេមាក៏ត្រូវគេចាប់ខ្លួន ដោយសារគាត់បានថ្លែងទំនាយជាសេចក្តីពិត ហើយក៏បានជាប់ច្រវាក់(យេរេមា ៣៨:១-៦ ៤០:១)។ កាលនោះ គាត់បានទូលស្តេចសេដេគា ជាស្តេចយូដាថា “សូមស្តាប់ព្រះបន្ទូលនៃព្រះយេហូវ៉ា តាមសេចក្តីដែលទូលបង្គំទូលដល់ទ្រង់ចុះ នោះទ្រង់នឹងបានសេចក្តីសុខ ហើយនឹងមានព្រះជន្មនៅ”(៣៨:២០)។ ការដែលស្តេចអង្គនេះមិនបានចុះចាញ់កងទ័ពសត្រូវដែលកំពុងឡោមព័ទ្ធទីក្រុងរបស់ទ្រង់ បានបណ្តាលឲ្យទ្រង់ជួបរឿងកាន់តែអាក្រក់។ គឺដូចដែលហោរាយេរេមាបានព្រមានទ្រង់ថា “គេនឹងនាំភរិយា និងព្រះរាជ្យបុត្ររបស់ទ្រង់ទាំងប៉ុន្មាន ចេញទៅឯពួកខាល់ដេ ហើយអង្គទ្រង់ក៏មិនរួចពីកណ្តាប់ដៃគេដែរ”(ខ.២៣)។ ស្តេចសេដេគាបានបដិសេធន៍មិនព្រមធ្វើតាមសេចក្តីពិតនេះ។ ទីបំផុត ពួកសាសន៍បាប៊ីឡូនក៏បានចាប់ព្រះកាយទ្រង់ សម្លាប់បុត្រារបស់ទ្រង់ទាំងអស់ ហើយក៏បានដុតបំផ្លាញទីក្រុងទ្រង់ចោល(ជំពូក៣៩)។ រឿងនេះបានបង្រៀនយើងថា មនុស្សម្នាក់ៗសុទ្ធតែប្រឈមមុខដាក់ការសម្រេចចិត្ត ដូចស្តេចសេដេគាផងដែរ។ យើងជាប់អន្ទាក់ ដែលឃុំឃាំងខ្លួនយើង ក្នុងជីវិតដែលមានបាប និងការសម្រេចចិត្តខុស។ ជាញឹកញាប់ យើងធ្វើឲ្យមានរឿងកាន់តែធ្ងន់ធ្ងរ ដោយបដិសេធន៍មិនព្រមស្តាប់តាមមនុស្សដែលប្រាប់យើងអំពីការពិត ស្តីអំពីខ្លួនយើង។ អ្វីដែលយើងចាំបាច់ត្រូវធ្វើនោះ គឺត្រូវចុះចូលបំណងព្រះទ័យព្រះពិតតែមួយ ដែលបានមានបន្ទូលថា “ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ”(យ៉ូហាន ១៤:៦)។—Tim Gustafson
តើការសម្រេចចិត្តរបស់អ្នកក្នុងការរស់នៅ មានភាពសមស្របនឹងព្រះបន្ទូលព្រះយេស៊ូវដែរឬទេ? តើមានអ្វីរារាំងអ្នកមិនឲ្យចុះចូលព្រះអង្គ?
ឱព្រះដែលមានសេចក្តីអាណិត សូមព្រះអង្គអត់ទោសឲ្យទូលបង្គំ ដែលមានសេចក្តីអំនួត ដែលបានរារាំងទូលបង្គំមិនឲ្យស្តាប់បង្គាប់ព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសេគាល ៤៥-៤៦ និង ១យ៉ូហាន ២