សេចក្តីស្រឡាញ់របស់ព្រះដែលការពារយើង
ដោយPatricia Raybon
January 19, 2024
លោកុប្បត្តិ ៤៦-៤៨ និង ម៉ាថាយ ១៣:១-៣០
ម៉ាថាយ ៧:១៣-២៣
ចូរប្រយ័ត្ននឹងពួកគ្រូក្លែងក្លាយ ដែលគេមកឯអ្នករាល់គ្នា ដោយពាក់រោមចៀមបំប្លែងខ្លួន តែខាងក្នុងរបស់គេ ជាឆ្កែចចកដែលឆ្មក់ស៊ីវិញ។ ម៉ាថាយ ៧:១៥
នៅពេលយប់មួយ ក្នុងរដូវក្តៅ សត្វបក្សីជាច្រើននៅក្បែរផ្ទះរបស់ខ្ញុំ ស្រាប់តែនាំគ្នាបញ្ចេញសម្លេងស្រែកយំទ្រហឹងអឺងកង។ សម្រែករបស់ពួកវាបានលាន់ឮកាន់តែខ្លាំងឡើង ខណៈពេលដែលសត្វចាបដែលយំពីរោះបានបញ្ចេញសម្លេងស្រែកហៅចេញពីដើមឈើមក។ ទីបំផុតយើងក៏បានដឹងអំពីមូលហេតុ។ នៅពេលថ្ងៃ មានសត្វស្ទាំងធំមួយក្បាលបានហើរឆាបពីចុងឈើមក ធ្វើឲ្យសត្វបក្សីសម្រុកហើរចេញពីដើមឈើប្រសេចប្រសាច ដោយបញ្ចេញសម្លេងស្រែក យ៉ាងជ្រួលច្របល់ ដើម្បីប្រកាសអាសន្នដល់បក្សីដទៃទៀត ខណៈពេលដែលពួកគេគេចពីគ្រោះថ្នាក់។
ក្នុងការរស់នៅរបស់យើង យើងអាចឮការដាស់តឿនខាងវិញ្ញាណ ដែលមានចែងក្នុងព្រះគម្ពីរ ដូចជាការដាស់តឿន ឲ្យប្រុងប្រយ័ត្នចំពោះពួកគ្រូខុសឆ្គងជាងដើម។ យើងប្រហែលសង្ស័យ ចំពោះការដាស់តឿនទាំងនោះ។ ទោះជាយ៉ាងណាក៏ដោយ ដោយសារសេចក្តីស្រឡាញ់ដែលព្រះអង្គមានចំពោះយើង ព្រះអង្គបានប្រទានព្រះបន្ទូលក្នុងព្រះគម្ពីរ ដើម្បីឲ្យយើងដឹងច្បាស់ អំពីគ្រោះថ្នាក់ខាងវិញ្ញាណ។
ព្រះយេស៊ូវបង្រៀនថា “ចូរប្រយ័ត្ននឹងពួកគ្រូក្លែងក្លាយ ដែលគេមកឯអ្នករាល់គ្នា ដោយពាក់រោមចៀមបំប្លែងខ្លួន តែខាងក្នុងរបស់គេ ជាឆ្កែចចកដែលឆ្មក់ស៊ីវិញ”(ម៉ាថាយ ៧:១៥)។ ព្រះអង្គបានបង្រៀនទៀតថា “អ្នករាល់គ្នានឹងស្គាល់គេបាន ដោយសារផលគេបង្កើត ... អស់ទាំងដើមឈើល្អ តែងមានផ្លែល្អ ឯដើមឈើអាក្រក់ ក៏តែងមានផ្លែអាក្រក់ដែរ” ហើយព្រះអង្គក៏បានដាស់តឿនថា “អ្នករាល់គ្នានឹងស្គាល់គេបាន គឺដោយសារផលគេបង្កើត” (ខ.១៦-១៧,២០)។
បទគម្ពីរសុភាសិត ២២:៣ បានរំឭកយើងថា “មនុស្សដែលមានគំនិតឆ្លៀវឆ្លាត គេឃើញសេចក្តីអាក្រក់មក ក៏ពួនខ្លួនទៅ”។ នៅក្នុងការដាស់តឿនទាំងអស់នេះ គឺសុទ្ធតែបង្កប់ទៅដោយសេចក្តីស្រឡាញ់របស់ព្រះ ដែលការពារយើង និងបានបង្ហាញក្នុងព្រះបន្ទូលព្រះអង្គ។
ដូចដែលបក្សីបានដាស់តឿនគ្នាវា អំពីគ្រោះថ្នាក់ជាយ៉ាងណា នោះចូរយើងស្តាប់បង្គាប់តាម ការដាស់តឿនក្នុងព្រះគម្ពីរ ឲ្យគេចចេញពីគ្រោះថ្នាក់ខាងវិញ្ញាណ និងចូលទៅក្នុងព្រះហស្តនៃការជ្រកកោនរបស់ព្រះអង្គផងដែរ។—Patricia Raybon
តើអ្នកបានឮការដាស់តឿនខាងវិញ្ញាណអ្វីខ្លះ នៅក្នុងចិត្តអ្នក? តើអ្នកមានខគម្ពីរយោងណាខ្លះ សម្រាប់ការដាស់តឿននោះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានដាស់តឿនទូលបង្គំ ដោយសេចក្តីស្រឡាញ់ តាមរយៈព្រះគម្ពីរ។ សូមព្រះអង្គជួយទូលបង្គំឲ្យស្តាប់បង្គាប់តាមព្រះបន្ទូលព្រះអង្គ នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ៤៦-៤៨ និង ម៉ាថាយ ១៣:១-៣០